15:04

Bu gecə Bayram Kürdəxanlı faciəvi şəkildə dünyasını dəyişib.

gundemxeber.az yenicag.az-a istinadən xəbər verir ki, Bayramın ölüm xəbərini eşidən kənd camaatı, dostları onun evinə baş çəkib. Saat 14:00-da yerdən götürülən mərhum Kürdəxanı kənd qəbiristanlığında dəfn olundu.

Dəfndə iştirak edən sənət dostları Bayram haqqında xoş sözlər danışıb, ruhuna fatihə verdilər. Meyxanaçı Namiq Məna isə gözyaşları içində bunları dedi:

"Bir ömür yaşadım, arın-arxayın
Zirvələr dolandı güzarım mənim
Məni dəfn etməyə yer axtarmayın,
Xalqın ürəyidir məzarım mənim...

Bayram elə bir sənətkardır ki, bu cümlələri ona ithaf etmək olar. Onun barəsində danışmaq mənim üçün çox ağırdır. Həmişə mənə deyərdi ki, Namiq, mənə bir şey olsa, qardaşım oğlu Rəcəbdən muğayat oldu. Bayramın bir cavan qardaşı rəhmətə getmişdi, onun adını kiçik qardaşının oğluna qoymuşdular. Deyirdi, onu sənə tapşırıram. Bayram çox savadlı idi. Tarixi, ədəbiyyatı gözəl bilirdi. Misilsiz bədiyyə ustası idi. Çox istərdim ki, onun haqqında gözəl bir veriliş hazırlansın. Bayram biz bədiyyəçilər üçün böyük məktəb idi. Yatsaydım, yuxuma da gəlməzdi ki, Bayram öləcək.

Ona həmişə deyirdim ki, Bayram özünü qoru. Onun da öz dərdi vardı. Bir ziyalı bacısını, qardaşını itirmişdi. Biz tez-tez onunla məclislərdə olurduq. Dərdini mənimlə bölüşürdü. O, fitri istedad idi. Zamanında mən də ondan bəhrələnmişəm. Dünən günorta onunla azı 1 saat danışdım. Dedi, gəl bir mahnı üzərində işləyək. Sözləri də belə idi: "Vaxt tapan başını qaşıyır, Əzrayıl adam daşıyır... bu dünyadan"... Yazığın elə bil ürəyinə dammışdı. Mən bu ölümlə barışa bilmirəm".

-----------

12:08

Xəbər verdiyimiz kimi, meyxanaçı Bayram Kürdəxanılını maşın vurub.

gundemxeber.az axşam.az-a istinadən xəbər verir ki, ağır kəllə-beyin travması və müxtəlif dərəcəli bədən xəsarətləri alan meyxanaçını sürücü 3 saylı Şəhər Kliniki Xəstəxanasına çatdırsa da, həkimlər onun həyatını xilas edə bilməyiblər.

Hazırda Bayramın nəşi Kürdəxanı kəndində yaşadığı evinə gətirilib. Yaxınları, sənət dostları onun mənzilinə toplaşıblar.

Meyxanaçı bu gün saat 14:00-da kənd qəbiristanlığında dəfn olunacaq.

Qeyd edək ki, meyxana ustası qəsəbə ərazisində yolu keçərkən Emin Fərhadovun idarə etdiyi "Peugeot" markalı, "10 PS 782" dövlət seriya nişanlı avromobil onu vurub.