Paytaxtın Suraxanı rayonundakı 282 saylı orta məktəbdə bıçaqla dolaşan 7-ci sinif şagirdinin hərəkətləri həmin məktəbdə dərs prosesinin pozulmasına, valideynlərin hiddətinə səbəb olub. Gundemxeber.Az virtualaz.org-a istinadla xəbər verir ki, valideynlərin bildirdiyinə görə həmin uşaq məktəbə bıçaq gətirir, sinif yoldaşlarına hədə-qorxu gəlir, dərs prosesini pozur, sinifdə şalvarını çıxararaq qızları təhqir edir. Valideynlər uşağın məktəbdən çıxarılmasını tələb etsələr də, məktəblinin anası buna qarşı çıxıb. Üstəlik məktəbə hücum çəkərək müəllimləri və digər uşaqların valideynlərini təhdid edib.

“Ana da hamını hədələyir, polisə müraciət olunur, anası məktəbə hücum çəkir, polisi də söyüb təhqir edir”, - valideynlərdən biri yazıb.

O da bildirilib ki, həmin uşaq məktəbə çətin tərbiyə olunan uşaqlar üçün müəssisədən gəlib. Məktəblinin qardaşı da bir müddət əvvəl müəssisədə həmyaşıdları ilə dalaşıb. Məsələyə müdaxilə edərək azyaşlını vuran direktor işdən çıxarılıb: “Həmin uşaq oğurluq edib, hazırda iş polis tərəfindən araşdırılır. Yəni ailə problemli ailədir”.

Daxili İşlər Nazirliyinin Mətbuat Xidmətinin şöbə rəisi, polis mayoru Elşad Hacıyev bildirib ki, paytaxtın Suraxanı rayonunda 282 saylı məktəbdə şagirdin neqativ hərəkətləri ilə bağlı sosial şəbəkələrdə yayılan iddiaların yoxlanılması məqsədilə araşdırmalar gedir. Hazırda rayon polisinin rəhbər vəzifəli şəxsləri məktəbədir. Tərəflərdən polisə daxil olan qarşılıqlı şikayətlərin təfərrüatı yerində yoxlanılır. Neqativ hala rəvac verən halın aradan qaldırılması istiqamətində müvafiq tədbirlərin görülməsi təmin olunacaq.

Məktəbdən virtualaz.org-a bildiriblər ki, məktəbin 7 ç sinif şagirdi (müvafiq səbəblərə görə şagirdin adı qeyd olunmur) sığınacaqdan qəbul edilən və 2 saylı uşaq evində məskunlaşmış şagirddir. Şagird tədris prosesi zamanı özünü çox aqressiv aparır, sinif yoldaşlarını və müəllimlərini nalayiq sözlərlə təhqir edir. O, sinif yoldaşlarına tədris prosesi zamanı müxtəlif xəsarətlər yetirir, nizam-intizam qaydalarına riayət etmir, dərs prosesini pozur. Sinif rəhbəri və müəllimlər şagirdi intizama dəvət etdiyi zaman o, əsəbləşərək müəllimlərə də xəsarət yetirir.

Şagirdin anası da psixoloji cəhətdən qüsurludur. Dekabrın 6-sı saat təxminən 10:00 radələrində valideyn əvvəlki vaxtlarda olduğu kimi övladının təhsil aldığı sinfə daxil olub və müəllimi şantaj etmək məqsədilə çəkiliş aparmağa cəhd edib. Məktəb tərəfindən hüquq-mühafizə orqanlarına dərhal məlumat verilib.

Məktəb rəhbərliyinin bütün cəhdlərinə baxmayaraq heç bir nəticə əldə olunmayıb. Belə psixoloji problemi olan şagirdin adi sinifdə təhsil alması olduqca təhlükəlidir. Valideynin də psixoloji problemlərinin olması vəziyyəti daha da gərginləşdirir.

Bakı şəhəri üzrə Təhsil İdarəsindən isə deyiblər ki, Paytaxtdakı 282 nömrəli tam orta məktəbin şagirdi ilə bağlı Bakı Şəhəri üzrə Təhsil İdarəsi tərəfindən müvafiq araşdırma aparılır. İdarədə əmin edirlər ki, təhsil müəssisələrində tədrisin normal təşkili, uşaqların təhlükəsizliyinin təmin olunması, həmçinin müəllim-şagird münasibətləri hər zaman diqqət mərkəzində saxlanılır. “Uşaqların psixoloji dayanıqlığının artırılması və məktəb-valideyn əməkdaşlığının inkişafı məqsədilə müvafiq tədbirlər həyata keçirilir, davamlı olaraq zəruri maarifləndirmə işləri görülür”,-idarədən belə deyiblər.

Lakin bu “müvafiq tədbirlərin və zəruri maarifləndirmə işlərinin” yetərsiz qalmasının, yaxud ümumiyyətlə effektiv olmamasının nəticəsidir ki, Suraxanı rayonunun digər məktəblərindən də bənzər xəbərlər eşidilir. Valideyinlər deyirlər ki, xüsusən yuxarı sinif şagirdləri arasında kriminal subkulturaya meyl edənlər, məktəbdə bıçaqla dolaşanlar, özlərini “vor zakon” cildində görənlər artıb. O cümlədən məktəblərdə “patı” satıldığı haqda da xəbərlər gəlir.

GundemXeber.Az