“Müstəntiqin imzalatdırdığı sənədlərin nə sənədlər olduğunu bilməmişəm”

Avto-nəqliyyat vasitəsinin qaçırılmasında təqsirli bilinərək həbs edilən Xaçmaz rayon sakini, 1990-cı il təvəllüdlü Kamil Təhməzovun cinayət işi üzrə məhkəmə prosesi başa çatıb.
İttihama görə, Kamil Təhməzov 7 may 2016-cı il tarixdə, saat 04 radələrində sərxoş vəziyyətdə talama məqsədi olmadan Xaçmaz şəhəri, H.Zərdabi küçəsindən Bəhruz Novruzova məxsus Vaz 21011 markalı avtomobili qaçırıb. O, həmin avtomobili idarə edərkən Xaçmaz-Xudat avtomobil yolunun Köhnə-Xaçmaz kəndi ərazisindən keçən hissəsində yol kənarında olan yol nişanı dirəyinə vurub. Bununla da Bəhruz Novruzova 552 manat məbləğində maddi ziyan dəyib.
Daha sonra Kamil Təhməzov həmin gün saat 05 radələrində sərxoş vəziyyətdə talama məqsədi olmadan Xaçmaz şəhəri, N.Nərimanov küçəsində, 76 saylı binanın qarşısından Abgül İsayevə məxsus Vaz 21061 markalı avtomobili qaçırıb. O, avtomobillə Xaçmaz rayonu, Xaspolad-oba kənd yoluna gəlib və orada avtomobili ataraq qaçıb.
Polis tərəfindən həbs edilən Kamil Təhməzovun əvvəllər dəfələrlə məhkum olunduğu üzə çıxıb. O, ilk dəfə 2011-ci ildə məhkum olunub. Dəfələrlə məhkəmə tərəfindən islah işləri, cərimə cəzalarına məhkum olunmasına baxmayaraq, Kamil Təhməzov islah olunmayıb.
İstintaq orqanı tərəfindən növbəti dəfə Kamil Təhməzova Cinayət Məcəlləsinin 185.2.2-ci (talama məqsədi olmadan qanunsuz olaraq təkrar avtomobil və ya başqa nəqliyyat vasitəsi ələ keçirmə) maddəsi ilə ittiham elan edilib. Onun barəsində olan cinayət işi Xaçmaz rayon Məhkəməsində araşdırılıb. Məhkəmənin hökmü ilə Kamil Təhməzov 2 il 9 ay müddətinə azadlıqdan məhrum edilib.
Hökmdən narazı qalan Kamil Təhməzov apelyasiya şikayəti verib. Onun şikayəti araşdırılması üçün Sumqayıt Apelyasiya Məhkəməsinə göndərilib. İş hakim Hüseyn Nəbiyevin sədrlik etdiyi kollegiyada araşdırılıb.
Təqsirləndirilən Kamil Təhməzov bildirib ki, 25 dekabr 1990-cı ildə Xaçmaz şəhərində anadan olub, 8 may 2016-cı ildə Cinayət Məcəlləsinin 185.2.2-ci maddəsi ilə təqsirli bilinərək Xaçmaz rayon polis şöbəsi tərəfindən həbs olunub: “Bu maddəyə əsasən Xaçmaz rayon Məhkəməsinin 30 noyabr 2016-cı il tarixli hökmü ilə 2 il 9 ay müddətinə azadlıqdan məhrum etmə cəzasına məhkum olunmuşam. Birinci instansiya məhkəməsi tərəfindən işimə düzgün baxılmayıb. Xaçmaz rayon Məhkəməsinin hökmünü qanunsuz və ədalətsiz hesab edirəm. Heç bir şahid və sübut olmadan həbs olunmuşam. Mənim bu cinayətlə əlaqəm yoxdur və bu cinayəti törətməmişəm”.
Kamil Təhməzovun sözlərinə görə, əvvəllər bu maddə ilə təqsirli bilinərək 2 dəfə azadlıqdan məhrum etmə cəzasına məhkum edilib. O, qeyd edib ki, sonuncu cinayət baş verən vaxt evdə olub və heç bir maşını qaçırmayıb: “İbtidai istintaq vaxtı ifadəmdə nə yazılıb, onu bilmirəm. Mənə ifadəmdə nə
yazıldığını deməyiblər. Müstəntiq mənə 1-2 sənəd imzalatdırıb. Həmin sənədləri imzalayarkən bu sənədlərin nə sənədlər olduğunu bilməmişəm. Sənədlərə nə yazmışdılarsa onuda imzalamışam”.
Təqsirləndirilən şəxs qeyd edib ki, məhkəmədə yox, ibtidai istintaq vaxtı həbs olunub: “Qaçırdığım iddia olunan maşınlardan birinə ziyan dəyib və həmin ziyanı anam məndən xəbərsiz ödəyib. Səbəb isə mənim tutulmamağım olub. Pulun ödənməsindən heç bir xəbərim olmayıb. Sonradan bilmişəm ki, anam pulu ödəyib. Həmin gün telefonum üstümdə olub. Onsuz telefonum həmişə üstümdə olur. Hadisə baş verən gün evdə olmuşam və bacımın yoldaşı ilə evdə yeyib-içmişik. Aparılan maşınların birinin olduğu yer bizim evdən təxminən 3 kilometr, o biri maşının aparıldığı yer isə 9 kilometr aralıdır. Birinci instansiya məhkəməsində radarları tələb eləmişəm. Çünki maşınlar aparılan yerdə təhlükəsizlik kameraları və radar var. Ancaq buna əhəmiyyət verilmədiyini və məhkəmənin hökmü ilə mənə təyin olunmuş cəzanı çox ağır hesab etdiyini bildirirəm”.
Təqsirləndirilən şəxsin sözlərinə görə, hadisə baş verən günü anasi, bacısı, yeznəsi və özü bir yerdə olublar: “Həmin gün gecə saat 3-də bacım mənə zəng vurub, ancaq telefonu yatdığım üçün açmamışam. Gecə bacım bizə gəldiyinə görə, mənə zəng vururub. Bacım kafedə işləyir. Kafe də bizim evə yaxındır. Çox gec olanda bacım öz evlərinə getmir, bizə gəlir. Zəng vururmuşdu ki, qapını bağlamayım, açıq qoyum. Bacımda telefona cavab vermədiyimə görə, narahat olub, sonra da bizə gəlib və hara getdiyimi anasından soruşub.
Anamda bacıma mənim yatdığımı deyib. Bundan sonra bacımda qapıdan baxanda görüb ki, evdəyəm. Bacısıgil də Xaçmazda yaşayır. Bacımgilin evi bizim evdən təxminən 2 kilometr aralı olar”.
Kamil Təhməzovun sözlərinə görə, səhər sahə müvəkkili onlara gəlib və onu şöbəyə aparıb: “Şöbədə Valik adlı polis işçisi məndən gecə saat 3-də harda olduğumu soruşdu. Ona evdə olduğumu və gecə böyük yeznəm-qaynım Tofiq Usubovla birlikdə araq içdiyimi dedim. İşlətdiyim telefon balaca yeznəm Tamerlanın adınadır.Mənə zəng vuran bacım Kəmalə olub. Evimiz 2 otaqlıdır. Mən yeznəmlə içəri otaqda yatırıq. Bacım ilə anam da o biri otaqda yatır”.
Kamil Təhməzov bildirib ki, Xaçmaz rayon Məhkəməsinin hökmü dəyişdirilərək barəsində yüngül cəza təyin edilməlidir.
Apelyasiya şikayətinin dəlillərini araşdıran hakim heyəti sonda qərar elan edib. Qərara görə, Kamil Təhməzovun apelyasiya şikayəti təmin edilməyib.

Aslan
"Gündəm Xəbər"