Məhəmməd Namazov: “Xəbərim olmadan sayğacımı açıblar, möhürünü sındırıblar”
Sabunçu Rayon Qaz İstismar Sahəsinin əməkdaşı Arzuman Məmmədov və daha bir işçisi vətəndaş Məhəmməd Namazovun qaz sayğacına müdaxilə edib. Bu barədə “Gündəm Xəbər”ə müraciət edən Məhəmməd Namazov bildirib ki, onun Anaşkin küçəsində olan evinin sayğacını Arzuman Məmmədov və digər işçisi qanunsuz olaraq açıblar.
“Onlar mənim xəbərim olmadan sayğaıcı acıblar. Möhürünü yoxlayıblar. Həmin vaxt sayğacın üzərində möhürü olub. Arzuman və işçisi sayğacımı açaraq kənar yerə aparıblar. Orada sayğaca müdaxilə ediblər”, deyə şikayətçi bildirib.
Şikayətçi daha sonra Arzuman Məmmədovla görüşdüyünü deyib: Arzuman sayğacı aparandan iki saat sonra mənə zəng edib və görüşmək istədiyini bildirib. Mən də onunla görüşdüm. Görüş zamanı Arzuman məndən 200-300 manat pul istədi. Bildirdi ki, mən bunları düz-qoş edim, müdaxilə etdiyim sayğacı da yerinə asım, yarıyayarı istifadə elə. Mən də onun dedikləri ilə razı olmadım və bildirdim ki, dövlətin qaz sayğacına müdaxilə edib, korlamısan. İki saatdan sonra mənə başqa sayğacı göstərib ki, guya sayğaca müdaxilə etmişəm”.
Məhəmməd Namazovun sözlərinə görə, Arzuman Məmmədov sayğacı açan zaman onun iştirakı olmayıb: “Mən Arzumana dedim ki, qanunla nəzərdə tutulmuş qaydada bu sayğaca müdaxilə edən zaman mənim iştirakım olmalı idi. Arzuman isə cavab verdi ki, bizdə qanun yoxdur, göstəriş belədir ki,
vətəndaş olmadan söküb-dağıdırırıq, öz işimizi görürük. Mənə bildirdi ki, pul ver, həmin sayğacı yerinə qoyacam, möhürdə vuracam, bütün bunlar sənlik olmayacaq”.
Məhəmməd Namazov qeyd edib ki, sayğacın müdaxilə olunması ilə bağlı müvafiq qurumlara müraciət edib. Onun sözlərinə görə, sayğaca edilən müdaxilə ilə bağlı müraciətinə cavab alandan sonra daha sərt addımlar atacaq. O, qeyd edib ki, Arzuman Məmmədovun və idarənin qanunsuz hərəkətlərindən məhkəməyə müraciət edəcək: “Məhkəməyə müraciət etmək üçün labaratoriyanın rəyini gözləyirəm”.

Aslan
gundemxeber.az