Qazax sakini 10-a yaxın vətəndaşı aldadıb.

GUNDEMXEBER.AZ Xezerxeber.az-a istinadən bildirir ki, o, bəzilərinin avtomobilini əlindən alıb, bəzilərinin isə külli miqdarda pulunu mənimsəyib.

Qazax və Ağstafa rayonlarından olan bir qrup şəxs iddia edir ki, Qazaxın Çaylı kənd sakini Əli Axundov onları aldadıb. Zərərçəkənlərin iddialarına görə, adıçəkilən şəxs onların avtomobillərini müxtəlif yollarla əllərindən alaraq satıb.

Bir neçə nəfərdən isə müxtəlif vədlər verərək qızıl-zinət əşyası və nağd pul alaraq mənimsəyib. Zərərçəkənlər Əli Axundovu tanıdıqları üçün ona etibar etdiklərini, bu səbəbdən də aldadıldıqlarını bildiriblər.

Zərərçəkənlər Ağstafa və Qazax rayon polis şöbələrinə müraciət ediblər, araşdırma aparılır.

Əli Axundovun mövqeyini öyrənmək mümkün olmayıb. Bildirildiyinə görə, həmin ailə artıq xeyli müddətdir ki, rayonda yox, Bakıda yaşayır. Ünvanlarını da heç kim bilmir.