İbrahim Mustafayev dövlət başçısının etimadını doğruldur

Son 16 ildə Prezident İlham Əliyevin rəhbərliyi altında aparılan uğurlu, məqsədyönlü siyasət nəticəsində ölkəmizin sosial-iqtisadi həyatında baş verən köklü dəyişikliklər, dünya iqtisadi məkanına sürətlə inteqrasiya, iqtisadi quruculuq sahəsində davamlı makroiqtisadi stabillik və iqtisadi artım vətəndaşlarımızın maddi-rifah halının əhəmiyyətli dərəcədə yaxşılaşdırılmasını təmin etmişdir. Qəbul edilmiş “Regionların sosisl-iqtisadi inkişafı ilə bağlı Dövlət Proqramları”nın icra vəziyyətinə nəzər saldıqda bu işlərin həm real həyatda, həm rəqəmlərdə, həm də dəyişən, abadlaşan şəhər, qəsəbə və kəndlərimizdə özünü göstərdiyi, Azərbaycan iqtisadiyyatının dünya miqyasında rekord templərlə inkişafının əyani təzahürüdür. Hər bir bölgənin inkişaf strategiyasına uyğun həyata keçirilən və son illər bütün regionlarda səngiməyən abadlıq-quruculuq işləri İbrahim Mustafayevin rəhbərliyi altında Gədəbəy rayonunda da uğurla davam etdirilmiş, mühüm infrastruktur layihələri icra olunmuş, sosial yönümlü obyektlər tikilib istifadəyə verilmiş, yol-nəqliyyat infrastrukturunun yaxşılaşdırılması, əhalinin sosial vəziyyətin yüksəldilməsi istiqamətində zəruri təxirəsalınmaz tədbirlər həyata keçirilmiş, rayonun iqtisadi və sosial həyatında baş verən pozitiv dəyişikliklər bütün sahələrdə yüksəlişlə müşayiət olunmuşdur. Rayonun iqtisadiyyatının əsasını əkinçilik və heyvandarlıq təşkil etdiyi üçün bu sahənin daha da inkişaf etdirilməsi istiqamətində işlər aparılaraq məhsul istehsalçılarına Gədəbəy RİH tərəfindən lazımi dəstək verilmiş və müvafiq köməkliklər göstərilmişdir. Rayonda ümumilikdə əkin aparılmış 13 min 793,8 hektarda 11 min 810 hektar kartof, 1585,3 hektar buğda, 94 hektar arpa, 240 hektar kələm, 18 hektar yerkökü, 10 hektar qarğıdalı, 36,5 hektar digər tərəvəz məhsulları əkilmişdir. Sahələrdən 126 min 367 ton kartof, 4 min 375 ton buğda, 188 ton arpa, 43 ton qarğıdalı, 3 min 360 ton kələm, 252 ton yerkökü və 408,2 ton digər tərəvəz məhsulları yığılmış, orta məhsuldarlıq hər hektara kartof, buğda və tərəvəz sahəsində müvafiq olaraq 107, 27,6 və 143,1 sentner təşkil etmişdir. Kənd təsərrüfatı məhsullarının becərilməsi zamanı işləyənlərin sayı 37 min 109 nəfər olmuşdur. 9074 arı ailəsinə görə 747 arıçıya 90 min 740 manat subsidiya hesablanaraq ödənilmiş, 05 oktybar 2018-ci il tarixdə Bakı şəhərində təşkil edilmiş bal yarmarkasına 7 nəfər arıçının istehsal etdiyi 2410 kq süzmə bal, 80 ədəd çərçivə, 6 kq çiçək tozu və 4,5 kq vərəmum satışa göndərilmişdir. 20 bələdiyyə üzrə ümumilikdə 81 km yol təmir edilmiş, 150 min 163 manat vergi yığılmışdır ki, bu hər bələdiyyə üzrə ildə orta hesabla 7,5 min manat təşkil etmişdir.
Azərbaycan Respublikasının Prezidenti cənab İlham Əliyevin “Yerli icra orqanları vətəndaşlara daim diqqət və qayğı göstərməlidirlər. Yaddan çıxarmamalıdırlar ki, onlar vətəndaşlara xidmət edirlər” kimi mötəbər tapşırığı vətəndaşların müraciətlərinə baxılması kimi həssas bir sahədə İbrahim Mustafayevin fəaliyyətinin əsas qayəsini təşkil etmişdir. İlk növbədə vətəndaşların qəbuluna münasibət kökündən dəyişilmiş, onlar diqqətlə dinlənilmiş, müraciətlərin mahiyyəti üzrə əsaslı qərarlar qəbul edilmişdir. Hər bir müraciətə göstərilən həssas münasibət, açıqlıq, işgüzar mühit yerli dövlət hakimiyyəti orqanlarının vətəndaşlar üçün günün istənilən vaxtı açıq olması rayon icra halimiyyətini vətəndaşların etimad ünvanına çevirmişdir.
Bildiyimiz kimi, iyul ayında Azərbaycanda yaylaq və elat ənənələrinin yaşadılması və təbliği məqsədilə ilk dəfə olaraq Gədəbəy rayonunda Milli Yaylaq Festivalı İbrahim Mustafayevin rəhbərliyi altında və Rayon İcra Hakimiyyətinin təşkilatçılığı ilə yüksək səviyyədə keçirildi.Gədəbəy rayonunun ərazisində yerləşən Düzyurd-Miskinli yaylağında, unikal konsepsiya əsasında təşkil olunan Milli Yaylaq Festivalına təşkilatçı və tərəfdaş qurumların rəhbər şəxsləri, dövlət və hökumət rəsmiləri, diplomatlar, 16 ölkədən nümayəndələr, o cümlədən Dünya Etnoidman Konfederasiyasının sədri Bilal Ərdoğan, eləcə də yerli və xarici turistlər qatıldı.
Rayon İcra Hakimiyyətinin başçısı İbrahim Mustafayev, hüquq mühafizə orqanlarının, dövlət idarə, müəssisə və təşkilatlarının, xidmət sahələrinin rəhbərləri ilə birlikdə tez-tez kənd sakinləri ilə görüşlər keçirir.
Prezident cənab İlham Əliyevin tapşırıq və tövsiyələrinə uyğun olaraq yerlərdə keçirilən görüşlərin məqsədi sakinlərin problemlərini yerində öyrənmək və onları həll etməkdir. RİH başçısı hər görüşdə səyyar qəbul-görüşdə iştirak edən sakinləri aktiv olmağa, onları maraqlandıran məsələlərlə bağlı fəallıq göstərməyə çağırır.
Bundan ruhlanan sakinlər onları narahat edən məsələlərin həlli ilə bağlı Rayon İcra Hakimiyyətinin başçısına müraciət edirlər və bir çox problemlər elə yerindəcə həll edilir. Sakinlər tərəfindən qaldırılan məsələlər ətrafında geniş müzakirələr aparılır, bir sıra təklif və tənqidi qeydlərin araşdırılması və həllinə kömək göstərilməsi barədə müvafiq qurumların rəhbərlərinə tapşırıqlar verilir. Bu qəbullar demək olar ki, rayonun bütün kəndlərində aparıldığından yerli sakinlər və kənd ağsaqqalları RİH başçısı İbrahim Mustafayevdən razılıq edirlər, onun bu xeyirxah işlərinə görə dövlət başçısına təşəkkür məktubları ünvanlayırlar. Rayonda son vaxtlar səhiyyə sahəsində böyük canlanma müşahidə edilir. Demək olar ki, son aylarda rayonun bütün kəndlərində yeni tibb məntəqələri tikilərək yerli sakinlərin istifadəsinə verilmişdir.
Eyni zamanda Gədəbəyin sakinlərinin Daxili İşlər, Ədliyyə, Əmək və Əhalinin Sosial Müdafiəsi nazirlikləri, həmçinin Əmlak Məsələləri Dövlət Komitəsinin xidmətləri üçün Gəncəyə gəlmələrinə ehtiyac qalmayıb. Gəncə ASAN Xidmət Mərkəzinin əməkdaşları bu rayonda səyyar şəkildə fəaliyyət göstərirlər. Sakinlər yüksək xidmətdən, müracətlərinin tez və asan şəkildə həll olunmasından məmnundurlar. Səyyar ASAN-da vətəndaşlara şəxsiyyət vəsiqələrinin, ümumvətəndaş pasportlarının verilməsi və dəyişdirilməsi, sürücülük vəsiqələrinin dəyişdirilməsi, torpaq kadastrı barədə arayışların verilməsi, daşınmaz əmlak üzrə əməliyyatların qeydiyyatı, vətəndaşlıq vəziyyəti aktlarının dövlət qeydiyyatı və digər xidmətlər göstərilir. Gədəbəydə “ASAN Xidmət”-in səyyar avtobusunda tibb, tərcümə, “Azəriqaz” tərəfindən göstərilən xidmətlər, eləcə də cərimələrin ödənilməsi və digər funksional yardımçı xidmətlər də göstərilir.
Ümidvarıq ki, İbrahim Mustafayevin rəhbərliyi altında Gədəbəy rayonu gələcəkdə də Azərbaycan Respublikası Prezidentinin fərman, sərəncam və tapşırıqlarını vaxtında və keyfiyyətlə icrası, vətəndaşlarımızın layiq olduqları rifahlı yaşayışın təmin edilməsi üçün bütün imkanları səfərbər edərək qarşıya qoyulan vəzifələrin öhdəsindən layiqincə gələcəkdir.

Gundemxeber.Az