Həbsdə olan Müsavat Partiyasının funksioneri Tofiq Yaqublu aclıq aksiyasını davam etdirir. Artıq aksiyanın 15-cü günüdür. Çoxları T.Yaqublunun səhhətindən narahatlığını ifadə etsə də, bu aclıq aksiyasından istifadə etməyə, dividentlər götürməyə çalışan qüvvələr də formalaşıb.

Bu qrupların önündə AXCP sədri Əli Kərimli və onun tərəfdarları gedir. Ə.Kərimliyə yaxınlığı ilə seçilən, onu tez-tez Amerikadan internet üzərindən yayımladığı canlı verilişlərinə çıxaran jurnalist Sevinc Osmanqızının bu məsələni hər gün müxtəlif istiqamətlərə yönəltməsi bir çox mətləblərdən xəbər verir.

Bu qüvvələrin davranışları, fikirləri açıq göstərir ki, onlar T.Yaqublunun aclığı dayandırmasını istəmirlər. Bir növ onun həyatı üzərindən siyasi oyunlar quraraq, hakimiyyətin üzərinə gedirlər. Təsadüfi deyil ki, T.Yaqublunu xahiş edib çalışdığı xəstəxanaya - "City Hosbital"a gətirən Adil Qeybulla bu qüvvələrin əsas ittiham hədəfinə çevrilib. Həkim barəsində elə müdhiş iddialar irəli sürürlər ki, hər kəs şoka düşür. Məsələn, onlar belə görüntü yaratmağa çalışırlar ki, A.Qeybulla hakimiyyətin sifarişi ilə müraciət hazırlayıb və bunun əsasında Müsavat funksionerini xəstəxanaya gətirib ki, komaya salsın. Görünən odur ki, T.Yaqublunun həyatı üzərindən oyunlar oynayıb dividentlər qazanmağa çalışanlar bu “şansı” onların əllərindən A.Qeybullanın aldığını görüb, bütün yollara əl atırlar ki, ona zərbə vursunlar...

Bütün bunlardan çıxış edərək demək olar ki, bu insanlar aksiya sonunda ölüm olmasını belə bəlkə də arzulayırlar. Çünki bundan istifadə edib, aylarla kampaniya apara bilərlər, danışmağa sözləri olar, hakimiyyətin üzərinə getməyə şansları yaranar...

AĞ Partiya başqanı Tural Abbaslı həm hakimiyyətdə, həm də müxalifətdə T.Yaqublunun məsələsinin gərginləşməsini istəyən qüvvələrin olduğunu söylədi: “Tez bir zamanda iqtidar bu problemi həll etməsə, bunun həm iqtidara, həm də dövlətçiliyə müxtəlif fəsadları ola bilər. İndiki məqamda isə gərginlik heç kimin marağında olmamalıdır. Biz AĞ Partiya olaraq Tofiq Yaqublunun mülki xəstəxanaya köçürülməsini və ona Adil Qeybulla kimi öz ailəsinin etimad etdiyi, peşəkar həkimin nəzarət etməsinə şərait yaradılmasını pozitiv addım kimi qiymətləndiririk”.

ADP sədri Sərdar Cəlaloğlu sərt danışdı: “İnsan həyatı üzərindən siyasət qurmaq mənəviyyatsızlıqdır. Çünki siyasətin hədəfi insanı xoşbəxt etməkdir. Əgər bir siyasət insanın bədbəxtliyinə səbəb olursa, o, mənəviyyatsız və əxlaqsız siyasətdir. Kim Tofiq Yaqublunun həyatı üzərində oyun oynamaq istəyir, onun başına bir iş gələr, beynəlxalq ictimaiyyət Azərbaycana təzyiq edər filan kimi düşüncələrə sahibdirsə, o əxlaqsız bir adamdır, siyasi cəhətdən də ziyanlıdır. Tofiq Yaqublunun özünəqəsd məqsədilə aclıq aksiyası keçirməsini qətiyyən düzgün hesab etmirəm. Azərbaycan ictimaiyyəti bu məsələdə öz sözünü deməlidir. İlk növbədə Prezident bu məsələyə təcili müdaxilə etməlidir. Çünki Tofiq Yaqubluya ölüm cəzası verməyiblər. Qeyri-qanuni olaraq 4 il üç ay hökm oxuyublar. Buna etiraz olaraq, o şəxs özünə ölüm cəzası seçib. Cəza ilə əməl arasında bir uyğunluq olmalıdır. Bu cəzanı verən hakimlər və prokuror haqqında ən sərt cəzanın verilməsini tələb edirəm. Təcili şəkildə Tofiq Yaqublu azadlığa buraxılmalıdır. Bu məsələ təkcə Azərbaycandakı siyasi qüvvələrin əlində alət deyil, həm də xaricdəki qüvvələrin, ölkəmizə düşmən olan qrupların əlində alətə çevrilə bilər”.

ALDP rəhbəri Fuad Əliyev: “Çox təəssüf ki, illər boyu kiminsə ölümündən, siyasi məhbuslardan, kimlərinsə həbslərindən siyasi divident qazananlar olub. Mən də onun tərəfdarıyam ki, qanunsuz həbs olunanların hüquqlarını müdafiə etməliyik, həbsdə olanlara dəstək verməliyik. Amma ölüm aclığı aksiyasını keçirən kim olursa-olsun, şəxsən mən heç vaxt dəstək verə bilmərəm. Əksinə, onu bu yoldan çəkindirərəm. Amma bunlar əksinə, onu bu yoldan çəkindirmək əvəzinə, daha da vəziyyəti gərginləşdirirlər. Bunların əsas məqsədi anti-Azərbaycan təbliğatı aparmaqdır. Xaricdə məskunlaşan, milli hisslərini itirənlərin çoxundan istifadə etməklə dövlət və dövlətçiliyimizə qarşı çıxışlar edirlər. Belə fəaliyyət istiqaməti Azərbaycana, xalqa xəyanət deməkdir. Bunlar istəyirlər ki, Tofiq Yaqubluya nəsə olsun, məsuliyyətin birbaşa dövlət başçısının üzərinə düşdüyünü bar-bar bağırsınlar. Bunlara Tofiq Yaqublunun sağ qalması yox, ölümü lazımdır. Ona görə lazımdır ki, bundan ”şou" düzəltsinlər. Fürsətdən istifadə edib, Tofiq Yaqublunun ailə üzvləinə müraciət edirəm ki, onu bu ölüm aclığı aksiyasından çəkindirsinlər. Onun həbsi qeyri-qanunidir. İnanıram ki, yaxın zamanda Tofiq Yaqubluya verilən qərar dəyişəcək və o, azadlıqda olacaq".

T.Yaqublunun son durumu ilə də maraqlandıq. Onun vəkili Elçin Sadıqov “Yeni Müsavat”a bunları dedi: “Sonuncu dəfə onunla sentyabrın 14-də görüşdüm. Səhhəti yaxşı deyildi. Xahiş etdim ki, səhhətini nəzərə alaraq aksiyanı dayandırsın. Amma o, aksiyanı davam etdirməkdə israrlı olduğunu söylədi. Aclığı sona qədər davam etdirəcəyini bildirdi. Vəziyyəti getdikcə təbii olaraq pisləşir. Gözlənilir ki, apelyasiya şikayəti bugünlərdə göndərilsin. Biz şikayəti çoxdan vermişik. Amma məhkəmə bildirir ki, ayın 17-də göndərəcəklər”./“Yeni Müsavat”/