Mustafa namazov: “Polislər məni döydü, avtomobili əlimdən aldılar” “Avtomobilimdə olan 1150 manat pulumu və “Samsunq” markalı bahalı telefonumu götürüblər”

Bakı şəhər sakini Mustafa Namazov bildirib ki, bu ilin iyunun 6-da Olimpiya stadionu ilə üzbəüz körpünün yaxınlığında idaerə etdiyi 99 KV 892 dövlət nömrə nişanlı “Mercedes” markalı avtomobili 348 və 494 nömrəli Dövlət Yol Polisinə məxsus maşında olan 3 əməkdaşı tərəfindən saxlanılıb. Onun sözlərinə görə, yol polisinin əməkdaşları ona sərxoş vəziyyətdə avtomobili idarə etdiyini deyiblər: “Həmin polis əməkdaşlarına bildirdim ki, sərxoş deyiləm, istədiyiniz yerə gedərək müayinədən keçə bilərəm. Lakin onlar məni döyərək avtomobilimi əlimdən almaq istədilər. Sonra onlar mənim yanımda oturaraq avtomobilimi “Xəmsə” şadlıq sarayının yanındakı cərimə meydançasına apardılar”. Şikayətçinin sözlərinə görə, cərimə meydançasının yaxınlığında həmin yol polisinin əməkdaşları onu döyüblər və daha sonra avtomobilini əlindən alıblar: “Avtomobilimi əlimdən aldıqdan sonra bildirdim ki, maşında 1150 manatım və “Samsunq” markalı bahalı telefonum qalıb, icazə verin, pulumu və telefonumu götürüm. Amma onlar maşınımda olan pulumu və telefonumu götürməyimə imkan vermədilər. Avtomobilimi cərimə meydançasına apardılar. Avtomobilimin cərimə meydançasında saxlanılması barədə heç bir akt tərtib edilmədi və mənə verilmədi. Sonradan avtomobilimi cərimə meydançasından götürdüm. Amma nə pulum, nə də telefonum geri qaytarılmadı”. Mustafa Namazov qeyd edib ki, həmin gün Yasamal rayonunda sərxoşluq müayinəsindən keçib: “Müayinə nəticəsində sərxoş olmadığım müəyyən edildi. Elə həmin gün ağrılarımla əlaqədar olaraq 3 saylı Şəhər Kliniki Xəstəxanasına müraciət etmişəm. Sonra baş verənlərlə bağlı Sabunçu rayon Polis İdarəsinin 12-ci polis bölməsinə şikayət ərizəsi vermişəm. Bu günə kimi heç bir tədbir görülməyib. Yol polisinin 3 əməkdaşı məni döyərək quldurluq cinayəti törədiblər. Xəsarət almağımla bağlı ekspertiza rəyi var”. Şikayətçi “Gündəm Xəbər”ə qeyd edib ki, hadisə ilə bağlı baş prokuror Zakir Qaralova, daxili işlər naziri Ramil Usubova, Sabunçu rayon prokuroru Ceyhun Şirinova müraciət edib: “Müraciətimdə mənə qarşı quldurluq törədən yol polisinin əməkdaşları barəsində Cinayət Məcəlləsinin 128-ci (qəsdən sağlamlığa yüngül zərər vurma) və 181-ci (quldurluq) maddələri ilə cinayət işi açılaraq, istintaqın aparılması barədə müvafiq göstəriş verilməsini xahiş edib. Şikayətimdən sonra Sabunçu rayon Prokurorluğunda araşdırma başlanıb. Araşdırma başlanandan sonra prokurorluğa çağırıldım. Müstəntiq izahatımı və ifadəmi aldı. Bundan 2 ay müddət keçməsinə baxmayaraq bir nəticə yoxdur”. Mustafa Namazov qeyd edib ki, onun işinə düzgün baxılmasa, özünü Prezdent Adminstrasiyasının qarşısında yandıracaq. Onun sözlərinə görə, yol polisinin əməkdaşları onu saxlayan zaman özlərini təqdim etməyiblər, döş nişanları da üstlərində olmayıb: “Həmin gün maşında atam olmayıb. Mən özüm tək olmuşam”. Zərərçəkmiş Mustafa Namazovun vəkili Cəfər Cəfərlinin sözlərinə görə, yol polisinin əməkdaşları tərəfindən müvəkkilinə qarşı quldurluq hərəkətləri olub: “Mustafa Namazovun əlindən maşının alıblar. Maşının içərisində bahalı telefon, bir də 1150 manat pul olub. Həmin telefonu və pulu yol polisinin əməkdaşları götürüblər, götürülmə haqqında protakol tərtib etməyiblər. Bu günə qədər də həmin pul və telefon qaytarılmayıb”. Cəfər Cəfərli qeyd edib ki, baş verən hadisə ilə bağlı Sabunçu rayon Prokurorluğunda araşdırma başlanıb: “Quldurluq cinayətləri ilə bağlı təhqiqat araşdırmasının müddəti yoxdur. Həmin iş Sabunçu rayon Prokurorluğunda material şəkilindədir. Araşdırma aparılır, nəticə ilə bağlı məlumat verəcəklər. Cinayət tərkibi olsa, cinayət işi açacaqlar, yoxdursa şikayətimizi rədd edəcəklər. Biz hesab edirik ki, burada cinayət tərkibi var. Əgər cinayət işinin başlanması rədd edilsə, biz həmin qərardan şikayət verəcəyik”. Vəkil bildirib ki, zərərçəkmiş Mustafa Namazovdan ifadə alınıb: “Həmin yol polisinin əməkdaşlarından ifadə alınacaq. İfadə alınandan sonra bu məsələyə qiymət veriləcək. Bir az bu məsələ prokurorluqda yuvanıb, bunu deyə bilmərəm ki, nəyə görə yuvanır. Bundan bir müdafiəçi kimi narahatam. Güman edirik ki, bu işdə yol polisinin əməkdaşları tərəfindən quldurluq cinayətinə yol verilib, vətəndaş döyülüb, pulu və telefonu əlindən alınıb. Guman edirəm ki, bununla bağlı yol polisinin əməkdaşları cinayət məsuliyyətinə cəlb olunacaqlar”. Sabunçu rayon Prokurorluğu ilə əlaqə saxlasaq da, baş verən olaya münasibət bildirmək istəməyiblər.