“İşgəncələr Əleyhinə Araşdırmalar Mərkəzi” Azərbaycan Respublikasının Prezidenti İlham Əliyev cənablarına müraciət etdi.

Müraciətdə deyilir:

"Hörmətli cənab prezident!

“İşgəncələr Əleyhinə Araşdırmalar Mərkəzi” insan hüquqları təşkilatı olaraq hal-hazırda həbsdə olan Vətəndaş və İnkişaf Partiyasının sədri Əli Əliyevlə bağlı Sizə müraciət etmək qərarına gəlmişik.

Cənab prezident!

Vətəndaş və İnkişaf Partiyasının sədri Əli Əliyev 2022-ci ilin 13 yanvar tarixində Yasamal Rayon Məhkəməsində hakim Hüseyn Səfərovun çıxartdığı hökmə əsasən 5 ay, 15 aprel tarixində eyni məhkəmədə hakim Rauf Daşdəmirov tərəfindən verilən hökmlə 1 ay, eyni məhkəmədə 7 iyun tarixində hakim Rəşad Cavadzadənin hökmü ilə 6 ay müddətinə azadlıqdan məhrum edilib. Yasamal rayon Məhkəməsində qısa müddətdə çıxarılan hər 3 hökm Cinayət Məcəlləsinin 147 və 148-ci maddələrinə əsasən çıxarılıb.

 Cənab Prezident!

 VİP sədri Əli Əliyevin Cinayət Məcəlləsinin 147-148-ci maddələrilə həbs olunması, barəsində eyni məhkəmə tərəfindən qısa müddət ərzində 3 hökmün çıxarılması onu göstərir ki, Əli Əliyevin həbsində qərəz var və o səsləndirdiyi sözə, fikrə görə qurama ittihamla həbs olunub, bu da ifadə azadlığının kobud surətdə pozulmasıdır. Əli Əliyev ona qarşı əsassız olaraq çıxarılmış 3-cü məhkəmə hökmündən apellyasiya şikayəti verib və həmin şikayətə 9 avqust saat 11:10-da Apellyasiya Məhkəməsində hakim Faiq Qasımovun sədrliyi ilə baxılacaqdır. 

Mərkəz olaraq qeyd edirik ki, Partiya sədrinin səsləndirdiyi sözə-fikrə görə həbs olunması ölkəmiz üçün baş ucalığı gətirmir və beynəlxalq ictimaiyyət tərəfindən də kəskin etirazla qarşılanır, ifadə azadlığının kobud surətdə pozulması kimi dəyərləndirilir. 

Vətəndaş və İnkişaf Partiyasının sədri Əli Əliyevin şikayətinə  9 avqust saat 11:10-da Apellyasiya Məhkəməsində baxılacaqdır. Apellyasiya şikayətinə ədalətli və obyektiv baxılması Əli Əliyevin qarşıdan gələn 19 avqust da 55 illik yubileyini azadlıqda keçirməsinə və siyasi fəaliyyətinin azadlıqda davam etdirməsinə gətirib çıxara bilər.

Cənab Prezident!

Yuxarıda qeyd olunanları nəzərə alaraq, Mərkəz olaraq Sizdən, VİP sədri Əli Əliyevin Apellyasiya Məhkəməsində 9 avqust saat 11:10-da keçiriləcək məhkəmə prosesini diqqətdə saxlamağınızı xahiş edirik."

Gundemxeber.Az