Volqoqrad şəhərinin mərkəzində, onlarla videomüşahidə kameralarının qarşısında amansızcasına qətlə yetirilən 17 yaşlı azərbaycanlı Timur Qavrilovun qatilinin axtarışları davam edir.
Öldürülən gənc Tibb Universitetinin birinci kurs tələbəsi olub. Azərbaycandan Volqoqrada təhsil almağa gedib.

İstintaqın məlumatına görə, hadisə baş verən gün Timur tələbə yoldaşlarının qonağı olub. Gecə saatlarında onlardan ayrılıb və piyada yolla yaşadığı yataqxanaya qayıdıb. Həmin vaxt naməlum şəxs ona qəflətən hücum çəkərək çoxsaylı bıçaq zərbələri endirib. Azərbaycanlı tələbə hadisə yerində keçinib. Qatil ətrafdakı videomüşahidə kameralarına tuş gəlib. Hazırda qatilin şəxsiyyəti müəyyənləşdirilir.

Qatil haqqında hər şey məlumdur. Yaşı təxminən 25, boyu 170-180 santimetrdir, idman cüssəlidir, üzünü qara tibbi maskada gizlədib. Silahsız şəxsə hücum çəkərək ona çoxsaylı zərbələr vurub.

Müstəntiqlər bir neçə versiya üzərində işləyirlər. Amma hələlik heç bir nəticə yoxdur. Məlum olan isə odur ki, hadisə soyğunçuluq məqsədilə törədilməyib. Tərəflər arasında hər hansı bir münaqişənin olması da şübhəlidir. Çünki çoxsaylı şahidlərin, o cümlədən Tibb Universitetinin müəllimlərinin ifadəsinə görə, Timur mülayim, olduqca nizam-intizamlı tələbə olub.

Hazırda müstəntiqlər Volqoqrad ictimaiyyətinin istintaqın gedişinə kömək göstərəcəyinə ümid edir və qatil barədə istənilən xəbəri onlarla bölüşməyə çağırırlar.