Ən yüksək hədəflər üçün "Neftçi"dəyik.

Samir Abbasov

“Neftçi”nin sükanı arxasına keçən Samir Abbasov yuxarıdakı ifadə ilə çox böyük vəd versə də, ötən ölkə çempionatında “Qarabağ”ın vacib xallar itirməsi və hakimlərin müstəsna “kömək”likləri sayəsində çempionluqdan başqa heç bir yüksək hədəfi fəth edə bilmədi. “Neftçi”nin avrokuboklarda fiaskolu çıxışı sübut etdi ki, ölkənin ən qocaman klubunun rəhbərliyi və baş məşqçisi yalnız boğazdan yuxarı populist vədləri ilə “pəhləvanlığ”ı bacarır. 

25 ildən çoxdur avrokuboklarda çıxış edən, 2008-ci ildə “İntertoto kuboku”nda iki mərhələ keçən, UEFA Avropa Liqasının (AL) 2012-2013-cü illər mövsümünün qrupunda oynamaqla müasir Azərbaycan futbolu tarixində ilkə imza atan “Neftçi” nə qədər enişli yollardan keçsə də, avrokuboklarda keçirdiyi son 4 oyundakı nəticələri kimi rüsvayçılığı  olmamışdı. 

Necə olur ki, 10 il bundan əvvəl AL-nın qrup mərhələsində oynayan klub daha da inkişaf etmək əvəzinə ildırım sürəti ilə deqradasiyaya məruz qaldı?! 

2013-cü ildən bu yana “Neftçi” avrokuboklarda ən yaxşı halda iki mərhələ keçə bilib. Qarşılarında “Çin səddi”nə çevrilən komandaların əksəriyyəti əslində keçiləsi rəqiblər olub, hətta adından qorxduğumuz “Olimpiakos”da. Yunanıstan nəhənginə hər iki oyunda minimum hesablarla uduzan ağ-qaralar, Finlandiya “HİK”i, İsrailin “Makkabi Hayfa”sı ilə oyunlarda darmadağın olundu. Ümumilikdə ölkə çempionatındakı oyunlarını da nəzərə alsaq, ağ-qaralar son 10 oyunda qapısından 19 top buraxıb. Hansı ki, ötən ölkə çempionatının dörd dövrəsində 25 top buraxmışdı. Bu statistika onu göstərir ki, komandanın müdafiə xətti iflic vəziyyətindədir. Ümumilikdə isə klub batmaqda olan gəmini xatırladır. Belə bir ifadə var: “Batmaqda olan gəmini ən birinci siçanlar tərk edər”. Burulğana düşən Neftçi donanmasını isə ən birinci aparıcı oyunçusu Namiq Ələskərov tərk etdi, özü də qalmaqalla. Klubla müqaviləsi olan futbolçu heç kimin xəbəri olmadan başqa klublarla danışıqlar aparır, günlərin bir günü isə bəlli olur ki, “Neftçi”yə məxsus futbolçu artıq başqa klubun oyunçusudur. "Xala, xətrin qalmasın" deyə, şəxsi hesabından da köhnə klubuna 50 min avro "şirinlik" göndərir ki, məsələni şişirtməyin. Ən əsası nə baş məşqçinin, nə də aidiyyatı digər şəxslərin bu komediyadan xəbərləri yoxdur. "Fil qulağında yatan" Samir Abbasov "Makkabi Hayfa" ilə oyundakı fiaskodan sonra yuxudan oyanaraq, “heyətimiz yetərli olmadığı üçün avrokuboklarda mübarizəni dayandırdıq” deməsi ilə futbol ictimaiyyəti və azarkeşlər arasında ikraha səbəb olur. Görəsən, “çempionluq” eyforiyasına düşən Samir Abbasov, klubun seleksiyaçı məşqçiləri,  prezidenti Kamran Quliyev avrokuboklara hazırlıq ərəfəsində nə işlə məşğul idilər?! Heyətin avrokuboklarda yetərli olması üçün lazımi futbolçular niyə cəlb olunmadı?! Baş məşqçi niyə komandanın oyununu kollektiv üzərində yox, fərdi futbolçular üzərində formalaşdırmışdı?! Bütün bu sualları vaxtında həll etməyən aidiyyatı şəxslər ölkənin ən qocaman klubunu yaşıl meydanlarda rüsvay edəndə, düşmən ermənilərin çempionu “Alaşkert” tarix yazdı. Özü də tarixi yazan əsas fiqur klubun baş məşqçisi Aleksandr Qriqoryandır. O Aleksandr Qriqoryan ki, onun Samir Abbasovdan fərqli olaraq uğurlu futbolçu karyerası olmayıb. O, artıq 20 yaşında qarşısına peşəkar baş məşqçi olmağı hədəf qoyur. Onun baş məşqçi karyerası daha çox Rusiya futbolu, əsas da qadın futbolu ilə bağlıdır. Ən böyük uğurları da məhz Şimal qonşumuzun qadın futbol klubları ilə qazanıb. Beləki, A.Qriqoryanın rəhbərlik etdiyi “Lada” qadın klubu dörd dəfə Rusiya Kubokunu qazanır, bir dəfə Rusiya çempionu olur. Ardınca digər qadın klubu “Zvezda 2005”lə ölkə daxilində bütün titulları qazanmaqla yanaşı, komandasını 2009-cu ildə qadınlar arasındakı UEFA ÇL-ın finalçısı da etməyi bacarır. Qadın futbolunda uğurlar qazandıqdan sonra bir çox Rusiya klublarının, o cümlədən "Anji", "Tambov" kimi klubların sükanı arxasında olur. İkinci klub məhz onun sayəsində Rusiya Premyer Liqasına vəsiqə qazanır. A.Qriqoryan Rusiya futbolunda (həm kişi, həm də qadın) kifayət qədər uğurlar əldə etdikdən sonra özünü vətəni Ermənistanda sınamaq qərarına gəlir. 2019-2021-ci illərdə "Urartu" klubunun sükanı arxasına keçir, lakin uğur qazanmayaraq istefa verir. 2020-2021-ci il mövsümünün sonuna səkkiz gün qalmış “Alaşkert” klubuna keçir və komandanı çempion edir. Onun bu uğuru Ermənistanın bütün idman mətbuatında “8 günə çempionluq qazanan baş məşqçi” başlıqlı yazılarla ölkə gündəmini zəbt edir. Ardınca ÇL-nın I mərhələsində Uelsin “Konas” klubunu məğlub edir. II mərhələdə “Şerif”lə bacarmayaraq AL-ya yuvarlanır. Burda özündən qat-qat güclü Qazaxıstan “Kayrat”ını məğlub edərək pley-off mərhələsinə keçməklə, Şotlandiyanın ən titullu, 150 yaşlı “Reyncers” klubuna rəqib olur.  Çoxları düşünürdü ki, Stiven Cerrardın rəhbərlik etdiyi “Reyncers” erməniləri darmadağın edərək məsələni ilk oyunda həll edəcək və A.Qriqoryanı rüsvaycasına Ermənistana yola salacaq. Lakin gözlənilənlərin əksinə olaraq  A.Qriqoryanın komandası şotlandlara son dərəcə ciddi müqavimət göstərdilər. Yekunda Qlazqo təmsilçisi çətinliklə 1-0 hesabı ilə matçı başa vurdu. Ermənistandakı cavab oyununda “Alaşkert” daha güclü pressinq tətbiq edərək  alınmaz qalaya çevrilir. Hətta 50 dəqiqədən çox 10 nəfərlə oynayan A.Qriqoryanın komandasına "Reyncers" nə qol vura, nə də qalib gələ bilir. Nəticədə matç qolsuz heç-heçə ilə bitir. “Alaşkert”in AL macərası bitsə də, Konfrans Liqasının (KL) qrupuna vəsiqəni təmin etməklə, avrokubokların qrup mərhələsinə düşən ilk Ermənistan klubu kimi tarix yazır. 

Xüsusi olaraq vurğulayım ki, “Alaşkert” klubu yarandığı gündən (1990-cı ildən) onun sükanı arxasında ancaq erməni məşqçilər dayanıb ki, nəticəsi də göz önündədir. Sovet dövrünü nəzərə almasaq, 1992-ci ildən bu yana "Neftçi"də yerli-əcnəbi kimlər gəldi, kimlər getdi, amma ağ-qaralılar zirvələri fəth edə bilmədi. “Neftçi”nin CL-dan guppultu ilə Azərbaycan Premyer Liqasına yuvarlanmasında əsas pay sahiblərindən ən birincisi olan Samir Abbasov olub keçənlərə bu cür şərh verir:

“Heyətimiz yetərli olmadığı üçün avrokuboklarda mübarizəni dayandırdıq. "Neftçi" avrokuboklarda oynamaq üçün hazır deyil”.

Bu ifadəsi ilə Samir Abbasov da “Neftçi”nin tarixində uğursuz və səmərəsiz baş məşqçilər halqasına qoşulmuş oldu.  

Populistliklə önə çıxan, amma bir kibrit çöpü kimi tez sönən, ağ-qaraların baş məşqçisindən fərqli olaraq, düşmən ölkənin futbol klubunun baş məşqçisi A.Qriqoryan müsahibələrinin birində vurğulayır: 

“Futbol üzrə hegemonluğunun olub-olmamasından asılı olmayaraq istənilən ölkədə ciddi klub yaratmaq olar” 

Düşmən ölkənin futbol klubunun baş məşqçisinin dedikləri ilə əməlləri göz önündədir. 

Beləliklə, 26 avqust 2021-ci il təqvimi futbol tarixində özünəməxsus iz qoydu. Acından ölən, UEFA reytinqində 43-cü pillədə qərarlaşan Ermənistanın “Alaşkert”, eləcə də futbol ölkəsi olmayan Estoniyanın “Flora” (UEFA reytinqqində 50-ci), Cəbəllütariqin həvəskarlardan ibarət “Linkoln Red İmps” ( UEFA reytinqində 52-ci) kimi klubları KL qrupuna vəsiqə qazandıqları halda, 84 illik tarixə, sponsor gücünə, infrastruktura, bazaya sahib və dovlətin neft fondundan milyonlarla maliyyəsi olan "Neftçi" rüsvaycasına ofsaydda qaldı.

Abdulla İsmayıloğlu