Dünən Azərbaycan Bütövlük Platformasının “Türk Birliyi: Reallıqlar və perspektivlər” mövzusunda elmi konfransı keçirilib.

Gundemxeber.az xəbər verir ki, tədbiri Azərbaycan Bütövlük Platformasının sədri Bəhram İsmayılov açaraq mövzu haqda qısa məlumat verib.

İlk məruzə ilə istiqlalçı millət vəkili, VHP və DAK sədri Sabir Rüstəmxanlı çıxış edərək Türk Birliyinin tarixi kökləri, zaman-zaman bu birliyə qarşı aparılan işlər və bu günkü durum haqda danışıb.

S.Rüstəmxanlı Altaylardan Anadoluyadək böyük bir coğrafiyada ortaq mədəniyyətə və ortaq dilə malik bir millətin Birliyinin dünyanın barış içində yaşamasının vacibliyini bildirib: “Bu gün dünyanın geopolitik diqtəsi daha sərt, bizim imkanlarımız isə daha genişdir. Artıq dünyaya “ Bir millət, iki dövlət ” yerinə “Türk birliyi!” ideasını həyata keçirmək zamanıdır. Bu Azərbaycanın siyasi qüvvələrinin və bütün Azərbaycan xalqının istəyidir”

Daha sonra çıxış edən Prof. tarixçi alim Nəsib Nəsibli Türk tarixinə geniş ekskurs edərək dünyanın siyasi xəritəsində türk dövlətlərinin yer almasının xüsusi tarixi fürsət olduğunu qeyd etdi. Nəsib bəy Türk Birliyinin baş tutmamasının tarixi-siyasi səbəblərini, bu birliyə qarşı böyük güclərin fəaliyyətini təhlil etdi: “Türk Birliyi artıq zamanın tələbidir və bu birlik 7 türk dövlətinin beynəlxalq təhlükəsizliyi üçün vacib şərtdir”.

Daha sonra DAK İdarə Heyətinin üzvü, Güneyli fəal Babək Muğanlı çıxış edərək bu gün Güney Azərbaycanda baş verən olaylardan danışmış, Türk Birliyinə gedən yolda Bütöv Azərbaycanın vacib şərt olduğunu qeyd etdi. Mövzu ilə bağlı AXP sədri Pənah Hüseyn, KXCP Ali Məclisinin sədri Gülağa Adıgözəlli ,Milli Hərəkatçılar Birliyindən Ələsgər Siyablı, tarixçi alim Gülşən Məmmədoğlu və Ümüd Partiyası icra aparatının rəhbəri Taleh Əliyev çıxış etdilər.

GundemXeber.Az