Amansızlıqla öldürülən kriminal liderlə təyyarədə bəlkə də elə yaxın adamı vasitəsilə zəhərlənən siyasətçinin başına gələnlərdə günahkar eynidir: suçluların olduğu dünya!

Zəngin hadisələrlə bol olan bir həftəni geridə qoymaqdayıq. Azərbaycanlı kriminal avtoritetin öldürülməsindən tutmuş akademikin nəvəsinin toyuna görə iki nəfərin qandallanması, YAP-ın üzdə olan funksionerinə bəlkə də ilk dəfə ictimailəşən partiya töhməti elan edilməsi, rusiyalı müxalifətçinin təyyarədə zəhərlənməsi olayı, avqust ayında havanın temperaturunun 23 dərəcəyə enməsi, nəhayət qaradaş Türkiyənin Qara dənizdə qaz ehtiyatı tapması həftəyə damğasını vuran hadisələr oldu.
ac
Qulinin öldürülməsi və Rusiyada müxalifətçi Aleksey Navalnın zəhərlənməsi olayını birləşdirən ortaq nöqtələr tapmaq ilk baxışdan çətindir. Çünki Quli suç dünyasının lideri idi, Navalnı isə suçlardan uzaq bir cəmiyyət üğrunda mübarizə aparan siyasətçidir. Hətta yaratdığı antikorrupsiya fondu vasitəsilə illərdir konkret olaraq suçluları tapıb üzə çıxarmaqla məşğuldur. Amma amansızlıqla öldürülən kriminal liderlə təyyarədə bəlkə də elə yaxın adamı vasitəsilə zəhərlənən siyasətçinin başına gələnlərdə günahkar eynidir: suçluların olduğu dünya!
Qulini öldürənlərlə Navalnını zəhərləyənləri nə birləşdirir?

Konkretləşdirsək, Qulinin son olaraq Rusiya paytaxtı ilə danışmasını, Navalnının zəhərlənməsində isə birbaşa Moskvanın əlinin olduğunu da ortaq nöqtə kimi qeyd edə bilərik. Qulinin ölümündə Rusiya kəşfiyyatının(kriminalının da) əli olması barədə iddialar həqiqətdən uzaqdır. Eləcə də Navalnın da Kremlin (Moskvanın) tapşırığı ilə zəhərlənməsi iddiasını hələ gərək faktlarla sübut edəsən. Onun Almaniyada xəstəxanada müalicəsinə razılıq verməsəydilər, bu hadisədə rəsmi Moskvanın (kəşfiyyatın, əks-kəşfiyyatın və sairə) əli olmadığını demək olardı. Ona görə Navalnın Almaniyaya aparılmasından iki mühüm nəticəyə gəlmək olar.

Birincisi) Navalnını öldürmək istəməyiblər və bu, Belarusdakı hadisələrdən xeyli ruhlanmış Rusiya müxalifətinə sərt xəbərdarlıqdır. İkincisi) Navalnın bundan sonra ölkəyə qayıtması və mübarizə aparması rəsmi Moskvaya bəlkə də yazadək vaxt qazandıracaq. Üstəlik, bu qayıdışdan sonra müxalifətə “Qərbin sifarişini yerinə yetirmək” ittihamları yapışdırmaq daha asan olacaq. Hələ ki, pandemiyadan iqtisadiyyatı xeyli təntimiş Kremlə üzü payıza bir az rahat nəfəs almaq üçün zaman gərəkirdi ki, onu Navalnın zərərsizləşdirilməsi hesabına qazandılar. Əlbəttə ki, müvəqqəti…

MEA prezidenti Ramiz Mehdiyevin nəvəsinin xeyir işinə görə iki qudanın 15 sutkalıq müvəqqəti təcridxanaya salınmaları da həftənin hadisələri sırasında özünə yer etdi. Deyim ki, pandemiya qandalı da hörmətdən saldı. Qabaq hər tutulanın əlinə qandal vurmazdılar. İndi 15 sutkalıq inzibati həbsə gedənləri qandallayıb aparmaları bu məsələyə istər-istəməz siyasi don geyindirdi.

Bakıda ümumiyyətlə, toyların olmadığını deyənlərə, guya yalnız imkanlı adamların evlənə bildiyi haqda sentemental hekayələrə inanmayın. Məhərrəmlik başlayanadək(avqustun 21-i) Bakıda hər gün, əlbəttə ki, əvvəlki təm-təraqdan, səs-küydən çox uzaq olan toylar keçirilirdi. Ramiz Mehdiyevin nəvəsinin toyu lap bağlarında olubsa, bunun əvvəldən ədəb-ərkanla qarşısını almaq da olardı. Gedib toy yiyəsinə deyərdilər ki, bax toya hazırlıq olduğunu bilirik, bunu etməyin. Yoxsa, indi bu cür həbsli cəza kimliyindən asılı olmayaraq, bəyənilən iş deyil.

Toy haqda yazılan sərlövhələr adamda qəribə hiss yaradır. Jurnalistlər təftişçidirlər, hadisəyə öz baxışları ilə təqdimatı cəmiyyət üçün maraqlıdır. Onlar Mehdiyev haqda indi yazmırlar. Siyasət adamlarının isə bir karantini pozan toyu bu qədər qanadlı-bəzəkli sözlərlə “dramatikləşdirmələri” adama səmimi görünmür. Ailənin ağsaqqalı kimi Ramiz müəllim gərək, belə etməyəydi. Amma edib, bəli, tutduğu indiki mövqeyə, uzun illər dövlət aparatında işlədiyinə görə yanlış edib, hətta lap 100 qat cərimənin də yeri var. Hökumətin əlbəttə ki, öz sərt üzünün göstərmək haqqı var. Amma unutmayaq ki, toy evinə qanqaraçılıq salmaq da azərbaycanlı mentalitetində bəyənilən iş deyil. Kasıbın balası kimi, varlının da balası evlənməlidir. Pandemiyaya qədər adamın ürəyini bulandıran toylarda da dediyim kimi, əsas olan gənclərin evlənməsidir. Qalanı təfərrüatdır…

Türkiyə prezidenti Rəcəb Tayyib Ərdoğanın anonsunu verdiyi və yalnız müsəlmanların mübarək cümə günündə təfərratını açıqladığı Qara dənizdə qaz yatağı kəşfi qan-qadalı həftənin sevindirici hadisəsi hesab oluna bilər. Avqustun 22-də prezident İlham Əliyevin bu münasibətlə Ərdoğana zəngi bu hadisənin əhəmiyyətini göstərdi. Prezident Əliyev Türkiyənin Qara dənizdə böyük təbii qaz yatağı kəşf etməsi münasibətilə təbriklərini çatdırıb, bu önəmli hadisənin dost və qardaş Türkiyə xalqının rifah halının daha da yaxşılaşdırılması və ölkənin iqtisadi gücünün daha da möhkəmləndirilməsi işinə xidmət edəcəyinə əmin olduğunu bildirib. Prezident haqlı olaraq qeyd edib ki, Azərbaycan Türkiyənin uğurlarına öz uğurları kimi sevinir.

Türkiyənin dünyada artan çəkisi əlbəttə ki, bu qaz yatağının işlənməsi ilə daha da artacağına ümid edirik. Ümid edirik ki, Türkiyə Qara dənizdə qaz ehtiyatlarının istismarında Azərbaycanın da təcrübəsindən, köməyindən istifadə edəcək. Bu isə regionda iki qardaş ölkənin əməkdaşlığını daha da möhkəmləndirəcək.

Havanın işinə isə qarışmayaq, Allah bilən məsləhətdir…/musavat.com