Son illərdə dövlət rəhbərliyi tərəfindən ardıcıl və sistemli şəkildə aparılan məqsədyönlü və düşünülmüş islahatlar, atılan bütün addımlar haqlı olaraq Azərbaycanın “ikinci paytaxtı” hesab olunan Gəncə şəhərində də də hər bir sahədə böyük uğurların əldə olunmasına, iqtisadiyyatın dinamik surətdə inkişafına, insanların rifahının günü-gündən yaxşılaşmasına, sabitliyin möhkəmlənməsinə, yoxsulluğun azaldılmasına, işsizliyin aradan qaldırılmasına xidmət etmişdir.

Gəncə Şəhər İcra Hakimiyyətinin (ŞİH) başçısı çox hörmətli cənab Niyazi Bayramovun rəhbərliyi altında Gəncə şəhərində sosial və iqtisadi planda çox mühüm işlər görülür. Pandemiyanın və Vətən müharibəsinin sınaqlarına baxmayaraq, ötən iki-üç ildə şəhərin makroiqtisadi göstəriciləri qənaətbəxş olub, əhalinin məşğulluğunun təmini istiqamətində tədbirlər mütəmadi davam etdirilib, ərazidə abadlıq-quruculuq işləri qaydasında gedib, infrastruktur layihələri gerçəkləşdirilib.

Öz fəaliyyətini vətəndaşların hüquq və azadlıqlarının, qanuni mənafelərinin müdafiəsi, müvafiq ərazinin əhalisinin rifahını yaxşılaşdırmaq naminə iqtisadiyyatın, sosial və mədəni sahələrin inkişafının təmin edilməsi, qanunçuluq, aşkarlıq və ictimai rəyin nəzərə alınması prinsipləri əsasında quran Gəncə şəhər  İcra Hakimiyyəti rayonun sosial-iqtisadi inkişafının monitorinqini və qiymətləndirilməsini həyata keçirir, ərazidə sənaye potensialının inkişafı sahəsində dövlət siyasətinin həyata keçirilməsində iştirak edir; yerli sosial-iqtisadi inkişaf proqramlarının hazırlanmasını təşkil edir, şəhərin sosial-iqtisadi və mədəni inkişafını təmin etmək məqsədi ilə ayrılan büdcə və digər maliyyə vəsaitinin təyinatı üzrə səmərəli istifadə olunmasına nəzarət edir, ərazidə hüquqi və fiziki şəxslər tərəfindən sərmayə qoyuluşu üçün şərait yaradır, sosial və istehsal infrastruktur obyektlərinin tikintisini və təmirini gerçəkləşdirir.

Düşərli təyinat

Gəncəlilər birmənalı bu qənaətdədirlər ki, möhtərəm Prezident İlham Əliyevin Sərəncamı ilə N.Bayramovun Gəncə ŞİH-nin başçısı vəzifəsinə təyin edilməsi Gəncə üçün düşərli olub. Bu təyinatdan ötən müddət ərzində şəhərdə bir çox yeniliklər baş verib. İlk dəfə olaraq Bakı-Gəncə sürət qatarı işə düşüb, habelə, Gəncə Avtomobil Zavodu İstehsalat Birliyində “E-321” markalı elektrobus və “PALESSE KZS-575” markalı taxılyığan kombayn konveyerdən çıxıb. Cəfər Cabbarlı adına Gəncə Dövlət Dram Teatrının yeni binası, dünya standartlarına çavab verən İdman sarayı tikilib.

Əsas əlamətdar hadisələrdən biri Gəncənin 2019-cu ilin Avropa İdman Şəhəri seçilməsi olub. Gəncə bir sıra festivallara ev sahibliyi edib. Belə ki, “Bölgələrdən-bölgələrə” yaradıcılıq festivalının ilk ünvanı məhz qədim Nizami yurdu olub, “IMAGINE Avro” tolerantlıq festivalı çərçivəsində fransız fotoqrafı Nikolas Landemardın fotosərgisi nümayiş edilib.

N.Bayramovun fəaliyyəti dövründə Gəncə ilə xarici ölkələrin bir sıra şəhərləri arasında ikitərəfli əməkdaşlıq və dostluq əlaqələri yaranıb.

Ötən ili gəncəlilər üçün əlamətdar edən əsas hadisələrdən biri də möhtərəm cənab Prezident İlham Əliyevin müvafiq Sərəncamı ilə 2021-ci ilin Azərbaycanda "Nizami Gəncəvi İli" elan edilməsi oldu. Bu Sərəncam şəhər ziyalıları və ictimaiyyəti tərəfindən xüsusi rəğbətlə qarşılandı. Dahi mütəfəkkir Nizami Gəncəvinin 880 illik yubileyi münasibətilə Gəncə bir sıra yerli və beynəxalq tədbirlərə ev sahibliyi etdi. Bu tədbirlərdə şəhərin sakinlərinin, xüsusilə aktiv gənclərinin yaxından iştirak etməsi olduqca təqdirəlayiq idi.

Bu ilin maraqlı tədbirlərindən biri II Milli Yaylaq Festivalı oldu. Festival 29-31 iyul tarixlərində Gəncədən 22 kilometr məsafədə, Hacıkənd qəsəbəsinə yaxın ərazidə yerləşən əsrarəngiz Xan yaylağında keçirildi. Ərazidə yaşayış yurdları (alaçıqlar), Cıdır Meydanı, "Yaylaq (k/t) bazarı", "Sənətkarlıq güşəsi", "Dədə Qorqud ocağı" (tamaşalar üçün səhnə), "Yaylaq yatağı" (k/t heyvanları üçün yerlər), "Pəhləvan meydanı" (yarış sahəsi), "Aşıq Ələsgər ocağı", "Yaylaq süfrəsi" (yaylaq kulinariyası) və digər müxtəlif mövzulu sahələr quruldu. Gəncə şəhər və Göygöl rayon icra hakimiyyətləri II Milli Yaylaq Festivalının rəsmi tərəfdaşları kimi hazırlıq işlərinə böyük dəstək verdilər.

Gəncədə vətəndaşların mövcud problemlərinin həllini sürətləndirmək məqsədilə səyyar qəbullar davam etdirilir

Gəncə ŞİH-nin başçısı N.Bayramov sakinlərlə səyyar görüşləri davam etdirir. Azərbaycan Respublikasının Prezidenti İlham Əliyevin tapşırıq və tövsiyələrinə uyğun olaraq keçirilən səyyar görüşlər zamanı sakinləri narahat edən məsələlər yerində araşdırırlır. 

Torpaqlarımızın 30 illik işğaldan qurtulması ilə nəticələnən Vətən müharibəsində canlarını fəda etmiş şəhidlərimizin ailələri, qazilər, onların qayğı və problemləri şəhər rəhbərliyinin diqqət mərkəzindədir. Şəhidlik zirvəsinə ucalan qəhrəman Vətən oğullarının ailələri Gəncə ŞİH-nin başçısı N.Bayramov tərəfindən mütəmadi olaraq ziyarət olunur.

Belə görüşlərdə Prezident, Ali Baş Komandan İlham Əliyevin müdrik siyasəti sayəsində xalqımızın Vətən müharibəsində qazandığı qələbədən danışılır, bu qələbə sayəsində 30 illik Vətən həsrətinə son qoyulduğu qeyd olunur. Cənab N.Bayramov 44 günlük Vətən müharibəsində düşmən üzərində qazanılan tarixi Qələbəyə görə şəhidlərə borclu olduğumuzu, onlarla daim qürur duyduğumuzu xüsusi vurğulayır. Ölkəmizdə şəhid və qazi ailələrinə böyük diqqət və qayğı göstərildiyini, bunun dövlət siyasətinin tərkib hissəsi olduğunu qeyd edən icra başçısı Gəncə şəhərində bu qayğının daimi olaraq davam etdiriləcəyini diqqətə çatdırır.

Görüşlərdə iştirak edən sakinlərin və həssas kateqoriyadan olan şəxslərin müraciətləri tək-tək dinlənilir. Müraciətlərin əsasını şəhid adının əbədiləşdirilməsi, mənzil uçotuna götürülmə, maddi yardımın göstərilməsi, fərdi yaşayış evinin təmiri, dərman preparatlarının verilməsi və digər məsələlər təşkil edir. 

Səsləndirilən müraciətlərin bir çoxu yerindəcə öz həllini tapır, digərlərinin araşdırılaraq qanunamüvafiq formada həlli üçün adiyyətı üzrə tapşırıqlar verilir.

Sakinlər, o cümlədən şəhid ailələri, qazilər əhalinin problemlərinin həll edilməsi məqsədilə yerlərdə həyata keçirilən tədbirlərə, göstərilən yüksək diqqət və qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə edirlər.

Şəhər təsərrüfatı saat mexanizmi kimi işləyir

Şəhərdə yolların bərpasına xüsusi diqqət yetirilir. Əsasən şəhərin avtomobil yollarının tikintisi, yenidən qurulması və əsaslı təmiri işləriaparılır, küçələrdə köhnə işıq dirəkləri yenisi ilə əvəz edilir. Həmçinin, əhalinin mənzil şəraitinin yaxşılaşdırılması və abadlıq-quruculuq işlərinin davam etdirilməsi ilə yanaşı, 3, 4 və 5 mərtəbəli çoxmənzilli binaların dam örtüyünün təmiri işləri sürətlə davam etdirilir, bu günə qədər ayrılmış vəsait hesabına çoxmənzilli binanın dam örtükləri təmir edilib, binalarda istismara yararsız liftlər yenisi ilə əvəz edilir. Şəhərdə genişmiqyaslı abadlıq-quruculuq işləri ilə yanaşı piyadaların və avtomobillərin təhlükəsiz hərəkətini təmin etmək məqsədilə yol-nəqliyyat infrastrukturunun yenilənməsi istiqamətində müəyyən işlər icra olunur.

Hər gün ərzində şəhərin müxtəlif ərazilərində mütəmadi olaraq təmizlik və abadlıq işləri aparılır. Belə ki,  yaşıllıqlara xüsusi qulluq göstərilir, ağac və gül kolları əkilir, işıq dirəkləri yuyulur və rənglənir, istifadə müddəti bitmiş lampalar yeniləri ilə əvəz olunur, çoxmənzilli yaşayış binalarının fasadları təmir edilir, dayanacaq və köşklər yuyulur, ünvan lövhələri yenilənir. Eyni zamanda, şəhərdə mütəmadi olaraq qanunsuz tikintilərə qarşı reydlər keçirilir. Bir sözlə, şəhər təsərrüfatı saat mexanizmi kimi işləyir.

“Yaşıl şəhər” layihəsi uğurla həyata keçirilir

Avropa Yenidənqurma və İnkişaf Bankının Gəncədə həyata keçirdiyi "Yaşıl şəhər" layihəsi uğurla həyata keçirilir. Gəncə Şəhər İcra Hakimiyyətinin başçısı N.Bayramov Avropa Yenidənqurma və İnkişaf Bankının nümayəndə heyəti ilə görüşür, layihəsi ətrafında müzakirələr aparır.

Xatırladaq ki, 2020-ci ildə Gəncə Azərbaycanın ilk şəhəri olaraq "Yaşıl şəhər" layihəsinə qoşulub. N.Bayramov Gəncə sakinləri üçün önəmli hadisə olan bu layihənin həyata keçirilməsiə öz dəstəyini əsirgəməir. Ümidvarıq ki, "Yaşıl Şəhər" layihəsi Gəncə şəhərinə ən aktual ekoloji problemləri və iqlim dəyişikliyi risklərini müəyyən etmək və prioritetləşdirməkdə kömək edəcək. Qeyd edək ki, layihə üç mərhələdən ibarətdir: Bunlar bərk məişət tullantılarının idarə edilməsi, şəhərin küçə işıqlandırma sisteminin və ictimai nəqliyyatın yenilənməsi. İlkin mərhələdə Gəncənin məişət tullantıları poliqonunun ətrafının hasarlanmasının və  yaşıllıq zolaqlarının salınmasının nəzərdə tutulub.

Şəhər rəhbəri gəncəli gənclərin böyük dostudur

Cənab N.Bayramov hələ daha əvvəl Mingəçevirdə rəhbər vəzifədə işlədiyi dönəmdə də gənclərin yaxın dostu kimi tanınmışdır. Niyazi müəllim eyni istiqanlı münasibəti indi gəncəli gənclərlə saxlayır. 

Bu ilin aprel ayında "İslahatçı Gənclər" İctimai Birliyinin üzvləri "Dini radikalizm və ekstemizmə qarşı mübarizədə gənclərin rolunun artırılması" layihəsi çərçivəsində Gəncə şəhərinə səfərləri çərçivəsində şəhər rəhbəri ilə görüşüblər. Görüşdə Gəncə Şəhər İcra Hakimiyyətinin başçısı Niyazi Bayramov,  başçının birinci müavini Səməd Tomuyev, başçının müavini Adil Tağıyev, Gəncə Şəhər Gənclər və İdman Baş İdarəsinin rəisi Həmid Nəsirov, "İslahatçı Gənclər" İctimai Birliyinin sədri Fərid Şahbazov, Birliyin sədr müavini, "http://Azxeber.com" Media Qrupunun rəhbəri Hacıbəy Heydərli, tanınmış politoloq Əhməd Şahidov iştirak ediblər. Səmimi söhbət şəraitində keçən görüşdə Niyazi Bayramov Prezident İlham Əliyevin rəhbərliyi ilə ölkədə aparılan gənclər siyasətindən, onlara göstərilən diqqət və qayğıdan bəhs edib. O qeyd edib ki, Prezident İlham Əliyevin gənclər siyasətinin mərkəzində bir əsas xətt dayanır ki, bu da Azərbaycan gənclərinin Vətənə sədaqət ruhunda tərbiyə edilməsidir. Sonra "İslahatçı Gənclər" İctimai Birliyi tərəfindən Gəncə Şəhər İcra Hakimiyyətinin başçısı Niyazi Bayramov gənclərin təşəbbüsünün dəstəklənməsinə və dövlət gənclər siyasətinin uğurla icrasına verdiyi dəstəyə görə, "Gənclərin Dostu" Milli Mükafatı Fəxri Diplomu ilə təltif edilib. Bu dəyərləndirmə bir qədirşünaslıq nümunəsi kimi gəncəli gənclər tərəfindən çox müsbət qarşılanmışdır.

Kiçik və orta sahibkarlığın inkişafına dəstək verilir

Ölkədə sahibkarlığın inkişafı ilə bağlı aparılan işlər - biznes mühitinin təkmilləşdirilməsi, maliyyə mənbələrinə, o cümlədən altenativ maliyyələşmə mənbələrinə çıxışın təmin edilməsi, biznes xidmətlərinin genişləndirilməsi, sahibkarlar arasında təmasların təşkil edilməsi böyük iqtisadi potensiala malik Gəncə-Daşkəsən iqtisadi regionunda da iş adamlarının fəaliyyətinə stimul verib.

Gəncədə tarixən sahibkarlıq ənənəsi olub. Hətta sovet dövrü də şəhərdə sahibkarlığın təzahürləri özünü göstərib. İndi həmin ənənə müasir dövrün tələblərinə uyğun surətdə davam etdirilir.

Gəncədə Kiçik və Orta Biznesin İnkişafı Agentliyinin (KOBİA) dəstəyi istehsal və emal sahəsində fəaliyyət göstərən sahibkarlıq subyektləri ilə görüşlər keçirilir. Belə tədbirlərin məqsədi sahibkarların dövlətin dəstək mexanizmləri, KOBİA və sahibkarlara dəstək göstərən digər qurumların fəaliyyəti və göstərdikləri xidmətlər barədə məlumatlandırmaq, onlar arasında əməkdaşlığı təşviq etməkdir. Görüşlərdə sahibkarları maraqlandıran suallar cavablandırılır, müxtəlif fəaliyyət sahələri üzrə bir sıra təkliflər səsləndirilir. Yerli sahibkarlar KOBİA-nın dəstəyi ilə “Sahibkar Klubu” yaradıblar.

Vaxtaşırı keçirilən “KOB Fest” sərgi-satış yarmarkalarında Gəncə şəhərinin və ətraf rayonların KOB subyektləri tərəfindən istehsal edilən qida və qeyri-qida məhsulları, eləcə də sənətkarların, yaradıcı şəxslərin əl işləri nümayiş olunur və satışı həyata keçirilir. “KOB Fest” çərçivəsində həmçinin, bölgədə fəaliyyət göstərən KOB-ların xidmətləri təqdim olunur, sahibkarlar arasında əməkdaşlığın genişləndirilməsi üçün ikitərəfli görüşlər keçirilir, biznes xidmətlər göstərilir, mədəni-əyləncəli proqramlar təşkil edilir. Məqsəd Gəncə və ətraf rayonların KOB subyektləri tərəfindən istehsal olunan məhsulların satışına dəstək olmaq, yerli məhsulların tanıdılması, eləcə də istehsalçılar və təchizatçılar arasında əlaqələrin genişləndirilməsidir.

Ötən ilin sonunda yaradılmış Gəncə İş Adamları İctimai Birliyi də məqsədi Gəncə şəhərində fəaliyyət göstərən sahibkarları vahid bir platforma ətrafında birləşdirmək, həm ölkə daxilində, həm xaricdəki Gəncəli iş adamlarını doğma şəhərlərinə də investisiya yatırmağa cəlb etməkdir. Digər tərəfdən sahibkarlara dəstək olmaq, onların biznes üçün yaradılan imkanlara çıxışına nail olmaqdır. Qeyd edək ki, adı çəkilən İctimai Birlik Azərbaycan Sahibkarlar Konfederasiyasının regional biznes-forumlarında birgə fəaliyyət göstərmək barədə razılıq əldə edib.

Gəncə Şəhər İcra Hakimiyyəti, şəxsən Niyazi müəllim bu proseslərə dəstək verir, hər cür köməyə hazır olduğunu bildirir.

***

Gəncə şəhər İcra Hakimiyyətinin başçısı cənab Niyazi Bayramova rayonun tərəqqipərvər vətəndaşları bacarıqlı rəhbər kadr kimi inanır, hörmət bəsləyirlər. Ona işi düşən, qəbulunda heç kəs naümid qayıtmır. 

Niyazi müəllimin işlədiyi vəzifələr onu deyil, o, tutduğu vəzifələri hörmətə mindirib. Əminik ki, “ikinci paytaxtın birinci adamı” olmağın məsuliyyətinin altına çiyinlərini vermiş Niyazi müəllimin düşərli rəhbərliyi altında Gəncənin əmək kollektivləri və sakinləri qəbul edilmiş Dövlət Proqramlarında müəyyən olunmuş  iqtisadi inkişaf hədəflərinin təmin olunması, nəzərdə tutulmuş bütün işlərin vaxtında və keyfiyyətlə yerinə yetirilməsi, qazanılmış uğurların daha da artırılması üçün əzmlə çalışacaq, şəhərin inkişaf etdirilməsi və abadlaşdırılması naminə  üzərlərinə düşən vəzifələri bundan sonra da məsuliyyətlə yerinə yetirəcəklər.

Şirin CƏFƏRİ