Vətən bizi dizlərində biz vətəni qəlbimizdə böyüdürük. Qəlbimizdə kök atan vətən sevgisi ruhumuzla qol - budaq atır. Qan ilə dövr edir vətən sevgisi. Qəhrəmanların keçdiyi döyüş yolu örnək götürülüb gələcək nəsillərə ötürülür.

      Nəcəfovlar ailəsi bu vətənə əsil vətəndaş olmağı çox gözəl bacarıblar. Hətta deyərdim ki, bu ailənin hərbçilərinin sayı nə bir deyil nə də beş. Ailənin ilk hərbçisi Məhəmməd Nəcəfov olub. O hələ Azərbaycanda ordu qurulmadan öncə  vətəni müdafiə edən dəstəyə könüllü olaraq qoşulmuşdu. Məhəmmədin qardaşı Vaqif Nəcəfov da qardaşının yolu ilə gedib. Vaqif 1990-cı illərdə 7 il könüllü olaraq vətəni müdafiə edib. Kiçik qardaş Əli Nəcəfov da qardaşları kimi vətən keşiyini çəkib Ağdamda sona qədər mübarizə aparanlardan olmuşdu. Ancaq hamıya məlum olan səbəblərdən Qarabağdakı münaqişə Qarabağın işğalı ilə sonlanmışdı. Ancaq bu son bir başlanğıcın təməli idi.



       Üç qardaşı ilə birlikdə vətən keşiyin çəkən Məhəmməd Novruzovun ocağında vətənə layiq üç oğul övladı böyüyürdü. Ailənin ilk övladları olan İsmayıl və İbrahim əkiz idilər. Üçüncü və son beşik isə beş il sonra 2000-ci ildə ailəyə sevinc gətirən Yaqub Nəcəfov idi. Müəllim olan Məhəmməd atanın və müəllimə olan  Xuraman ananın yetişdirdiyi bu üç uşaq hər zaman vətən sevgisinin aliliyini hiss etmiş və hiss etdirmişdilər. Əkiz qardaşlar 2001-ci ildə Culfa şəhər 1 N - li tam orta məktəbdə təhsil almağa başlamışdılar. Yaqub isə 2006-cı ildə elə həmin məktəbə 1-ci sinifə qədəm qoymuşdu. Hər üç qardaş hərbçi peşəsinə yiyələnmək üçün müvafiq addımlar atmışdı.
       Nəcəfov Yaqub Məhəmməd oğlu 2014-cü ildə VIII sinifi bitirdikdən sonra Heydər Əliyev adına Ali Hərbi liseyə daxil olub, 2017-ci ildə bitirib. Elə həmin il Bakı şəhər Heydər Əliyev adına Ali Hərbi məktəbə qəbul olub. 2020-ci ildə həmin məktəbin lV kurs kursantı idi.
     Ovuc-ovuc duaların yerdən göyə ucaldığı, zərrə-zərrə ümidlərdən bütün xalqın güc aldığı 44 günlük Vətən müharibəsində Nəcəfovlar ailəsinin 3 övladı da müxtəlif istiqamətlərdə düşməni lərzəyə gətirirdilər. Nəcəfov İsmayıl Ağdərə, Suqovuşan istiqamətində qəhrəmancasına vuruşmuş və qazanılan zəfərdə payı olmuşdu. O, həmin döyüşdə kontuziya almağına və bədəninin bir hissəsinin yanmağına baxmayaraq qismən sağaldıqdan sonra yenidən xidmətini davam etdirmişdi. Prezident İlham Əliyevin sərəncamı ilə "Vətən müharibəsi iştirakçısı" və "Hərbi xidmətdə fərqlənməyə görə" III dərəcəli medalı ilə təltif edilib. Hal-hazırda baş - leytenant Nəcəfov İsmayıl xidmətini davam etdirir.
     Əkiz qardaşlardan digəri Nəcəfov İbrahim də Vətən müharibəsində ön cəbhədə vuruşmuş və azadlıq uğrunda sağlamlığından keçən qəhrəmanlardan biri olmuşdu. Ağdamda gedən döyüşlər zamanı ağır yaralanan İbrahim 7 əməliyyat keçirsə də hələ də bədənində 23 qəlpə yarası ilə yaşayır. Bir gözü tamamilə görmə qabiliyyətini itirən qazimizin digər gözü isə 20% görür. Hazırda müalicəsi davam edir. Vətən müharibəsi qəhrəmanı baş - leytenant Nəcəfov İbrahim göstərdiyi şücaətlərə görə ölkə başçısının sərəncamı ilə "Cəsur döyüşçü", "Vətən müharibəsi iştirakçısı", "Ağdamın azad edilməsinə görə" medalları ilə təltif edilib.



      Qəhrəmanları ilə seçilən ailənin son beşik övladı Yaqub Nəcəfov ailəyə "Şəhid ailəsi" statusunu gətirən qəhrəman oldu. 20 yaşlı qəhrəmanın göstərdiyi şücaət onun nə qədər cəsur, əzmkar olduğunun bariz nümunəsidir. 44 günlük müharibədə sona qədər mübarizə aparan, demək olar ki, bütün döyüşlərdə iz qoyan, azad olunan rayonlarda şanlı bayrağımızın sancılmasında müstəsna xidməti olan İbrahim Zəfər gününün də sevincini yaşayıb. Füzulinin, Cəbrayılın, Zəngilanın, azad olunmasında, "keçilməz sədd" adlanan Laçın dəhlizinin alınmasında və nəhayət alınması ilə ermənilərin ümidinin nöqtələndiyi Şuşanın azad olunmasında sona qədər mübarizə aparıb. Şuşa azad olunandan sonra "Artıq Şuşanı azad etmişik" deyə Şuşa dağlarına səslənib. Atasının, əmilərinin və özünün ən böyük arzusunu reallaşdıran Yaqub 9 noyabr 2020 - ci ildə müvafiq Bəyənnamə imzalandıqdan sonra erməni xəyanətinin qurbanı olub. Sonuncu nəfəsini uşaqlıqdan adını duyub, həsrətini çəkdiyi Şuşanın sinəsinə qondurub şəhadət zirvəsinə ucalıb.
     Noyabrın 9-da şəhid olan leytenant Nəcəfov Yaqub Məhəmməd oğlu noyabrın 19-da Culfa şəhər Şəhidlər xiyabanında torpağa tapşırılıb.
     Qəhrəmanlığı dildən-dilə düşən qəhrəman Ali Baş Komandan İlham Əliyevin sərəncamı ilə "Vətən uğrunda", "Şuşanın azad olunmasına görə", "Cəsur döyüşçü" medalları ilə təltif edilib.
     Bir evin üç Vətən müharibəsi qəhrəmanı var. Bir şəhid, bir canlı şəhid, bir də şahid. Bir evdən çıxıb bütün elin qəhrəmanına çevrilən İsmayıl, İbrahim və Yaqub qardaşları "Üç qəhrəman qardaş" kimi tarixdə və ürəklərdə silinməz iz qoydular.