Məşhur iş adamı Barat Abdullayev arvadını dələduzluqa günhalandırıb

Ər-arvadın arasında mülk davası, məhkəməsi çəkişməsi və sonda dələduzluq

Saxta sənəd düzəltməkdə, dələduzluqda və polisə müqavimət göstərməkdə təqsirləndirilən Təyminə Abdullayevanın cinayət işi üzrə məhkəmə prosesi başlayıb. Cinayət işi Bakı Ağır Cinayətlər Məhkəməsində, hakim Ramella Allahverdiyevanın sədrliyi ilə keçirilən prosesdə araşdırılır.

İttihama görə, Təyminə Abdullayeva ötən il iyunun 21-də polis tərəfindən saxlanılıb, onun barəsində heç yerə getməməklə bağlı qətimkan tədbiri seçilib. O, həyat yoldaşı Barat Abdullayevin şikayəti əsasında həbs edilib. Barat Abdullayev şikayətində bildirib ki, arvadı Təyminə Abdullayeva birgə nikahdan olan yaşayış sahəsini satıb pulunu ələ keçirmək məqsədilə şəxsiyyət vəsiqəsini saxtalaşdırıb.

Bundan sonra həmin sənəddən istifadə edərək qeyd edilən mənzili 250 min manata özgəninkiləşdirərərər, ona 890 min manat məbləğində ziyan vurub.

Qeyd edək ki, Barat Abdullayev şəxsi bizneslə məşğuldur. Onun Bakıda oteli, ticarət obyektləri olduğu bildirilir. Əlavə edək ki, Barat Abdullayev həyat yoldaşından boşanmaq üçün məhkəməyə müraciət edib.

Təqsirləndirilən şəxs isə bildirib ki, Əhmədli metrosunun yaxınlığında yerləşən “Vesta” Gözəllik Salonunda Səkinə

İsmayılova ilə tanış olub. Səkinə özünü gözəllik salonun sahibi kimi təqdim edərək oranı Təyminə Abdullayevaya 100 min dollara sata biləcəyini deyib. Səkinə İsmayılovanın təklifi əsasında Təyminə Abdullayeva evini girov qoyaraq “Faktor Lizing” MMC-dən kredit götürüb, həmin obyekti almaq qərarına gəlib. Sənədlər imzalanarkən aldadıldığını, müqavilədə evin MMC tərəfindən 250 min manata alınması və pulu yarısının Səkinənin ödəməsinin qeyd olunduğunu bilib, digər sənədləri imzalamaqdan imtina edib. MMC bir neçə ay sonra Təyminə Abdullayevaya pul ödəmədən evi Səkinə İsmayılovaya satıb.

“Narazı qalmışam”

Təyminə Abdullayeva ibtidai istintaqa bildirib ki, 1990-cı ildə ailə qurduğu Barat Abdullayev dayısı oğludur, həmin nikahdan 2003-cü ildə Neman adlı övladları dünyaya gəlib: “Evli olduğumuz halda Barat 1998-ci ildə Natalya adlı bir qadınla qeyri-rəsmi yaşamağa başladı və bir qız övladları dünyaya gəldi. Buna görə aramızda tez-tez problemlər, söz-söhbətlər olurdu. Övladımın atası olduğu üçün Barat Abdullayevi bağışladım. Ərim tez-tez işi ilə bağlı xarici ölkələrdə olub, Bakıya qayıtdıqda isə o biri ailəsinin yanında qalıb. Bu vəziyyətdən narazı qalmışam”.

“Ekstrasensin kömək edəcəyini dedi”

Təyminə Abdullayevanın sözlərinə görə, bacısı qızı Esmira və onun tanışı Nazilə adlı qadın vasitəsi ilə Səkinə İsmayılova adlı qadınla tanış olub: “Nazilə mənə dedi ki, sənə cadu ediblər. Məsləhət gördü ki, Səkinənin yanına gedim. Esmira

da belə məsləhət gördü. Nazilə məni Səkinənin Əhmədlidəki evinə apardı. Səkinə də mənə bildirdi ki, bir rus qadın sənə cadu edib. Cadunun çıxarılması üçün 20 min manat istədi. Bu pulla Gürcüstandan cadunun çıxarılması üçün müxtəlif əşyalar gətirəcəyini dedi. Bununla razılaşdım. İki gün sonra bacım Rəna və qızı Esmira ilə Səkinənin evinə getdik, 20 min manatı ona verdim. Səkinə falıma baxıb dedi ki, mənim və oğlumun ölümünə cadu ediblər. Pulu alanda Səkinə bir bağlama verdi. Dedi, bunu gözdən uzaq, qaranlıq bir yerdə saxlayaq. Biz də Zığ qəsəbəsində zeytunluğa basdırdıq. Həmin vaxt Səkinə dedi ki, səbirli ol, yaxında hər şey düzələcək. Təxminən 1 ay sonra Səkinə ilə telefonla danışanda ona dedim ki, ərim bəzi obyektlərini və mənzilini satmaq istəyir. Amma alınmır. Ondan kömək istədim. Səkinə Qəmbər adlı ekstrasensin kömək edəcəyini dedi”.

“Evli və ya subay olduğumu demədim”

Təyminə Abdullayevanın sözlərinə görə, cadunun pozulması üçün 20 min manatı Səkinəyə özü verib: “Amma ekstrasens Qəmbərə özüm pul verməmişəm, Səkinədən çatdırmışam. Səkinə dedi ki, Qəmbər heç kimlə ünsiyyətdə olmur, pulu ver, işin həll olunsun. Mən də pulu ona verdim. Səkinə söz verdi ki, bir aya hər iki iş düzələcək. Amma üç ay keçdi, amma iş düzəlmədi. Bundan sonra pulumu geri istədim. Səkinədən səs çıxmadı”.

Təyminə Abdullayeva əri Barat Abdullayevlə birgə yaşadığı mənzili qanunsuz ələ keçirməkdə də təqsirləndirilir. O, gözəllik salonu almaq üçün evi ərindən xəbərsiz girov qoyması və pul götürməsi məsələsini belə izah edib: “Mən

Səkinənin tanışı olan Eminə ailəli olduğumu, ancaq evin öz adıma olmadığını dedim. Ərimdən xəbərsiz evi girov qoymağın mümkün olmadığını söylədim. Emin bu işi həll etməyə söz verdi. Şərt kimi bildirdi ki, bank xərcləri olacaq. Həmin vaxt şəxsiyyət vəsiqəsini itirdiyim üçün ASAN xidmətə müraciət edərək yeni şəxsiyyət vəsiqəsi aldım. ASAN Xidmətdən şəxsiyyət vəsiqəsi alarkən nə nikah haqqında, nə də boşanmaq haqqında sənəd təqdim etdim. Evli və ya subay olduğumu demədim”.

“Mənə 100 min lazım idi”

Təqsirləndirilən şəxsin sözlərinə görə, şəxsiyyət vəsiqəsi aldıqdan sonra Eminlə əlaqə saxlayıb və “Dəmirçi plaza”da yerləşən “Faktor Lizinq” şirkətinin ofisinə dəvət edib: “Kreditlə bağlı danışdıq. Mənə 110 min manat lazım olduğunu dedim. Emin isə bildirdi ki, 130 min yazdıraq, 20 min də bank xidmətləri tutulacaq. Mənə 100 min lazım idi, Səkinə demişdi ki, 10 min artıq götürüm. Həmin pulu Xəyyama verəcəkdi. Və sonra mənim pulumu qaytaranda geri ödəyəcəkdi. Bu məbləği verərkən lizinq şirkəti bir öhdəçi istədi. Mən də Səkinə ilə əlaqə saxladım. Xəyyam, Səkinə və Eminlə birlikdə 9 saylı notariat kontoruna getdik. Orada Səkinə də, mən də sənədləri imzaladıq. Mən sənədləri oxumadan imzaladım.

Daha sonra lizinq şirkətinin ofisinə qayıtdıq. Mən 110 mini aldım. Yolda pulun 60 minini Səkinəyə verdim, 35 min isə lombarda ödədim. Bu söhbətlərdən 2 aya yaxın vaxt keçdi. Amma Səkinə salonu mənim adıma keçirmədi. Hər dəfə müxtəlif bəhanə gətirərək məni aldatdı. Səkinə lizinq şirkətinə də pul ödəmirdi.

Mənə zəng edib dedilər ki, öhdəçiliyi öz üzərimə götürüm. Əgər pulu ödəməsəm, ev əlimdən çıxa bilər. Mən də 6 min ödədim. Həmin pulu da bacımdan aldım. Öhdəçiliyi öz üzərimə götürəndən sonra Səkinədən borc müqaviləsi bağlamağımızı istədim. Əvvəlcə razılaşdı, sonra telefonları söndürüb yoxa çıxdı. Bu barədə ərimə və qaynıma dedim. Onların məsləhəti ilə polisə müraciət etdim”.

Daha sonra Təyminə Abdullayeva ifadəsində bildirib ki, evdən çıxarkən 3 mülki geyimli şəxs ona yaxınlaşıb: “Məni zorla maşına mindirmək istədilər. Onların polis olduğunu bilmədim. Həmin vaxt huşumu itirib yıxıldım. Onlara müqavimət göstərmədim. Ayılanda isə oğlum və dostlarının həmin şəxslərə mübahisə etdiyini gördüm”.

“Qollarıma xəsarət yetirdi”

Daha sonra zərərçəkmiş polis əməkdaşı Oqtay Məmmədov ifadə verib: “İş yoldaşım Orxan Babayevlə mənə bildirdilər ki, Cinayət Məcəlləsinin 178-ci maddəsi ilə axtarışda olan Təyminə Abdullayevanı saxlamaq əmri verilib. Bölmədə qadın barəsində məcburi gətirilmə haqda qərar vardı. Onun yaşadığı mənzilə getdik, Təyminə Abdullayeva yaxınlaşdıq. Özümüzü təqdim etdik, vəsiqəmizi göstərdik. O, bizimlə getməyəcəyini dedi. Qollarından tutduq. Bacısı və bacısı qızı da üstümüzə hücum çəkdi. Təyminə Abdullayerva dırnaqları ilə qollarıma xəsarət yetirdi. Bacısı Rəna isə Orxana müqavimət göstərdi, onu yumruqla vuraraq xidməti işinə mane oldu”.

Digər zərərçəkmiş Orxan Babayev bildirib ki, hazırda polis sıralarında deyil: “Şəxsi məsələmlə bağlı polis sıralarından çıxmışam. Həmin vaxt bölmədə Təyminə Abdullayevanın məcburi gətirilməsi haqqında rəsmi qərar vardı. Bizə rəis tapşırıq vermişdi, gedib icra etdik”.

Təyminə Abdullayevin vəkili Janna Bağırova məhkəməyə sənəd təqdim edib. 17-ci polis bölməsinin vəkilin sorğusuna verdiyi cavabda Təyminə Abdullayevanın polis bölməsinə məcburi gətirilməsi haqda qərarın olmadığı bildirilir.

Orxan Babayev bildirib ki, həmin sənədi rəis Oqtay Məmmədovun əlində görüb. Polis əməkdaşı vəkillərin suallarının bir çoxuna cavab verə bilməyib.

Məhkəmə prosesi mayın 24-də davam edəcək.

Aslan