Son günlər iki ictimaİ-siyasi fəal inzibati qaydada həbs edilib.

Fevralın 21-də AXCP Yasamal rayon Gənclər Komitəsinin sədri Məhərrəm Rzayev Bakının Nizami rayonu ərazisində Laçın Ticarət Mərkəzində mülki geyimli şəxslər tərəfindən saxlanılıb. Bu barədə AXCP-dən Amerikanın Səsinə bildiriblər.

“Nizami raton Polis İdarəsindən Məhərrəm Rzayevin ailəsinin sorğusuna cavabda deyiblər ki, o Nizami rayon Məhkəməsi tərəfindən inziabti qaydada həbsə məhkum edilib. Amma, fəalın neçə sutka və hansı ittihamla həbs edilməsi barədə məlumat verməyiblər,” AXCP-dən deyiblər.



D18 Hərəkatının rəhbəri Ruslan İzzətli isə facebook səhifəsində yazıb ki, iki gün öncə, fevralın 19-da Milliyyətçi Gənclər Təşkilatı İdarə Heyətinin fəalı Zakir Kərimli oxuduğu Dövlət İdarəçilik Akademiyasında bir neçə mülki geyimli şəxs tərəfindən saxlanılıb.

Yasamal Rayon Məhkəməsi Kərimli barədə 15 sutka inzibati qaydada həbs qərarı çıxarıb.

Hər iki gəncin həbsinin ictimai-siyasi fəallığı ilə bağlı olduğu bildirilir.

Rəsmi qurumlar bu həbslərlə bağlı hələ məliumat yaymayıb.