30-cu illərin əvvəllərində Sovet hakimiyyətinə qarşı Şəmkirdə baş vermiş "Bitdili İmamı" qiyamının rəhbəri Hacı Axund və ətrafındakı silahdaşlarının qarşılarına qoyduqları məqsəd Azərbaycan Cümhuriyyətinin bərpası və rus işğalına son qoymaq idi. "Hacı Axund" ləqəbli Hacı Əhməd Nuruzadə Azərbaycan Cümhuriyyəti parlamentinin Əhrar fraksiyası mənsubu idi. Şəmkirin Düyərli kəndindən olan Hacı Axund ətrafına mindən artıq döyüşçü toplamışdı. Nüfuzlu din xadimi olaraq girdiyi kəndlərdə əhali onun şərəfinə qurbanlar kəsir və ona dəstək olurdular. Hacı Axund və tərəfdarları əhali arasında təbliğat aparırdı ki, yaxın vaxtlarda türk və ingilis ordusu Azərbaycana gələcək və bizə dəstək olacaq. Bu səbəbdən sovet rejimindən bezmiş əhali onun ətrafında birləşdirdi. Həmçinin bir müddət Tiflis və Gəncə arasında dövlət idarəçilik sistemi və Dəmiryolu xəttinin fəaliyyəti onun tərəfindən iflic edilmişdi. Üsyançılar və onların rəhbəri Hacı Axundla yerli və regional orqanlar bacarmadığıdan 1930-cu ildə Azərbaycan Dövlət Siyasi İdarəsinin sədri Mixail Frinovski özü şəxsən əməliyyata rəhbərlik etmiş və Hacı Axundun fiziki olaraq məhv edilməsinə nail olmuşdu. Hacı Axundun şəhid edilməsindən sonra növbə ilə Quruluqlu Əbdüləli, Məcid Şəkibəyov, Rüstəm Ramazanoglu, Təhməz Ramazanoğlu şəhid edilmiş və onlarla birlikdə Sovet hakimiyyətinə böyük zərbələr vurmuş Samuxlu Məmmədqasım sadəcə sağ-salamat ölkəni tərk edə bilmişdi və bununlada Azərbaycanın barışmaz qaçaq hərakatı tamamilə zəifləmiş və bir müddət sonra bitmişdi.

Cümhuriyyət Siyasi Düşüncə Mərkəzinin rəhbəri Ceyhun Nəbi