Şərləndiyini deyən qadın haqq-ədalətin bərpasını tələb edir

“Heç bir günahım olmaya-olmaya məni 13 ay 15 gün həbsdə saxladılar. 1-i xəstə olmaqla 3 övladım qohum-qardaşın ümidinə qaldı. İlk gündən də hamı bilirdi ki, heç bir günahım yoxdur, əlimdə olan səs yazıları bunu sübut edirdi. Amma bu sübutlar məni həbsdən qurtarmadı. Düzdür, sonda bəraət aldım. Amma məni şərləyən, barəsində dələduzluğa görə 8 il həbs cəzası çıxarılan Təyminə Abdullayevanı (Yusifova) təkrar dələduzluğa görə məhkəmə şərti cəza ilə azadlığa buraxdı. Budur ədalət?”

Bu sözləri “Yeni Müsavat”a Bakı sakini Səkinə İsmayılova bildirib. Qeyd edib ki, ona və özünün keçmiş həyat yoldaşına qarşı dələduzluq etmiş Təyminə Abdullayeva cəmiyyət üçün təhlükəli şəxsdir.

Təyminə Abdullayeva həyat yoldaşı Barat Abdullayevə qarşı külli miqdarda dələduzluq edib. Ərinin sərvətlərini mənimsəyən Təyminə Abdullayeva özünü təmizə çıxarmaq üçün Səkinə İsmayılovaya böhtan atıb, yekunda isə özü 8 il azadlıqdan məhrum edilib...

Bu haqda “Yeni Müsavat”da “Bakıda ərini aldadan qadın rəfiqəsini şərlədi, sonda özü həbsə girdi” sərlövhəli yazı dərc etmişdik.

Təyminə Abdullayevanın cinayət işinin materialları ilə tanış olduqca, məhkəmə istintaqı haqda mətbuatda yazılan xəbərləri oxuduqca kriminal filmlərə ssenari ola biləcək gedişat göz önünə gəlir. İbtidai istintaq orqanı tərəfindən və həmin dövrün mətbuat yazılarında Səkinə İsmayılova “falçı Səkinə” kimi təqdim olunub. Faktiki isə Səkinə İsmayılova falçı, baxıcı-filan deyilmiş, bu adlar ona digər bir cinayətin, gizli sevgi münasibətlərinə xərclənən pulların izini itirməkdən ötrü qoyulubmuş. Cinayət işinin hallarından, Səkinənin danışdıqlarından məlum olur ki, əslində hazırkı ssenari Təyminə Abdullayeva və onunla əlbir olmuş bir qrup şəxslər və havadarları tərəfindən illər öncə hazırlanıb. Məqsəd isə onun Təyminənin öz ərinə, ərinin biznes ortaqlarına və ərinə etibar etmiş biznesmenlərə məxsus əmlakları müxtəlif yollarla ələ keçirmək və sair hallar olub. Hətta müəyyən olunub ki, Səkinə İsmayılova özü də bilmədən T.Abdullayeva və onun ətrafındakıların niyyətlərini həyata keçirmələrinə, onların tez ifşa olunmalarına səbəb olub. Ssenari üzrə məntiqi sonluq onun Təyminənin özünün həyat yoldaşının sifarişlə aradan götürülməsi ilə nəticələnməli imiş.

İttihama görə, Səkinə İsmayılova etibardan sui-istitadə etmə və aldatma yolu ilə təkrarən özgənin əmlakını ələ keçirib. Zərərçəkmiş şəxslərə - Təyminə Abdullayevaya və onun bacısı qızı Esmira Hüseynovaya xeyli və külli miqdarda ziyan vurmaqla dələduzluq edib. Tanışı Təyminə Abdullayevanı aldadaraq, falçılıq fəaliyyəti ilə məşğul olaraq sonuncunun ailəsində olan problemləri aradan qaldıracağını yalandan vəd verib. Bu məqsədlə Təyminə Abdullayevadan ümumilikdə 150 min manatdan artıq pul alıb. Məhkəmə araşdırmaları zamanı isə məlum olub ki, T.Abdullayeva özünün əməlləri ifşa olunduqdan sonra əmlakların və pulların mənimsənilmə məqsədlərini gizlətmək üçün Səkinə İsmayılovanı qurban kimi seçib. Pullar digər şəxslərə - Təyminə Abdullayevanın tanışlarına, havadarlarına və bir neçə özündən 15-20 yaş kiçik gənc sevgililərinə, gizli münasibətləri olan şəxslərə verilib. İsmayılovanın guya falçı olması da məhz bu məqamın gizlədilməsi üçün uydurulan versiyanın inandırıcı olmasına xidmət edib.

Səkinə İsmayılova şərlə həbsdə saxlandığı, Bakı Ağır Cinayətlər Məhkəməsində üzərində məhkəmə getdiyi günlərdə Təyminə Abdullayevanın barəsində olan cinayət dosyesi də bu instansiyaya daxil olub. Cinayət Məcəlləsinin 3 maddəsi - rəsmi sənədləri saxtalaşdırma, külli miqdarda ziyan vurmaqla dələduzluq və hakimiyyət nümayəndəsinə zor tətbiq etmə ilə ittiham olunan T.Abdullayeva sonda 8 il azadlıqdan məhrum olunub. Az sonra isə onu əfvlə azad ediblər. Səkinə İsmayılova bəraət alıb azadlığa çıxandan sonra Təyminə Abdullayevaya qarşı iddia qaldırıb, onun barəsində yalan məlumatlar verib həbs etdirdiyinə görə məsuliyyətə cəlb edilməsini tələb edib.

Nərimanov Rayon Məhkəməsində hakim Samir Məmmədovun sədrliyi ilə Səkinə İsmayılovanın iddiasına baxılıb. Hakim əvvəllər məhkum edilmiş Təyminə Abdullayeva barəsində 2 il müddətinə azadlığın məhdudlaşdırılması növündə cəza təyin edib. Bu, o deməkdir ki, dələduzluq, sənədləri saxtalaşdırma və s. cinayətlərdə adı keçən bir qadın 2 il müddətində Bakı şəhəri ərazində axşam 23-dən səhər 6-ya qədər yaşayış yerini tərk etməməlidir. Bu isə 296.2-ci maddə ilə ən yüngül cəzadır. Halbuki Təyminəni azadlıqdan məhrum etməli idilər.

Səkinə İsmayılova Nərimanov məhkəməsinin hökmünü ədalətsiz sayır. Deyir ki, onu heç bir günahı olmaya-olmaya 13 ay 15 gün həbsdə saxlayıblar, övladlarını anasız qoyublar. Təyminə Abdullayevanın isə məhkəmə hökmü ilə təsdiqlənən cinayətləri ortalıqdadır. “Apelyasiya şikayəti vermişəm. Ümid edirəm ki, apelyasiya instansiyasında Təyminə Abdullayevanın ayağındakı probasiya məmurlarının vurduqları elektron bilərziyi açıb əlinə qandal vurub həbsə göndərəcəklər. Bu qadın şərçidir, barəsindəki mənasız hökmlərlə azadlıqda qaldığı müddətdə mənim kimi günahsız insanları tora salmaqda davam edəcək. Onu real olaraq cəmiyyətdən təcrid edib cəzalandlrmaq lazımdır ki, bir daha ağlının ucundan belə cinayət etmək keçməsin” - deyə Səkinə İsmayılova bildirib.