Milli Məclisin üzvləri özlərini və Azərbaycanı biabır etməyə sanki söz veriblər. Onların çıxışları, hərəkətləri millət vəkilliyindən o qədər uzaqdadır ki...

Kimisi soğan əkməyə, kimisi sosial şəbəkəni bağlamağa çağırır, kimisi xalqa “otxod” söyləyir, kimisinin adı tikinti fırıldağında keçir. Və bu azmış, biri də anasını küçəyə atır.

Ötən gün xəbər manşetlərini və sosial şəbəkələri Şəmkirin deputatı Sona Əliyevanın anasına qarşı vəfasız addımı “zəbt etdi”.

Millət vəkili olasan, övlad olasan, xalqın dərdinə yarımaq statusu daşıyasan, amma öz doğma valideyninə laqeydlik edəsən. Söz tapmaq olmur. Sadəcə, sual edirsən ki. bu Milli Məclis hansı meyarlar əsasında formalaşır???

Belə ki, Şəmkir kənd seçki dairəsindən deputat olan Sona Əliyevanın anası Bəsirə Əliyevanın gözü yaşlı qalıb. Yaşlı qadını ağlar qoyan isə özgəsi deyil, elə özünün qızı, deputat Sona Əliyevadır.

Bu ilin fevralında mətbuatda deputatın ailəsində baş verən əmlak davası haqda materiallar dərc olunub.

Həmin materialların dərcindən sonra deputat Sona Əliyeva anasına, qardaşlarına qarşı atdığı qanunsuz addımlardan geri çəkilib, yaxınları sakitləşdirə, mətbuatdan gen gəzmələrinə nail ola bilmişdi.

Bunun müqabilində atası Sakit Əliyevin ölümündən 2 gün əvvəl anasından aldatma yolu ilə alınan etibarnamənin məhkəmə qaydasında ləğv edilməsinə mane olmayıb.

İndi isə tamamilə əks proses gedir. Deputat yenidən anasına və qardaşlarına qarşı hərəkətə keçib, ailənin yeganə gəlir mənbəyi olan atasından qalma biznesi iflic duruma salıb, əvvəlki iddialarını irəli sürüb.

Bu haqda “Yeni Müsavat”a açıqlama verən deputatın anası Bəsirə Əliyeva deyib ki, aylardır şirkətlərinin hesabına köçürülən pulları ala bilmirlər:

“Qızım deputat mandatından, əlaqələrindən istifadə edərək bizim işimizi iflic duruma salıb. Hara gediriksə, kimə müraciət ediriksə, deyirlər ki, Sona deməsə, icazə verməsə biz heç bir sənəd işini görən deyilik. Dərdimizi kimə deyək, bilmirik”.

S.Əliyeva xalqın gözündən düşən addımlar atıb. Bir xanım, bir deputat, bir övlad kimi qınağa tuş gəlib.

Və mərhum Astan Şahverdiyev də sağlığında xalqın gözündən özünü saldı. Niyə deputatlar belə edirlər? Niyə xalqa, ətrafına, prezidentə, dövlətə ziyanlı fəaliyyətlə məşğuldurlar?

Biznesə, pula görədirsə, bu dünyadan heçnə aparmaq olmur. Sadəcə, rahatlığını təmin edərkən ətrafındakıları incitmək lazım deyil. Axı bu parlamentin yaxşı millət vəkilləri də var. Niyə onlara oxşamırlar?

Ananın sözlərinə görə, qızı onu dəlixanaya saldıracağı ilə hədələyir: “Qardaşlarını da işdən çıxartdırmaqla, həbslə hədələyir. İstəyi odur ki, yoldaşımdan qalan əmlaka dair paylarımızdan onun xeyrinə imtina edək.

Məni həyat yoldaşımın sağlıq durumu ağır olan gün - 2017-ci il dekabrın 12-də Şəmkirdəki evimizdən aldadıb Gəncədəki ASAN xidmət mərkəzinə apardı.

Dedi ki, onsuz da atam öləcək, əmlakını adına keçirirəm. Mən də 10 sinif bitirmiş qadınam, nə bilim ki, yoldaşım dünyasını dəyişəndən sonra onun adına olan əmlak avtomatik adıma keçəcəkdi. Bilməzliyimdən istifadə etdi, mənim də, həyat yoldaşımın da payını öz adına keçirdi”.

Ancaq deputat cinayət başında yaxalanarsa haqqında həbs olunma qərarı verilə bilir. Daha öncə də Azərbaycan parlamentində deputatlıq səlahiyyəti, toxunulmazlıq hüququ qaldırılaraq həbs edilən deputatlar olub.

Həmin şəxslərin adları cəmiyyətə də məlumdur. Lakin hansısa mülki mübahisə ancaq məhkəmə qaydasında həllini tapa bilər. Fərqi yoxdur ki, bu mülki mübahisəni kim qaldırıb.

Heç kim buna görə birbaşa cinayət məsuliyyətinə cəlb oluna bilməz. Lakin burada istisna hallar da var. Cinayət Məcəlləsinin 178-ci maddəsi dələduzluq hallarına aiddir.

Şəxsin etibarındandan sui-istifadə etmə və ya aldatma yolu ilə onun əmlakını ələ keçirmə və ya əmlak hüquqlarını əldə etmə halında dələduzluq maddəsi ilə cinayət işi başlana bilir. Ancaq bunun da sübut olunan tərəfləri var.

Əgər bütün bu məsələlər baş verərsə və deputatın da prosesdə əli olduğu ehtimal olunarsa, Baş prokurorluq vasitəsilə Milli Məclisə onun toxunulmazlığının qaldırılması ilə bağlı təqdimat gəlməlidir.

Daha sonra isə onun haqqında cinayət işi açıla bilər. Yəni belə baxanda hər hansı ailə və ya mülki münaqişə zəminində deputatın toxunulmazlığının ortadan qaldırılmır./fia.az