Ölkədə yeni idarəetmə sisteminə keçilir. Bunu ölkədə aparılan dərinləşmiş struktur və kadr islahatlarından da açıq şəkildə görmək mümkündür.

Bu müddət ərzində bir çox sahələrə rəhbərlik edən köhnə, 15-25 ilin nazirləri istefaya göndərildi, onların yerinə gənc kadrlar vəzifəyə gətirildi. Vəzifədə uzun müddət işləmiş nazirlərin cəmiyyətdə oliqarx imici yaranmışdı. Bu da hərtərəfli inkişafa mane olan əsas səbəblərdən birinə çevrilmişdi.

Ölkədə Sovetdən qalma idarətmə sistemi tətbiq olunurdu. Amma görünən odur ki, Sovetdən qalma idarəetmə sisteminin sonu gəlir.

Bəs, yeni idarəetmə fəlsəfəsi özündə nəyi ehtiva edir?

“Atlas” Araşdırmalar Mərkəzinin rəhbəri, politoloq Elxan Şahinoğlu Cebhe.info-ya açıqlamasında deyib ki, kommunist dövründə formalaşmış nomenklaturadan gərək cəmiyyət canını qurtarsın:

“Bu, kommunist nomenklatura həm “5-ci kolon” rolunu oynayıb, həm də korrupsiyanın başında dayanıb. Azərbaycanın müstəqilliyinə ən böyük zərbəni məhz kommunist təfəkkürlü, köhnə sistemli adamlar vurub. İdaretəmədə, çox təəssüf ki, parlamentdə yer alıblar. Gördük ki, bunun da sonu nəyə gətirib çıxardı. Özlərini qanundan və sadə vətəndaşdan üstün tutdular. Bunun ən böyük nümayəndəsi olan Ramiz Mehdiyev hələ də siyasi elitaya və cəmiyyətə müqavimət göstərir. Halbuki qanunları ciddi şəkildə pozub. Düşünürəm ki, onun artıq Azərbaycan Milli Elmlər Akademiyasının (AMEA) rəhbəri vəzifəsində qalması da düzgün deyil”.

Elxan Şahinoğlu əlavə edib ki, Ramiz Mehdiyevlə bağlı məsələ həll olunduqdan sonra nomenklatura ilə işi bitirmək lazımdır:

“Onları idarəetmə və qanunverici orqandan təmizləmək lazımdır. Çünki onlar hər zaman bizim inkişafa mane olacaqlar. Yeni sistem isə o demək deyil ki, təkcə gənclər bu işə cəlb olunmalıdır. Yeni təfəkkürlü, yeni idarəetmə bacarığı olan, korrupsiyaya bulaşmamış, insanların problemlərini həll edə biləcək fiqurlar tapılmalı və irəli sürülməlidir. Bunun üçün isə düşünürəm ki, bir beyin bankı da yaradımalıdır və həmin şəxslər müəyyənləşdirilməli, bu istiqamətdə irəli çəkilməlidir. Bu proses artıq başlayıb və bunu daha da genişləndirmək lazımdır. Amma təəssüf ki, hələ də həm idarəetmədə, həm də qanunverici orqanda kommunist təfəkkürlü insanlar var. Onlardan canımızı qurtarmalıyıq. Çünki onlar yenə də korrupsiya əməlləri ilə məşğuldurlar, ölkənin köhnə sistemlə idarə olunmasına çalışırlar, xüsusi böyük villalarda yaşayırlar. Bütün bunlar isə cəmiyyətə çox pis təsir edir. Cəmiyyətdə belə bir fikir formalaşır ki, qanunlar yalnız sadə vətəndaşlar üçündür, lüks villaları olan, korrupsiyaya bulaşan, uşaqları bahala yerlərdə dincələn, millyonlarla dollarlıq saat gəzdirənlə aid deyil. Ona görə də bu prosesi sürətləndirmək lazımdır ki, canımız bu cür təfəkkürlü insanlardan qurtulsun”.

Gundemxeber.Az