Son günlər Azərbaycan ictimai-siyasi gündəmini məşğul edən mövzu “Turan” İnformasiya Agentliyinin direktoru Mehman Əliyevin saxlanılması və həbs edilməsidir. Məsələyə yerli və beynəlxalq ictimaiyyətdən təpkilər gəlməkdə davam edir.

Yerli Qeyri-Hökumət Təşkilatı nümayəndələrindən “Bərabər İmkanlar Mərkəzi” İctimai Birliyinin sədri Rafiq Təmrazov da ilkin olaraq öz facebook hesabında bu olaya mənfi münasibət bildirmişdir. Müxbirimizlə söhbətində R.Təmrazov bu həbsi Azərbaycanda müstəqil medianın sonunun yaxınlaşması kimi qiymətləndirmişdir: “Azərbaycanda zaman-zaman müstəqil və tənqidi fikirli media orqanları ya qapadılmış, ya da təzyiqlər nəticəsində öz fəaliyyətini dayandırmağa məcbur olmuşdur. Yadımdadır ki, 90-cı illərdə və 2000-ci illərin əvvəllərində çoxlu sayda müstəqil media orqanları vardı. Hətta TV-lərdə də alternativ fikirlər eşitmək mümkün idi. Müxtəlif metodlarla sıxışdırılan mətbuat bu gün son nəfəsini vermək üzrədir. Məlumdur ki, bir çox qəzetlər iqtisadi sıxıntıdan və ağır cərimələrdən sonra bağlanmaq məcburiyyətində qaldı. Azadlıq qəzeti, Azadlıq Radiosu və digər orqanların internet yayımı da məhdudlaşdırılmışdır”.
QHT sədri R.Təmrazov son dövrlər mətbuatın sıxışdırılmasını xüsusi tapşırıq kimi dəyərləndirib: “2014-cü ildə QHT-lərlə bağlı vəziyyət dəyişəndən sonra mətbuatın da sonuncu nümayəndələrinin sıradan çıxarılmasına başlanılmışdır. Xüsusilə Kanal-13 İnternet Tv-nin rəhbərinin həbsi, bir neçə jurnalistin istintaqa və dindirilməyə cəlb edilməsi göstərir ki, bu təzyiqlər təsadüfi deyil və sifariş əsasında həyata keçirilmişdir. “Turan” İnformasiya Agentliyinin rəhbəri Mehman Əliyevin saxlanılması Azərbaycanın müstəqilliyi dövründən bu günədək azad mətbuatın inkişafına dəstək verən və ictimaiyyətin informasiya ehtiyacını ödəyən bir mətbuat orqanının susdurulmasıdır. Bu o deməkdir ki, biz alternativ fikir və mövqe eşidəcəyimiz daha bir mənbəni də itirdik. Nəzərə alsaq ki, bizim alternativ mənbələrimiz demək olar ki, yoxdur”.
M.Əliyevin saxlanmasının Azərbaycanın siyasi və beynəlxalq imici baxımından da ziyanlı olmasını QHT sədri xüsusi vurğuladı: “Baş verən hadisəyə görə Avropa Şurasının baş katibi bəyanatla çıxış etmişdir. ABŞ senatoru öz narahatçılığını ifadə etməklə bildirmişdir ki, Azərbaycan azad və müstəqil mətbuata layiqdir. Fransanın Xarici İşlər Nazirliyi də M.Əliyevlə bağlı bəyanat yaymışdır. Demək istəyirəm ki, M.Əliyevin həbsi Azərbaycanın beynəlxalq imicinə olduqca ağır zərbə vurur. Xarici ölkələr və beynəlxalq təşkilatlar Azərbaycana götürdüyü öhdəlikləri yerinə yetirməyə çağırır. Bu isə siyasi imic baxımından heç də yaxşı bir şeylər vəd etmir”.
R.Təmrazov öz sözlərini bu cür yekunlaşdırdı: “Tənqidi fikir əslində hakimiyyətə və xüsusilə də Prezidentə daha çox lazımdır. Çünki, tənqidi fikir olmayan zaman çatışmazlıqları və nöqsanları görmək olmur. Düşünürəm ki, aidiyyatı adamlar bu barədə düşünməlidirlər”.