Bəyanatda deyilir:

"23.07.2023-cü il tarixdə   DİN Baş Mütəşəkkil Cinayətkarlıqla Mübarizə İdarəsi tərəfindən  zorakılıqla həbs edilən London İqtisadiyyat və Siyasi Elmlər Məktəbinin (LSE) baş elmi işçisi, Azərbaycan Demokratiya və Rifah (ADR) Partiyasının sədri, professor, iqtisadçı alim, tanınmış ziyalı Qubad İbadoğluya qarşı saxlanıldığı  Kürdəxanı təcridxanasında da hüquqlarının pozulması prosesi davam etdirilməkdədir.

24 iyul 2023-cü ildə  barəsində Nərimanov rayon məhkəməsi tərəfindən 3 ay 26 gün həbs qətimkan tədbiri seçilən   professor Qubad İbadoğlunun hüquqlarının kobudcasına pozulması prosesi hər keçən gün artmaqdadır.  Onun  hüquqlarının pozulması  yalnız  qondarma   ittihamla həbs  edilməsi   ilə bitməmiş,  eyni zamanda Kürdəxanı Təcridxanasında  da  ona qarşı həyata keçirilən mənəvi,  psixoloji,  sağlamlığına birbaşa təhdid yaradan qanunsuz  hərəkətlərə yol  verilmişdir. ADR Partiyasının sədri Qubad İbadoğlunun hipertoniya  və şəkərli diabet xəstəliyindən əziyyət çəkməsi, aorta  damarında  həyati  təhlükə  yaradan  genişlənmənin  olması  ilə  bağlı rejim təmsilçilərinə xəbərdarlıq edilsə də, onun sağlamlığını təmin etmək  üçün  əsaslı müayinə  cəhdlərinin  qarşısı alınmışdır. Belə  ki, təcridxana  rəhbərliyinin  təşəbbüsü  ilə  keçirilən  tibbi  müayinənin  cavablarını  ötən  müddətdə  almaq  mümkün  olmamış  və  müstəqil  həkim  briqadası  tərəfindən  onun  müayinəsinə  şərait  yaradılmamışdır.

Qanunsuz  həbs  edilən Qubad İbadoğluya qarşı  hüquq və  qanun  pozuntuları   məhkəmə  orqanları  tərəfindən  də  eyni  qaydada  davam etdirilmişdir. Professor Qubad İbadoğlu ilə bağlı seçilmiş həbs qətimkan tədbirinin onun  səhhətindəki  ciddi problemləri nəzərə  alaraq ev dustaqlığı ilə əvəz olunması vəsatəti nəzərə  alınmamış  Nərimanov rayon  məhkəməsi tərəfindən  həbs  qətimkan  tədbiri  qüvvədə  saxlanılmış  və  qərardan  verilmiş  apellyasiya  şikayəti  Bakı Apellyasiya Məhkəməsi  tərəfindən  təmin  edilməmişdir.  Qubad İbadoğlunun Nərimanov rayonunda yerləşən və son iki ildən artıq müddətdə getmədiyi ofisdə, qeydiyyatda olduğu mənzilində və bağ evində  prosessual  qanunvericiliyin tələblərinin  kobud  şəkildə  pozulması ilə aparılmış  axtarış tədbirləri haqqında   vəkillər  tərəfindən verilmiş şikayətlər  birinci  və  ikinci  məhkəmə  instansiyaları  tərəfindən qeyri-qanuni olaraq əsassız  sayılmış  və  aparılmış axtarış  əməliyyat tədbirləri qanuna uyğun hesab edilmişdir.

ADR Partiyası   bəyan edir ki, professor Qubad İbadoğlunun sağlamlığını  məqsədli  şəkildə zərbə  altında qoyan  addımlar - şəkərli diabet xəstəliyi ilə bağlı ailə üzvləri tərəfindən Kürdəxanı Təcridxanasına göndərilən  xüsusi qidaların  qeyd olunan müəssisə rəhbərliyi tərəfindən qəbul edilməməsi, Qubad İbadoğlunun antisanitariya şəraitində saxlanması,  saxlanıldığı   kamerada təmizlik işlərinin görülməsi üçün təmizləyici vasitələrin ona çatdırılmaması,  həmçinin  ailə  üzvləri ilə  birbaşa  təmasların  əngəllənməsi,  ayrılmış  görüş  zamanının 8  dəfəyə  qədər  məhdudlaşdırılması   kimi qanunsuz əməllər  Qubad İbadoğlunun həbsinin siyasi   motivli  olmasının bir  daha  bariz  təzahürüdür.

ADR Partiyasının  sədri Qubad İbadoğlunun qanunsuz və qondarma ittihamlarla həbs edilməsinə qarşı daxili və beynalxalq ictimaiyyətin, siyasi dairələrin, media quruluşlarının  sərt   reaksiyalarına  rəğmən  rejim rəhbərliyi professor Qubad İbadoğlu haqqında daha bir qondarma ittiham (Azərbaycan Respublikasının Cinayət Məcəlləsinin 167-3.1 maddəsi ilə) irəli  sürmüşdür.

Heç bir hüquqi əsası  olmayan qondarma ittihamlarla həbsdə  saxlanılan  ADR Partiyasının sədri, professor Qubad İbadoğluya qarşı mövcud siyasi hakimiyyətin  bütün  normaları  aşan bu  yaramaz  iddiaları ölkədə  dövlət,  qanun   və  hüquq  adına  bütün  dəyərlərin ayaq altına  atılmasının  nümunəsidir. 

ADR Partiyası bəyan edir ki,  hakimiyyətin  hər  üç qolunun bir  əldə  cəmləşdiyi, müstəqil məhkəmə sisteminin iflas etdiyi, ölkənin tək bir ailə təmsilçiləri tərəfindən idarə olunduğu bir şəraitdə ADR Partiyasının sədri, professor Qubad İbadoğlunun həyatına yarana biləcək hər hansı  bir  təhlükənin  tək  sorumlusu  onu  sifarişlə  həbs etdirən    İlham  Əliyevdir. 

ADR Partiyası  professor  Qubad  İbadoğlu   haqqında  seçilmiş  həbs  qətimkan  tədbirinin qondarma  və əsassız olduğunu, ona qarşı  irəli  sürülmüş  ittihamların  siyasi  motivli j olmasından  dolayı   rədd  etdiyini  bəyan  etməklə  bərabər onun  qeyd şərtsiz  olaraq  həbsdən azad edilməsini tələb edir."

GundemXeber.Az