Dini təriqət üzvlərinə qarşı qətl törədən kriminal avtoritet Ali Məhkəməyə müraciət edib. “Yeni Sabah”ın məlumatına görə, Cinayət Məcəlləsinin qəsdən adam öldürmə maddəsi ilə 17 il azadlıqdan məhrum edilən Abbasquliyev Hikmət Rzaqulu oğlunun məhkəmə prosesinə hakim Hafiz Nəsibov sədrlik edəcək.

Cinayət işində 4 nəfər- Xudiyev Babək İsa oğlu, Xudiyev Çingiz İsa oğlu, Kərimov Elxan Nazim oğlu və Allahverdiyev Namiq Məhərrəm oğlu zərərçəkmiş qismində tanınıb.

Hadisə 2018-ci il avqustun 9-da Sabunçu rayonunun Ramana qəsəbəsində, məcburi köçkünlərin "Şuşa şəhərciyi"nin ərazisindəki "Naxçıvan" kafesində baş verib. Nəticədə bir nəfər ölüb, bir nəfər isə yaralanıb.

Belə ki, gecə saat 22:00 radələrində naməlum şəxs "Kalaşnikov" markalı avtomatla kafeyə daxil olaraq atəş açıb. Bakı şəhər sakinləri — əvvəllər AR Cinayət Məcəlləsinin 127-ci maddəsi (Qəsdən sağlamlığa az ağır zərər vurma) ilə məhkum olunmuş, 1985-ci il təvəllüdlü Namiq Məhərrəm oğlu Allahverdiyevə və 1984-cü il təvəllüdlü Elxan Kərimova xəsarət yetirib. Nəticədə N.Allahverdiyev ölüb, E.Kərimov isə ağır yaralanaraq 3 saylı şəhər kliniki xəstəxanasına yerləşdirilib.

Cinayətin törədildiyi yerə dərhal Sabunçu Rayon Polis İdarəsinin əməliyyatçıları, həmçinin DİN-in Baş Mütəşəkkil Cinayətkarlıqla Mübarizə İdarəsinin əməkdaşları gəlib, ərazi Daxili Qoşunların bölmələri tərəfindən mühasirəyə alınıb.

Polis və prokurorluq orqanlarının əməkdaşları tərəfindən peşəkarlıqla həyata keçirilən təxirəsalınmaz istintaq hərəkətləri və əməliyyat-axtarış tədbirləri nəticəsində qətlin üstü "isti izlər"lə açılıb. Qətli törətməkdə şübhəli bilinən şəxsin həmin qəsəbə sakini, əvvəllər AR Cinayət Məcəlləsinin 226-cı (Radioaktiv materiallarla qanunsuz davranma), 204-cü (Saxta pul və ya qiymətli kağızlar hazırlama, əldə etmə və ya satma) və 234-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə məhkum olunmuş, 1967-ci il təvəllüdlü Hikmət Rzaqulu oğlu Abbasquliyev olması müəyyən edilib. Şübhəli şəxs görülmüş tədbirlər nəticəsində saxlanıb.

O da məlum olub ki, Abbasquliyev, həmçinin Rusiyada RF Cinayət Məcəlləsinin 105.1 (qəsdən adam öldürmə) maddəsi ilə də həbsdə yatıb və lap yaxınlarda cəzaçəkmə müəssisəsindən çıxıb.

Abbasquliyev ələ keçirilərkən ondan 1 ədəd nömrəsi silinmiş "AKMS" markalı silah, 17 ədəd patron və 1 ədəd patron darağı maddi sübut kimi götürülüb.

Onunla yanaşı, cinayətin digər iştirakçıları da məlum olub. Onlar — 1986-cı il təvəllüdlü Xudiyev Babək İsa oğlu və 1984-cü il təvəllüdlü Xudiyev Çingiz İsa oğlu qardaşlarıdır. Cinayətdə iştirak edən digər şəxslərin isə Qadir və Oqtay adlı qardaşlar olduğu müəyyən edilib.

Cinayət işinə Bakı Ağır Cinayətlər Məhkəməsində baxılıb.

Təqsirləndirilənin hüquqlarını müdafiə edən vəkil deyib ki, bu işdə zərərçəkmiş kimi tanınan Xudiyev qardaşları bütün baş verənlərin günahkarıdır: "Xudiyev qardaşları dini təriqət üzvləridir. Onlar qəsəbədə özlərini qoçu kimi aparırlar. Məlumat da var ki, bir neçə nəfəri zəncirlə döyüblər. Onlar özlərini məhkəmədə də apara bilmədilər. Mənə qarşı da kobudluq etdilər. Müdafiə etdiyim Hikmət həmin qardaşların qanunsuz əməllərindən uzaq durmaq üçün bir müddət Naxçıvana da gedib. Lakin Xudiyev qardaşları ondan əl çəkməyib. Hikmət də özünü və ailəsini müdafiə etmək üçün bunu edib. Çünki həmin şəxslər ona hücum edib. Bacara bilmədiyi üçün onları vurub. Hikmət artıq həbsdən çıxmışdı, islah olunmuşdu. Onun himayəsində bir azyaşlı uşağı var. Xahiş edirəm, məhkəmə bütün bunları nəzərə alsın".

Hikmət Abbasquliyev son sözündə ailəsini qorumaq üçün bunu etdiyini deyib: "Bunlar məni çox sıxdılar. Dedim ki, məndən uzaq durun. Ailə qurmuşdum, onlarla xoşbəxt yaşamaq istəyirdim. Onlara da dedim ki, mən təsərrüfat qurmuşam, ailəmin yanındayam. Amma əl çəkmədilər. Bir dəfə də gəlib sillə vurdular. Yenə də uşağım gözümün qabağına gəldi, Naxçıvana getdim, amma yenə əl çəkmədilər. Sonra da zəng elədilər ki, əgər gəlməsən, evinə gedəcəyik. Bir kişinin namusu, dövləti onun ailəsidir. Mən də düşündüm ki, ailəmi qoruya bilmirəmsə, necə kişiyəm? Mən də ailəmin yanına qayıtdım. Yenə də evimə gəldilər. Onlar mənim üstümə gələndə havaya atəş atdım. Onları öldürmək istəmirdim. Elxana güllə dəyəndə onun yanına getdim. Dedim ki, sənə lazım idi? Özünü də, məni də bədbəxt elədi. O, yaralı idi. Mən istəsəydim, ona bir güllə də vurardım. Namiqin yanına gedəndə ondan qan axdığını gördüm. Oradan uzaqlaşıb yaxınlıqdakı restorana getdim. Oradakılardan təcili yardıma zəng eləmələrini istədim.

Hökmdə göstərilib ki, zərərçəkmiş Çingiz Xudiyevin qanunsuz əməlləri səbəbindən bu hadisə baş verib. Belə ki, onlar bir neçə dəfə Hikmət Abbasquliyevin işlətdiyi kafeyə gələrək ona qarşı qanunsuz tələblər irəli sürüblər. Sonuncu dəfə isə Çingiz Xudiyev azyaşlı oğlu ilə maşında olan zaman ona yaxınlaşaraq görüşə dəvət edib. Gəlməyəcəyi təqdirdə isə onun evinə gedəcəyini deyib. Bundan sonra Hikmət Abbasquliyev uşağını evə qoyduqdan sonra odlu silah götürərək "Naxçıvan" restoranında Çingiz Xudiyev və onun tanışlarının yanına görüşə gəlib. Odlu silahdan atəş açaraq cinayəti törədib.

Gundemxeber.Az