Vətəndaş aldığı geyimi qaytarmaq istəsə də, problemlə üzləşib. 

Gundemxeber.az bildirir ki, bu barədə vətəndaş Oxu.Az-ın redaksiyasına müraciət ünvanlayıb. 

Vətəndaş bildirib ki, “Nərimanov” metro stansiyasının yanında “Banu” qadın geyimləri mağazasından 18 iyun tarixində 230 AZN məbləğində üst geyimi alıb:

“İyunun 19-da aldığım paltarlardan 80 AZN məbləğində birini geri qaytarmaq istəsəm də, işçilər qəbul etmədilər. Satıcı dedi ki, biz bu günə kimi heç vaxt alınan malı geri qaytarmamışıq. Haraya istəsəniz, müraciət edə bilərsiniz”.

Məsələ barədə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etdik. 

Qurumdan Oxu.Az-ın sorğusuna cavab olaraq bildirilib ki, daxil olan müraciətə qanunamüvafiq qaydada baxılır:

“Bildiririk ki, lazımi keyfiyyətli qeyri-ərzaq malı öz formasına, ölçüsünə, fasonuna, rənginə görə istehlakçıya yaramırsa və ya digər səbəblərə görə təyinatı üzrə istifadə oluna bilmirsə, istehlakçının malı dəyişdirmək hüququ var.

İstehlakçı həmin malı istifadə etmədikdə və onun əmtəə görünüşünü pozmamaqla, istehlak xassələrini, plombunu, yarlığını, həmçinin kassa qəbzini və ya ona mal ilə birlikdə verilən digər sənədləri təqdim etməklə malın alınma günü sayılmamaq şərti ilə, 14 gün ərzində lazımi keyfiyyətli mala dəyişmək hüququna malikdir.

Malı dəyişdirmə anında satışda uyğun mal yoxdursa, istehlakçı dəyəri yenidən hesablamaqla istənilən başqa bir malı ala və ya qaytarılan malın dəyəri məbləğində pulu geri götürə, yaxud da satışa uyğun mal gələn kimi onu dəyişdirə bilər”.

“Azərbaycan Respublikası İnzibati Xətalar Məcəlləsinin 444-cü maddəsinə əsasən, satılmış malların dəyişdirilməsi və ya geri qaytarılması qaydalarının pozulmasına görə təsərrüfat subyektlərinə altı yüz manatdan doqquz yüz manatadək məbləğdə cərimə tətbiq edilə bilər.

Qeyd edək ki, Azərbaycan Respublikası Nazirlər Kabinetinin 21 may 1998-ci il tarixli 114 nömrəli “Azərbaycan Respublikası ərazisində pərakəndə ticarət obyektlərində dəyişdirilməli olmayan malların siyahısı haqqında” Qərarı ilə təsdiq edilən siyahıya (Geyim əşyaları həmin siyahıya daxil edilməyib) daxil olan malların dəyişdirilməsi və qaytarılması mümkünsüzdür”, - deyə qeyd edilib. 

Gundemxeber.az