Bankların vəziyyəti bu il də ağır olacaq. Artıq ictimai müzakirələrdə hansı bankların 2018-ci ilin ilk aylarında fəaliyyətini dayandıracağı demək ki, “dəqiqləşib”. Ancaq bütün hallarda yekun qərar rəsmi olaraq Maliyyə Bazarlarına Nəzarət Palatası (MBNP) tərəfindən veriləcək. Maliyyə vəziyyəti ağır olan banklarla yanaşı, banka rəhbərlik, “krişalıq” edən şəxslər haqqında da müxtəlif informasiyalar yayılır. Yayılan məlumatlarda iddia olunur ki, “Unibank” ASC-nin rəhbəri artıq ölkədən qaçıb. Qeyd edək ki, bu haqda heç bir rəsmi xəbər və ya bank tərəfindən təkzib verilməyib.

Bu cür xəbərlərdə adı hallanan banklardan biri də “Bank of Baku”dur. Belə ki, adıçəkilən bankın hazırda Amerika Birləşmiş Ştatlarında (ABŞ) həbsdə olan, güney azərbaycanlı iş adamı Rza Zərrabın nəzarətində olduğu iddia olunur. Məlumdur ki, Rza Zərrab qanunsuz maliyyə dövriyyəsində ittiham olunur və buna görə də onun Türkiyədə və digər bir neçə ölkədə olan mülklərinə həbs qoyulub. Ehtimal olunur ki, Rza Zərrabın bankı olduğu iddia olunan Bank of Baku da məhz bu prosesin qurbanına çevrilib. Doğrudur, bankın maliyyə durumu heç də qənaətbəxş deyil. Xüsusilə də ölkədə baş verən iki kəskin devalvasiyadan sonra kredit protfelinin böyük hissəsi problemə düşən Bank of Baku ciddi şəkildə maliyyə çatışmazlığı ilə üzləşdi. Təbii ki, bu gün ölkənin bank sektorunda ümumi olaraq ciddi problemlər yaşanır. Bank sektorunun sağlamlaşdırılması üçün müəyyən addımlar atılsa da hələ ki, vəziyyət qənaətbəxş deyil. Ekspertlər hesab edir ki, bank sektorunun sağlamlaşdırılması üçün “xəstə” bankların bazardan çıxması və ya çıxarılması vacibdir. Görünən odur ki, sağlamlaşdırma prosesinin ilk qurbanlarından biri də Bank of Baku olacaq.
Belə demək mümkündürsə, Rza Zərrab faktoru da bu məsələdə ciddi rol oynaycaq. Çünki bu gün dünyada önəmli söz sahibi olan Türkiyə artıq Rza Zərrabla münasibətlərini müəyyən çərçivəyə salıb. Xatırlatmaq yerinə düşər ki, Zərrab ABŞ-da məhkəməyə çıxarılıb və nüfuzlu türk siyasətçilərə rüşvət verdiyini iddia edib. Zərrabın ifadəsində adları çəkilən şəxslər bir dönəm Türkiyə hökumətində önəmli postlar tutan siyasətçilərdir. İş adamının etirafçı olması, yoxsa buna məcbur edildiyi isə açıq qalan suallardandır. Türkiyə hökumətinin Rza Zərrabdan uzaqlaşması isə onun regionda, xüsusilə də Azərbaycanda fəaliyyətinə ciddi şəkildə mənfi təsir göstərəcək. Nəzərə almaq lazımdır ki, Azərbaycan və Türkiyə bütün zamanlarda strateji tərəfdaş və dost ölkə olublar. Bu baxımdan Türkiyənin əleyhinə fəaliyyət göstərən istənilən şəxs Azərbaycan üçün arzuolunmazlar siyahısındadır. Bu baxımdan əgər iddia olunduğu kimi Rza Zərrabın adı Bank of Baku ilə hallanırsa, bu bankın uzun “yaşayacağını” gözləmək olmaz. Qeyd edək ki, Rza Zərraba qarşı “casusluq” ittihamı ilə qaldırılmış cinayət işi çərçivəsində aktivlərinə həbs qoyulmuş “NAB Holding” Azərbaycanda “Bank of Baku”nun əsas səhmdarıdır. Bankın səhmlərinin 40 faizi bu holdinqə məxsusdur. Holdinqin saytında maliyyə sahəsində fəaliyyət olaraq “Bank of Baku” barədə məlumata yer verilib.
Digər tərəfdən 8 yanvar tarixində Bank of Bakunun səhmdarları toplaşaraq bankın gələcək strategiyası barədə müzakirələr aparıblar. Toplantında nələrin müzakirə olunduğu haqqında heç bir rəsmi məlumat olmasa da ehtimal olunur ki, səhmdarların toplanmasında məqsəd bankın bağlanması üçün hazırlıq işlərinin aparılması olub. Məlumatlara görə artıq “Bank of Baku”nun bağlanması üçün proseslər başladılıb və yaxın günlərdə bankın fəaliyyətini dayandırması ilə bağlı yekun qərar veriləcək.
Bununla yanaşı “NAB Holding” Azərbaycanda “Auto Azerbaijan”( “Hyundai” markalı avtomobillərin və sərnişin avtobuslarının eksklüziv rəsmi distribüteridir), “Baku Electronics” şirkətinin sahibi və Samsung, Siemens, Bosch, Tefal, Nintendo, Moulinex, Sony, LG, Electrolux və Canon markaları ilə yanaşı və digər elektron avadanlıqlarının 80-a yaxın markasının rəsmi distribüterliyini həyata keçirir və Azərbaycanda bu markaların istehlakçılara 50-dən çox satış nöqtəsi var./cebhe.info