Kriminal aləmdə yeni gəlişmələr var. Hazırda daha çox diqqət Rusiya kriminalının 1 nömrəli lideri olacağı deyilən Tariel Onianin məhkəməsinə yönəlib. Orenburq vilayət məhkəməsi “Taro” kimi tanına məşhur “qanuni oğru”nun həbs müddətinin oktyabr ayının 9-dək uzadıb. 12 illik həbs həyatını bu ilin aprelində başa vuran “Taro” həbsxanadan çıxan kimi İspaniyanın sorğusu əsasında saxlayıb. İspaniya onu bir sıra cinayətlərdə ittiham edir və bu ölkəyə təhvil verilməsini istəyir.

Rusiya saytları yazır ki, “Taro” heç bir halda İspaniyaya verilməyəcək və həbs müddətinin uzadılması da buna sübutdur. “Taro”nun ətrafından sızan bilgidə isə bildirilir ki, “qanuni oğru” Gürcüstana, oradan isə üçüncü ölkəyə gedəcək. “Bu böyük ehtimalla Türkiyə olacaq. Çünki Kutaisi və Suxumi klanı hazırda güclərinin birləşdirib və heç kimin bata bilməyəcəyi bir gücə çevrilib” deyə, mənbə bildirib.

Xəbər verildiyi kimi, Rusiya KİV-ləri bir neçə gün əvvəl nüfuzlu azərbaycanlı “qanuni oğru” Nadir Səlifovla(“Lotu Quli”) “Edik Osetrin” ayaması ilə tanınan Eduard Asatryan arasındakı münaqişədən yazıb.

İddia olunur ki, münaqişəyə “Beso Rustavski” kimi tanınan Besik Kvinixidzenin statusu olub. Belə ki, o, Saratov vilayətində öz kriminal nüfuzunu bərpa etməyə cəhd edib, “Edik Osetrin” isə bildirib ki, oğruların ona “çoxlu sualı” var. “Quli” isə öz növbəsində “Osetrin”lə telefon danışığında xatırladıb ki, “Nodar Rustavski” iki ildir hər yerdə Ediki açıq şəkildə “zibil” adlandırır, amma onun bundan xəbəri olsa da, heç bir reaksiya vermir.

“Və buna baxmayaraq, mən səninlə bərabər olaraq danışıram. Ən yaxşısı, sən ya bunu araşdır, ya da adını çəkmə. Sonda, əgər lazımdırsa, mən özüm görüş təşkil edəcəm, biz oğrular bu məsələyə nöqtə qoyacağıq”, - deyə, azərbaycanlı “qanuni oğru” bildirib.
“Quli” deyib ki, əgər “Beso” kriminal dünya üçün diqqətəlayiq nəsə edibsə, o zaman ona dostluq əli uzadılmalıdır: “Sualları isə o azadlığa çıxandan sonra vermək olar”.

Primecrime.ru saytı yazır ki, Asatryan cavabında deyib ki, onun Kvinixidzenin nailiyyətləri haqda xəbəri yoxdur.
Kvinixidze 2010-cu ilin əvvəlində “taclandırılıb”. Sonradan peterburqlu oğrular onu kriminal aləmə aldatma yolu ilə daxil olduğuna görə statusdan məhrum ediblər.

Bəs, Asatryan kimdir?

Eduard Asatryan milliyyətcə ermənidir və 1968-ci ildə Tiflisdə anadan olub, əvvəllər dəfələrlə müttəhim kürsüsündə əyləşib. Mafioz dairələrdə çox yaxşı tanınan E.Asatryan bir neçə dəfə məhkum olunub. Məlumatlara görə, onun təkcə Rusiyada deyil, bir sıra Avropa ölkələrində də kriminal qruplaşmalara təsiri və nəzarəti var. Asatryan uzun müddət “Ded Xasan”ın yaxın adamlarından sayılıb. 2012-ci ildə isə onlar arasında maliyyə məsələsi ilə bağlı fikir ayrılığı yaranıb. 2013-cü ildə “Ded Xasan”ın öldürülməsindən sonra mafiyanın əsas aktivlərini yaxşı bilən Asatryan bunları öz tabeliyinə keçirib, mafiya lideri olmaq istəyib. O zaman bu vəzifəyə əsas namizədlərdən biri də Usoyanın qohumu Dmitri Çanturiya sayılırdı. Asatryanın kriminal aləmdə təsiri, Mironun isə ciddi maliyyə imkanları vardı. Lakin hər iki tərəf bu mübarizədə uduzdu. 2013-cü ildə hər iki “qanuni oğru”nun tərəfdarlarının görüşündə Mironun adamları Asatryan və oğlunu döydülər. Bir müddət sonra o, külli miqdarda narkotikin saxlanılmasında günahlandırılaraq 3 il azadlıqdan məhrum edildi.

Asatryan kriminal aləmdə ciddi qayda-qanun yaratmaq, müxtəlif yollarla “oğru” adı alan və polisin əlinə düşən kimi “vor zakon” adından imtina edən şəxsləri meydandan “təmizləmək” niyyətini ortaya qoymuşdu.

Asatryanın oğlu Sergey də Rusiyanın kriminal dairələrində məşhurdur. Əməliyyatçılar onu Rusiyanın yeni kriminal nəslinin “qızıl gəncliyi” hesab edirdilər. O, ən son moda ilə geyinər, bahalı avtomobillərdən ibarət avtoparkı saxlayardı. Özü daha çox “Bentli”yə üstünlük verdiyi üçün ləqəblərindən bir də “Sergey Bentli”dir.

Hazırda həbsdə olan “Sergey Bentli”nin də statusu şübhəlidir.

“Sergey Bentli” 1,2 milyon dollarlıq soyğunda ittiham edilib. Məhkəmənin hökmü ilə ona 9 il həbs cəzası verilib. O, hələ məhkəməsi gedərkən məşhur “Motrosskaya Tişina” təcridxanasında maştağalı “Taleh Noqilski” kimi tanınan Taleh Dağlıyevlə problem yaranmışdı. Bundan sonra isə o, Vladimirdəki təcridxanaya köçürülmüşdü.//Musavat.com