Müsavat Partiyası sədrinin müşaviri Əlikram Xurşudov həbs edilib.

Gundemxeber.az "Unikal"a istinadla xəbər verir ki, sosial şəbəkələrdə onun iyulun 20-də Nazirlər Kabinetinin qarşısında keçirilmiş aksiyaya görə həbs edildiyi iddia olunub. Qeyd edilib ki, Ə.Xurşudov siyasi baxışlarına görə və aksiyada quru sərhədlərin bağlı qalmasına etiraz etdiyi üçün həbs edilib.

DİN-in Mətbuat Xidmətinin bölmə rəisi Zeyni Hüseynov “Qafqazinfo”ya bildirib ki, iddialar həqiqəti əks etdirmir:

Əlikram Xurşudov dünən Səbail rayonunda ictimai qaydanı pozduğu üçün polis əməkdaşları tərəfindən intizama dəvət olunub. Lakin o, buna məhəl qoymayaraq öz hərəkətlərini davam etdirib. Polisin qanuni tələbinə tabe olmayaraq müqavimət göstərib. Buna görə də Əlikram Xurşudov barəsində inzibati protokol tərtib olunaraq Səbail Rayon Məhkəməsinə göndərilib. Məhkəmənin qərarı ilə o, 30 sutka inzibati həbs edilib.

Bir daha qeyd edirik ki, Əlikram Xurşudovun həbsinin onun siyasi baxışları və 20 iyuldakı aksiya ilə heç bir bağlılığı yoxdur”.

Xatırladaq ki, Müsavat Partiyasının sədri Arif Hacılıdır. Ə.Xurşudov iyulun 20-dəki aksiya zamanı ərazidən uzaqlaşdırılmışdı.

Gundemxeber.az