Dələduzluğun qurbanı olduğunu deyən, Bakı şəhəri Suraxanı rayonu, Əmircan qəsəbəsi Səttar Bəhlülzadə küçəsi, ev 80-də yaşayan vətəndaş Verdiyeva Rəna Eldar qızı “Bakı-Xəbər” qəzeti vastitəsilə düşdüyü acınacaqlı vəziyyətlə bağlı ölkə Prezidentindən və Birinci vitse-prezidentdən kömək istəyib.

Rəna Verdiyeva müraciətində bildirir ki, iki azyaşlı uşağı ilə çöllərdə qalıb. Dələduzluqla evinin alındığını deyən xanım hüquq-mühafizə orqanlarında, məhkəmədə ədalətsizliklə qarşılaşdığını iddia edir. Hər şey Rəna xanımın ailəsinə edilən biznes təklifindən sonra başlayıb. Kifayət Dostumalıyeva və oğlu Kənan Yusifovun təklifindən sonra. K.Dostumalıyeva ilə münasibətlərinə toxunan R.Verdiyeva bildirib ki, onunla Tamara adlı rəfiqəsi vasitəsi ilə tanış olub: “Tamara bildirdi ki, bir qohum var, Tovuzda elektrik mallarının alverini edir. Amma o qədər pul vəsaiti yoxdur. Məni Kifayət və oğlu Kənanla tanış etdi. Sonra Kifayət Dostumalıyeva əri və oğlu Kənanla bizə gələrək birgə işləmək üçün razılıq istədilər. Razılıqdan sonra ilk dəfə 2012-ci ilin sentyabrında Kifayət Dostumalıyevaya notarial qaydada 20 min manat verdik. Bir müddətdən sonra Kifayət və oğlu Kənan mənə bildirdilər ki, Tovuzda camaat mallari nisyə alır və pulları yığa bilmirlər. Dedilər ki, onların “Sədərək” ticarət mərkəzində 2 mağazası var. Orada alver daha yaxşı gedəcək. Mən razılaşdım və Bakıda işləmək qərarına gəldik. 2012-ci ilin noyabrında evimi satıb onlara 120 min manat pul verdim. Təxminən üstündən 10 gün keçmişdi ki, Kənan mənə zəng edərək bildirdi ki, mallar gəlib gömrükdə qalıb. 10 min manat lazımdır ki, malları çıxardaq. Məcbur olub 10 min manatı da onlara verdim. Mallar gəldi, biz yoldaşımla gedib mağazaya baxdıq. Mallar “Kinq” şirkətinə aid idi. Bir müddətdən sonra Kifayət Dostumalıyeva mənə 5-6 kart verdi. Dedi ki, malları rayonlara paylamışıq, pulları yığana qədər bu kartlardan istifadə et. Yəni kartlardan pul çək. Bir müddət kartlardan pul çıxarıb borclarımızı qaytarmağa başladıq. Bir müddət ticarətimiz davam etdi. Sonra mən onlarla haqq-hesab etməyi tələb etdim. Onlar isə müəyyən bəhanələrlə yayınmağa başladılar. Bundan sonra israrla verdiyim pulları geri tələb etdim. Kifayət Dostumalıyeva bildirdi ki, pulları “Kinq” şirkətinin prezidenti Amur Məhərrəmova veriblər. Amur Məhərrəmovun telefon nömrəsini verərək dedi ki, get pulunu ondan tələb et. Amur Məhərrəmova zəng etdim. Dedim ki, Kifayət Dostumalıyevanın aldığı malların pulları mənə məxsusdur, görüşməyi tələb etdim”. R.Verdiyeva deyib ki, A.Məhərəmovla söhbət zamanı ona məlum olub ki, “Sədərək” ticarət mərkəzindəki mağazalar K.Dostumalıyevaya məxsus deyil: “Amur Məhərrəmov dedi ki, Kifayət və oğlu Kənan tərəfindən ona heç bir məbləğ verilməyib. Kifayət və Kənanın özlərinə məxsus olduğu kimi təqdim etdikləri mağazaların da Amur Məhərrəmova məxsus olduğunu öyrəndim. Aydın oldu ki, Kifayət və oğlunun məndən aldıqları 150 min manat pul biznesə yatırılmayıb, mallara verilməyib. Amur Məhərrəmovla söhbətimdən sonra həmin gecə Kifayət Dostumalıyevanın oğlu Kənan Yusifov telefonuma hədələyici mesaj yazdı. Gecə yarısı evim daşlandı. Evi daşlayan Dostumalıyevanın digər oğlu Sənan idi. Səhəri isə qapımıza gəldi. Düşündüm ki, bəlkə üzr istəməyə gəlib. Qucağımda uşağım qapını açanda bıçağı usağın boğazına dirədi ki, əgər pulu istəsən, gecə ilə gəlib uşaqlarının başını kəsərəm”. R.Verdiyeva deyir ki, aldadıldığını başa düşəndən sonra ona K.Dostumalıyeva tərəfindən verilən bank kartlarının kimə məxsus olduğunu araşdırıb: “Öyrəndim ki, kartlar Abseron rayon, Novxanı qəsəbəsində yerləşən 1 nömrəli orta məktəbin müəllimlərinə məxsusdur. Onlarla əlaqə yaratdım. Dedilər ki, Kifayət Dostumalıyevadan faizə pul götürüb əmək haqqı kartlarını təminat kimi ona veriblər. Başa düşdüm ki, məndən alınan 150 min manat faizə paylanıb. Daxili İşlər Nazirliyinə müraciət etdim. Müraciətim araşdırılmaq üçün DİN Baş Mütəşəkkil Cinayətkarlığa Qarşı Mübarizə İdarəsinə göndərildi. Orada aparılan araşdırma məni qane etmədiyindən baş prokrorun müavini Rüstəm Usubova müraciət etdim. 2014-cü ilin əvvəlində mənə qarşı törədilən dələduzluq əməli ilə bağlı CM-nin 178.3.2 maddəsi ilə cinayət işi başlandı. Baş prokurorun müavini işi şəxsi nəzarətə götürdü. İş materialları araşdırılması üçün Bakı Şəhər Baş Polis İdarəsinə göndərildi”. R.Verdiyeva bildirir ki, iş müstəntiq Rüstəm Bayramova həvalə olunub: “Kifayət Dostumalıyeva istintaqdan yayındığından, barəsində həbsli axtarış elan olundu. Onu və oğlunu Tovuzda saxlayaraq istintaqa cəlb etdilər. İstintaq dövründə Kifayət Dostumalıyeva barəsində həbs qətimkan tədbiri seçilib, oğlu Kənan Yusifov barəsində isə heç yerə getməmək haqda qətimkan tədbiri seçilib”. R.Verdiyevaya görə, uzun müddət aparılan istintaq zamanı ona qarşı dələduzluq edildiyi fakt və sübutlarla təsdiqlənib: ” Bakı Ağır Cinayətlər Məhkəməsində hakim Eldar İsmayılov külli miqdarda dələduzluqda təqsirləndirilən Kifayət Dostumalıyeva və oğlu Kənan Yusifova bəraət verdi. Məhkəmədə prokuror hər iki şəxsə cəza verilməsini tələb etmişdi. Lakin hakim bəraət hökmü çıxardıqdan sonra prokuror hökmdən protest verilməyəcəyini bildirdi”. R.Verdiyeva bildirir ki, Bakı Apelyasiya Məhkəməsi də birinci instansiya məhkəməsinin hökmünü qüvvədə saxlayıb. Ali Məhkəməyə verilən Kassasiya şikayətində də Rəna Verdiyeva istəyinə nail ola bilməyib.

Qeyd edək ki, Rəna Verdiyeva bir neçə dəfə dövlət qurumlarının binası qarşısında özünə qəsd etmək istəyib. Hər dəfə onun cəhdinin qarşısını polis əməkdaşları alıb. Şikayətçi bildirir ki, çox çarəsiz durumda olduğu üçün yeganə ümidi Prezident və onun xanımına qalıb: ”Mən evimi satıb pulumun hamısını həmin adamlara vermişəm. 5 ildir 2 uşaqla çöllərdə qalmışam”. Rəna Verdiyeva ölkə rəhbərliyindən xahiş edir ki, hüquqlarının qorunması və işin obyektiv araşdırılması üçün Azərbaycan Respublikasının Konstitusiya Məhkəməsinə müvafiq tövsiyə verilsin.
Məhəmmədəli QƏRİBLİ