Venesuelanın paytaxtı Karakasda və digər şəhərlərdə anti-Maduro etirazları çərşənbə günü də davam edib.Etirazçılar ölkədəki yoxsulluğa görə keçmiş solçu lider Huqo Çavez və onun varisi Maduronu günahlandırır.

Lakin hərbinin Maduroya sadiq qalması ona hakimiyyətdən imtina etmək üçün olan çağırışlara qarşı müqavimət göstərməyə imkan verir. Həmçinin sadə venesuelalılar arasında da onu dəstəkləyənlər var.

Rusiya, Çin, Kuba və bir sıra digər ölkələr Maduronu dəstəkləyir. ABŞ rəsmiləri deyiblər ki, Kuba Maduronun təhlükəsizliyini gücləndirmək üçün birlik göndərib. Tramp administrasiyası Venesuelada baş verəcək zorakılığa cavab verəcəyi xəbərdarlığını edib.

Dövlət katibi Mayk Pompeo çərşənbə günü Venesuelada davam edən iğtişaşların dayandırılması üçün ABŞ-ın hərbi müdaxilə etməyə hazır olduğunu bidirib.

"Prezident çox aydın və davamlı şəkildə bildirib ki, əgər buna ehtiyac olarsa, hərbi müdaxilə mümkündür. Birləşmiş Ştatların edəcəyi bu olacaq. Biz şiddətin baş verməməsi üçün hər şeyi edəcəyik. Biz bütün tərəflərdən şiddətə baş vurmamaqla bağlı çağırış etmişik. Biz sülh yolu ilə Maduronun hakimiyyətdən getməsini və yeni seçki keçirilməsini istəyirik." - deyə, Pompeo bildirib.

Çərşənbə axşamı televiziyada etdiyi çıxışında Maduro müxalifət hərəkatının məğlub olduğunu iddia edib. Lakin Pompeonun sözlərinə görə, Maduro Karakasdan Kubaya getməyə hazırlaşırmış amma Rusiya onu qalmağa razı dalıb.

ABŞ konqresmeni Donna Şalala Amerikanın Səsinə bildirib ki, Birləşmiş Ştatlar Venesuelaya xarici müdaxilə olunmasına icazə verməyəcək.

"Biz Venesuelada sülh yolu ilə keçid istəyirik. Bununla bərabər ölkənin legitim lideri Xuan Quaydo və Venesuela siyasətinə müdaxilə etmək istəyən kubalılar, rusiyalılar və iranlıları sıxışdırmaq istəyirik. Biz onlar geri çəkilənə, ölkədə dinc keçid və seçkilər keçirilənə qədər onları sıxışdıracağıq." - deyə, Donna Şalala bildirib.

Şalala deyib ki, Demokratlar və Respublikaçılar Venesuelada hakimiyyətin dinc yolla keçidinə dəstək verir.