​ ​ Yəqin ki, son vaxtlar Azərbaycanda korrupsiyaya və rüşvətxorluğa qarşı həyata keçirilən genişmiqyaslı mübarizə tədbirləri haqda hər kəs məlumatlıdr. Belə ki, cənab Prezidentin ortaya qoyduğu iradənin nəticəsi olaraq, ölkəmizdə bir çox vəzifə sahiblərinin daşıdıqları vəzifələrinin imkanlarından sui-istifadə etmələri, büdcə vəsaitlərini mənimsəmələri, onlara həvalə olunmuş vəzifələrinin öhdəsindən lazımınca gələ bilməmələri, yerli sakinlərə “yuxarıdan aşağı baxmaları” və s. kimi addımlarını atmaları, son anda onların həbsi ilə nəticələndi. Belə bir həssas vaxtlarda KİV nümayəndələrinin də üzərinə böyük yük düşdü və onlar cəmiyyətin informasiya təminatında əsaslı rol oynadılar. Düşündürücü hal odur ki, aidiyyatı dövlət qurumları tərəfindən korrupsiyaya və rüşvətxorluğa qarşı həyata keçirilən genişmiqyaslı mübarizə tədbirləri zamanı, bəzi media qurumlarının əməkdaşları, hətta ayrı-ayrı redaksiyalarla əməkdaşlıq edən bəzi şəxslər, məhz belə bir həssas vaxtlarda ictimaiyyəti çaşdırmaq məqsədilə müəyyən addımlarını atdılar ki, bu da son anda “bumeranq” olaraq özlərinə dəymiş oldu. Məsələn, toxunacağımız mövzu da belə bir olayla bağlı olduğundan, Gundemxeber.Az saytı olaraq bu haqda müəyyən açıqlama hazırlayıb yayımlamağı özümüz üçün borc bildik.Yəni, geniş ictimaiyyətin diqqətinə çatdırmaq istəyirik ki, bir neçə gün bundan öncə özünü Saatlı rayon sakini kimi təqdim edən Arif Dadaşov adlı şəxs, redaksiyamızın facebook səhifəsinə Saatlı Mədəniyyət Mərkəzində, hətta Sabirabad Regional Mədəniyyət İdarəsində guya ki, qol qoyulan çoxsaylı qanunsuzluqların varlığı haqda məlumatları çatdırmışdı. Düzdür, adı çəkilən bu şəxs sadaladıqları faktları elə ardıcıllıqla düzüb qoşaraq redaksiyamızın ünvanına göndərmişdi ki, həmin faktları oxuyub onların həqiqiliyinə heç bir şübhə yerimiz qalmamışdır. Məsələn, Arif Dadaşov göndərdiyi məlumatlarda qeyd etmişdi ki, “Sabirabad Regional Mədəniyyət İdarəsinin rəisi Əhməd Apoş oğlu Ramazanov daşıdığı vəzifəsinə təyin olunduğu ilk gündən klub və mədəniyyət evləri inventar üzünə həsrət qalıb. Son 4 ildə kənd klub və mədəniyyət evlərinə bir vərəq də olsun ağ kağız, adi karandaş verilməyib. Karğüzarlıq ləvazimatlarını almaq məqsədilə ayrılan vəsaitlər Saatlı Mədəniyyət Mərkəzinin direktoru Bəylər Əliyevin vasitəsilə mənimsənilir. Kənd klub və mədəniyyət evlərinin işçiləri hər ay aldıqları əmək haqqının 40 faizini Bəylər Əliyevə verirlər. Verməsələr, o halda Sabirabad Regional Mədəniyyət İdarəsinin rəisi Əhməd Ramazanov, həmin klub və mədəniyyət evlərini bağlayar. Kənd mədəniyyət evi və klubların işçiləri hər ay əmək haqqlarının faizini Bəylər müəllimə vermək üçün, onun qapısının ağzında növbəyə dururlar. Bu şəxs özü üçün bir neçə adı olub, özü olmayan işçi də saxlayır. Məsələn, rayonun Varxankənd kənd klubunun mədəni təşkilatçı vəzifəsində “işləyən” Ağalarova Məharət Mirələkbər qızı 5 ildən artıqdır ki, Sumqayıt şəhərində yaşayır. Ancaq hər gün kənd klubunda, guya, “işdə” olur. M.Ağalarovanın aylıq əmək haqqı Saatlı Mədəniyyət Mərkəzininin direktoru Bəylər Əliyevə çatır. Çünki, əmək haqqı kartı ondadır. Rayonun klub və mədəniyyət evlərində “ölü canlar” coxluq təşkil edir” və s. kimi məlumatları çatdırmışdı.
​ Elə ki, göndərilmiş məlumatları oxuduq və sanki “zərgər üslubu” ilə düzülüb-qoşularaq ''GundemXeber''in facebook səhifəsinə göndərilmiş faktların həqiqiliyinə şübhə yerimiz qalmadı, o halda qeyd olunan məlumatları yayımlamaq qərarına gəldik. Yəni, 01 iyul 2020-ci il tarixdə “Saatlı Mədəniyyət Mərkəzində büdcə vəsaiti necə mənimsənilir?” başlıqlı tənqidi məqalə yayımladıq. Məsələnin maraqlı tərəfi o oldu ki, belə bir başlıq adı altında məqalə yayımladıqdan təqribən iki-üç gün sonra, özünü Saatlı rayon sakini kimi ​ təqdim edən Arif Dadaşov adlı şəxs, bir​ daha redaksiyamızın elektron poçtuna xeyli əlavə faktlar göndərdi. Bu şəxsin növbəti dəfə göndərdiyi faktlarda daha çox Saatlı Mədəniyyət Mərkəzininin direktoru Bəylər Əliyev və Sabirabad Regional Mədəniyyət İdarəsinin rəisi Əhməd​ Ramazanov ittiham olunurdular. Diqqəti cəlb edən hal o oldur ki, Arif Dadaşov göndərdiyi bu məlumatlarda mədəniyyət sahəsinə bağlı olan bir neçə nəfər Saatlı rayon sakinlərinin​ ad və soyadlarını, hətta onlara məxsus mobil telefon nömrələrini də qeyd etmişdi. Yəni, o, yazıb qeyd etmişdir ki, bu şəxslər Sabirabad Regional Mədəniyyət İdarəsi və Saatlı Mədəniyyət Mərkəzi ilə bağlı narazılıq edən və zərəçəkən şikayətçi şəxslərdirlər. Belə bir məlumatları da əldə etdikdən sonra, Gündemxeber.Az saytı olaraq həmin şəxslərlə birbaşa telefon əlaqəsi yaratdıq və Arif Dadaşovun göndərdiyi məlumatlarda onların adlarını hallandırdığını, şikayətçi olub-olmadıqlarını, Sabirabad Regional Mədəniyyət İdarəsində və Saatlı Mədəniyyət Mərkəzində hansısa qanunsuzluqların baş verib-verməməsini və 01 iyul 2020-ci il tarixdə yayımladığımız “Saatlı Mədəniyyət Mərkəzində büdcə vəsaiti necə mənimsənilir?” başlıqlı tənqidi məqalədə sadalanan faktlarla bağlı mövqe bildirmələrini xahiş etdik. O halda həmin şəxslər heç bir halda şikayətçi olmadıqlarını, heç bir qanunsuzluqla üz-üzə qalmadıqlarını, əksinə hər zaman Sabirabad Regional Mədəniyyət İdarəsinin rəisi Əhməd Ramazanovdan, Saatlı Mədəniyyət Mərkəzininin direktoru Bəylər Əliyevdən diqqət və qayğı gördüklərini vurğuladılar. Baş verənləri təhlil edib belə bir qənaətə gəlmək olar ki, özünü Saatlı rayon sakini kimi təqdim edən Arif Dadaşov adlı müəllif, Gundemxeber.Az saytının ünvanına həqiqəti ifadə etməyən belə bir məlumatları göndərməklə, əslində təxribatla məşğul olur və hər iki vəzifə sahibi haqda ictimai fikiri çaşdırmaq istəyinə düşür. Ona görə də, çoxsaylı oxucularımızdan nəzərə almalarını xahiş edirik.

Gundemxeber.Az