Hər il havaların qızması ilə suda boğulmaların da sayı artır. Sərinlənmək məqsədilə əhali çimmək üçün nəzərdə tutulmayan, dibi lil və bataqlıq olan göllərə, çaylara axın edir, nəticədə, boğulub ölür. Müvafiq qurumlar tərəfindən təbliğat və maarifləndirmə aparılsa da, eyni vəziyyət hər il yay gələndə təkrarlanır.

Bu gün Abşeron rayonunun Novxanı çimərliyində 1 nəfər batıb. Səhər saatlarından batan şəxsin tapılması ilə bağlı dalğıc-axtarış qrupu axtarışlara cəlb olunub. Ötən gün Bərdə rayonunda iki gənc çayda boğularaq ölüb. Hadisə Tərtər çayının rayon ərazisindən keçən hissəsində, çayın sahilində yaradılan süni göldə baş verib. Ölən şəxslərdən biri 16 yaşlı Hacıyev Təhmasib İldırım oğludur. Digər şəxsin kimliyi hələ dəqiqləşməyib.

Dünən daha bir suda boğulma hadisəsi Şəmkir rayonunda baş verib. Rayonun Düz Cırdaxan kəndində 18 yaşlı Süleymanov Kamil süni göldə çimən zaman boğulub.

Bir neçə gün öncə də Şəmkirdə 4 nəfər - Göygöl və Daşkəsən rayon sakinləri Tağıyev Adil, onun həyat yoldaşı Əhmədova Məhəbbət, Qaibov Afiq və onun həyat yoldaşı Əliyeva Zeynəbdir. Məlumata görə, qadınlardan biri Şəmkirin Abbaslı kəndində yerləşən göldə paltar yumaq istəyərkən suya düşüb, digərləri batan şəxsə kömək etmək istəyərkən batıb.

İyulun 1-də Quba rayon sakini Alim Səttərov Xaçmazın Müqtədir qəsəbəsində dənizdə boğulub. Ondan bir gün əvvəl isə həmin ərazidə daha iki nəfər suda batmışdı. Onlardan birinin meyiti tapılıb, digər şəxsin axtarışları davam etdirilir.

Statistika göstərir ki, insanlar daha çox qadağan olunmuş çimərliklərdə və ya çimərlik olmayan yerlərdə üzdüklərinə, bəzən isə içkili vəziyyətdə suya girdiklərinə görə boğulurlar. Mütəxəssislər bildirirlər ki, insanlar çimərliyə gedərkən hava şəraitini də nəzərə almalıdırlar. Küləkli, dumanlı, yaxud günün qaranlıq saatlarında suya girmək olmaz. Saat 12:00-16:00 radələrində suya girmək məsləhət deyil. Həmin saatda günəş şüalarının təsiri daha güclü olur və günvurmaya səbəb ola bilər. Ən münasib vaxt isə 16:00-dan sonradır.