Bəyanatda deyilir:

23 iyul 2023-cü il tarixində Azərbaycan Demokratiya və Rifah Partiyasının sədri Qubad İbadoğlu və xanımı İradə Bayramova  Azərbaycan Respublikası Daxili İşlər Nazirliyinin Baş Mütəşəkkill Cinayətkarlikqla Mübarizə İdarəsinin əməkdaşları tərəfindən saxlanılmışlar. Hər iksi idarəyə gətirilmiş, sonradan Qubad İbadoğlunun mülkiyyətində olan, lakin yaşamadığı mənzilində və Partiyanın Baş qərargahında axtarış aparılmışdır. 

Bakı şəhər Nərimanov Rayon Məhkəməsinin 24 iyul 2023-cü il tarixli qərarı ilə Azərbaycan Respulikası Cinayət Məcəlləsinin 204.1 və 204.3.1-maddələri ilə təqsirləndirilən Qubad İbadoğlu barəsində 3 ay 26 gün müddətinə həbs qətimkan tədbiri seçilmişdir. Qubad İbadoğlu hal-hazırda Baş Mütəşəkkil Cinaytəkarlıqla Mübarizə İdarəsində 1 gün saxlanıldıqdan sonra Bakı istintaq təcridxanasına köçürülmüşdür. 

İradə xanım Bayramova saxlanıldıqları zaman ona və Qubad İbadoğluna zor tətbiq edildiyini, xəsarətlər aldıqlarını bildirmişdir. İradə Bayramova xanım BMCMİ-də saxlanılan Qubad İbadoğluna hətta zəruri dərman vasitələrinin çatdırılmasını mümkün olmadığını, icazə verilmədiyini və onun əvvəlcədən bəzi xəstəliklərdən əziyyət çəkdiyin bildirmişdir. 

Qubad İbadoğlu ona qarşı irəli sürülən ittihamları rədd edərək, bütün bunların siyasi hakimiyyət tərəfindən, onun siyasi fəaliyyətinə görə yönəlmiş qanunsuz hərəkətləri kimi xarakterizə edərək, bildirib ki, bütün bu qurulan uğursuz oyun və ssenarilər heç bir nəticə verməyəcək, nə də belə qanunsuz həbslər və təzyiqlər  bizi mübarizədən çəkindirməyəcəkdir. 

"İşgəncələr Əleyhinə Araşdırmalar Mərkəzi" insan hüquqları təşkilatı olaraq, Qubad İbadoğlunun həbsini qətiyyətlə pisləyir, onun həbsini siyasi fəaliyyəti ilə bağlı olduğu qənaətindəyik. Qubad İbadoğlu və onun həyat yoldaşı İradə Bayramovanın saxlanması heç bir zərurət olmadan güc tətbiqi ilə müşayiət olunmuş, həddən artıq kobud, qeyri-insani şəkildə davranış nümyiş etdirilmişdir. Hətta, saxlanma əməliyyatı olduqca təhlükəli üsulla həyata keçirilmiş, Sumqayıt kimi böyük şəhərdən Novxanıya gedən gediş-gəlişli bir yolda avtomobil hərəkətdə olarkən 4 mülki avtomobillə qarşısı qəfil kəsilmiş, qəza şəraiti yaradılmış, Qubad İbadoğlunun avtomobilinə xəsarət yetirilmiş, təqribən 8 nəfər mülki geyimli əməliyyatçı qəfil hücum edərək onu və həyat yoldaşını zorla avtomobildən çıxarmış və bu zaman onlara müxtəlif bədən xəsarətləri yetirilmişdir. Onları "Bandotdel" kimi tanınan DİN Baş Mütəşəkkil Cinayətkarlıqla Mübarizə İdarəsinə aparmışlar. Bu idarə beynəlxalq və yerli hüquq müdafiə təşkilatları tərəfindən işgəncə məkanı kimi adı hallanır və tənqid olunur. Qubad İbadoğlu və həyat yoldaşına qarşı pis rəftar törətmiş şəxslərin müəyyən edilib barələrində qanuni tədbirlər görülməsini tələb edirik. 

Siyasi hakimiyyətin öz siyasi opponentlərinə və digər tənqidi fikirli şəxslərə qarşı qanunsuz və qərəzli hərəkətlərini pisləyir, siyasi mübarizədə inzibati resurslardan və gücdən sui-istifadə hesabına qeyri-bərabər və qeyri-ədalətli vəziyyətlərin yaradılması üzrə irticaçı praktikanı rədd edirik. Sivil dünyanın və demokratik quruluşların qəbul etmədiyi, yolverilməz, qeyri-insani üsullara, zorakılığa əl atılmasını qəbuledilməz saydığımızı bildiririk. Bu halları törədənlərin cəzalandırılmaması və himayə edilməsi ilə yaradılmış cəzasızlıq prezumpsiyanın sürdürülməsinə qətiyyətlə qarşı çıxırıq. Azərbaycan hakimiyyətini mübarizəni sivil qaydada, insan hüquq və azadlıqlarına, rəqiblərin ləyaqətinə, həyat və sağlamlığına, ailə üzvlərinə və mənzil toxunulmazlığına hörmət etməklə aparılmasına çağırırıq. Bütün siyasi fəaliyyətlərin aparılması zamanı nəinki yolverilməz, qanunsuz və qeyri-insani olan işgəncəvi metod və üsullardan, ümumiyyətlə hüquq-mühafizə orqanlarının gücündən, güc tətbiq etmək imkanından sui-istifadə praktikasına son qoyulmasını tələb edirik. Zorakı üsulların, eləcə də güc strukturlarının siyasi fəlaiyyətlərdə istifadəsindən çəkinmə barədə universal prinsipinə sadiq qalmaqla, bütün siyasi fəaliyyət və mübarizənin ölkədaxili və beynəlxalq hüquq normaları çərçivəsində aparılmasını bir daha qətiyyətlə tələb edirik.

Gundemxeber.az