Mustafa Namazov: “Dövlət Yol Polisinin üç əməkdaşına qarşı cinayət işi bağlı saxlanılır”

Bakının Sabunçu rayonunda Mustafa Namazova qarşı Dövlət Yol Polisinin əməkdaşları tərəfindən edilən quldurluq hadisəsi ilə bağlı prokurorluq cinayət işi açmır.

Bu barədə “Gündəm Xəbər”ə yenidən müraciət edən şikayətçi bildirib ki, yol polisinin rəhbər şəxsləri ona hədə-qorxu gəlirlər, şikayətini geri götürməsini tələb edirlər: “Onlar mənə qarşı quldurluq edənlərə himayədarlıq edirlər. Onların barəsində ciddi tədbirlərin görülməsinin qarşısını almağa çalışırlar”.

Mustafa Namazov qeyd edib ki, Sabunçu rayon Prokurorluğunda iş başalnasa da, şikayət üzrə cinayət işi açılmır: “Prokurorluq şikayətimi material şəkilində saxlayıb, iş başlanmır. Belə başa düşürəm ki, burada prokurorluğun maddi marağı var. Bu səbəbdən işi icraatında neçə aydır ki, material şəkilində saxlayıb. Prokurorluq işi icraatında material şəkilində saxlaya bilir. Nə xitam verə bilir, nə də ki, cinayət işi aça bilir. Xitam verə bilmir ki, ortalıqda quldurluq cinayəti var. Cinayət işi də başlaya bilmir ki, başqa təzyiqlər var. İşlə bağlı ciddi tədbir görülməsini istəyirəm”.

Qeyd edək ki, bir müddət əvvəl “Gündəm Xəbər”ə şikayət məktubu göndərən Bakı şəhər sakini Mustafa Namazov bildirmişdi ki, bu il iyunun 6-da Olimpiya stadionu ilə üzbəüz körpünün yaxınlığında idarə etdiyi 99 KV 892 dövlət nömrə nişanlı “Mersedes” markalı avtomobili Dövlət Yol Polisinə

məxsus 348 və 494 nömrəli maşında olan 3 əməkdaş tərəfindən saxlanılıb. Şikayətçinin sözlərinə görə, yol polisi əməkdaşları ona sərxoş vəziyyətdə avtomobili idarə etdiyini deyiblər: “Bildirdim ki, sərxoş deyiləm, istədiyiniz yerə gedərək müayinədən keçə bilərəm. Ancaq onlar məni döyərək avtomobilimi əlimdən almaq istədilər. Sonra yanımda oturaraq avtomobilimi “Xəmsə” şadlıq sarayının yanındakı cərimə meydançasına apardılar”.

Şikayətçinin sözlərinə görə, cərimə meydançasının yaxınlığında yol polisi əməkdaşları onu döyüb, avtomobilini əlindən alıblar: “Onlara bildirdim ki, maşında 1150 manatım və “Samsunq” markalı bahalı telefonum qalıb, icazə verin, pulumu və telefonumu götürüm. Amma onlar maşından pulumu və telefonumu götürməyimə imkan vermədilər. Avtomobili cərimə meydançasına apardılar. Maşının cərimə meydançasında saxlanılması barədə heç bir akt tərtib edilmədi. Sonradan avtomobilimi cərimə meydançasından götürdüm. Amma nə pulum, nə də telefonum geri qaytarıldı”.

Mustafa Namazov qeyd edib ki, həmin gün Yasamal rayonunda sərxoşluq müayinəsindən keçib: “Müayinə zamanı sərxoş olmadığım müəyyən edildi. Həmin gün ağrılarımla əlaqədar 3 saylı Şəhər Kliniki Xəstəxanasına müraciət etdim, sonra baş verənlərlə bağlı Sabunçu rayon Polis İdarəsinin 12-ci polis bölməsinə şikayət ərizəsi verdim. Bu günə kimi heç bir tədbir görülməyib. Yol polisinin 3 əməkdaşı məni döyərək quldurluq cinayəti törədiblər”.

Şikayətçi qeyd edib ki, hadisə ilə bağlı Baş prokuror Zakir Qaralov, Daxili İşlər naziri Ramil Usubov, Sabunçu rayon prokuroru Ceyhun Şirinova müraciət edib:“Müraciətimdə mənə qarşı quldurluq törədən yol polisinin əməkdaşları barəsində Cinayət Məcəlləsinin 128-ci (qəsdən sağlamlığa yüngül zərər vurma) və 181-ci (quldurluq) maddələri ilə cinayət işi açılaraq, istintaqın aparılması barədə müvafiq göstəriş verilməsini xahiş etdim. Şikayətimdən sonra Sabunçu rayon Prokurorluğunda araşdırma başlandı, prokurorluğa çağırıldım. Müstəntiq izahatımı və ifadəmi aldı. Bundan 2 ay müddət keçməsinə baxmayaraq, nəticə yoxdur”.

Aslan
Gündəm Xəbər