Biz ailədə iki qardaşıq, Elvin məndən dörd yaş kiçik idi. 2017-ci ildən isə artıq Silahlı Qüvvlərimizin sırasında leytenant kimi xidmətə başladı. Ağcabədi rayonunda işləyirdi, artıq baş-leytenant idi. İxtisası isə tank komandiri idi”. GUNDEMXEBER.AZ xəbər verir ki, bunu Moderator.az-a açıqlamasında Vətən müharibəsində şəhid olan baş leytenant Elvin Nəsrəddin oğlu Əlimovun qardaşı İlkin Əlimov deyib. İlkin qardaşının Cəbrayıl istiqamətində gedən döyüşlərdə şəhid olduğunu bildirib:

“Mənim atam da birinci Qarabağ savaşının iştirakçısıdır. Bizim şimal bölgəsində hərb sənətinə maraq çoxdur. Kəndimizdə ordumuzda işləyən çox dost, tanış var. Bu bizim qanımızda var. Əmim oğlu da ordumuzda zabitdir. Miliyyətcə ləzgiyik. Amma Azərbaycan hamımızın vətənidir”.

“Elvinin tağımı Cəbrayılın Rüzgar kəndinə qədər gedib...”

“Elvin döyüşdə olanda atamla və əmim oğluyla danışırdı. Sonuncu dəfə isə anamla danışıb. Elvinin tağımı Cəbrayılın Rüzgar kəndinə qədər gedib çatıb. Müharibə başlayan günü onlar 50-60 kilometr dərinliyə gedib. Elə olub ki, tankları vurulub və onlar istəyib ki, tankı təmir edib döyüşə davam etsinlər. Amma ardıyca güclü artilleriya atəşinə məruz qalıblar. Həmin zaman Elvin də şəhid olub. Sentyabrın 28-də şəhid oldu və bir gün sonra isə Elvinin nəşini gətirdilər. Şəhid xəbərini də bizə hərbçi yoldaşları dedi. Biz Suraxanı rayonunun Hövsan qəsəbəsində yaşayırıq. Əslən Qusarın Köhnə Xudat Qazmalar kəndindənik, amma ailəmiz Bakıya köçüb və burda böyümüşük”.

“Ona görə həmişə mənə deyirdi ki, şəhid olsam...”

“Elvin elə bilirdi ki, evlənəcək, övladı olacaq və sonra müharibə başlayacaq. Ona görə həmişə mənə deyirdi ki, şəhid olsam, oğluma baxarsan. Elvin sözlü idi, sevdiyi qız var idi.

Bu gün doğum günüylə bağlı haqqında yazılan kitabın təqdimatı oldu. Suraxanı İcra Hakimiyyəti ötən il Şəhid bulağı tikdi. İndi sadəcə “Azərbaycan Bayrağı” ordeni verilməyib, gecikdirilir. Valideynlərim bununla bağlı hərbi hissəyə də getdi. Orden veriləndən sonra adına küçə və məktəb verilə bilər”.
Qeyd edək ki, Elvin Əlimov ölümündən sonra “Vətən uğrunda”, “İgidliyə görə”, “Füzulinin azad olunmasına görə” və “Cəbrayılın azad olunmasına görə” medallarıyla təltif edilib.

GUNDEMXEBER.AZ