Tovuz rayonunda iki nəfər mülki şəxsin minaya düşdüyü bildirilir.

Bu barədə Tovuz Rayon Mərkəzi Xəstəxanasının baş həkimi Paşa Muradov bildirib. Onun dediyinə görə, hadisə avqustun 7-də səhər saatlarında Azərbaycan-Ermənistan qoşunlarının təmas xəttinin rayonun Əlibəyli kəndi ərazisindən keçən hissəsində baş verib.

Həmin kəndin sakinləri-24 yaşlı Elşad Mehdiyev və 14 yaşlı Elgün Hüseynovun minaya düşərək ağır bədən xəsarətləri aldığı bildirilir. Yaralılar Tovuz Rayon Mərkəzi Xəstəxanasına yerləşdirilib.

Faktla bağlı araşdırmalara başlanıb.

Qarabağ münaqişəsi 1988-ci ildən başlayıb. 1994-cü ildə gerçəkləşən atəşkəs razılaşmasına kimi Azərbaycanın Dağlıq Qarabağ bölgəsi və Dağlıq Qarabağın ətrafındakı yeddi rayonu Ermənistanın nəzarətinə keçib.

Qarabağ münaqişəsinin tənzimlənməsi ATƏT-in Minsk qrupuna həvalə edilib. ABŞ, Fransa və Rusiya həmsədr dövlətlərdir.