Belə həssas məqamda, müahribə şəraitində olan ölkədə həyata keçirilən terror Putinə nə verə bilər?

İlk öncə ondan başlayaq ki, Moskovada 150 nəfər insanın öldürülməsi ilə baş vermiş terror aktının bir çox baş vermə ehtimalları üzrə bütün dünya ictimaiyyətində hazırda yoğun müzakirələr gedir. Bir çoxları bunun Putin tərəfindən, bəziləri Ukrayna xüsusi xidmət orqanları tərəfindən, bir çoxları digər kriminal qruplaşmalar tərəfindən törədildiyini ehtimal edirlər.

Amma elə ilk dəqiqələrdə aktın məsuliyyətini İŞİD-in Vilayət Xorasan qolu öz üzərinə götürdü. 

ABŞ tərəfi anındaca bununla bağlı bir həftə öncə Rusiya tərəfə məlumat verdiyini tirajladı. Zaxarova tez-tələsik "ABŞ-ın əlində bununla bağlı fakt varsa, bizə ötürsün" dedikdən qısa sürə sonra ABŞ tərəfi günlər öncə etdikləri xəbərdarlıqları rəsmi səviyyələrdə bir daha, bu dəfə daha yüksək rəsmi şəxslərin dilindən yenidən bəyan etdilər.

İŞİD-in məlum aktı üzərinə götürən qolu dünən gecə saatlarında hadisənin baş vermə anının yeni video görüntülərini paylaşıb.

Xatırladaq ki, həmin qruplaşma 2015-ci ildə Misirin Sinay yarımadasında Rusiya təyyarəsi bomba ilə partladılmış, əksəriyyəti rus turistlərdən ibarət 224 nəfər bu hücumda həyatını itirmiş, İŞİD hücumun məsuliyyətini üzərinə götürmüşdü.

Radikal islamçılar 2017-ci ildə Sankt Peterburq metrosunda 15 nəfərin ölümü ilə nəticələnən hücumun məsuliyyətini də öz üzərinə götürüblər.

Bəs, İŞİD ləğv olunsa deyilsə də, bu qruplaşma kimlərdir, harada fəaliyyət göstərirlər?

Deməli məsələ belədir. Həyatın bemeranq effekti həmişə işləyir. Gec ya tez, hər kəs etdiklərinə görə bir gün cavab verməli olur.

Həmin terror qrupunun üzvüləri Şimali Qafqaz xalqlarından formalaşan radikal dini cərəyanların nümayəndələri hesab olunurlar. Bu minvalla Suriyada, İraqda, Əfqanıstanda gizli fəaliyyətdə olan terror qrupları ilə əməkdaşlıq göstərməklə həm özlərinin terrorçu kimi peşəkarlıq qabiliyyətini formalaşdırırlar, həm də Rusiyanın zamanla Çeçenistanda, Əfqanıstanda, Suriyada- bütün müsəlman dünyasında etdikləri terrorları, qırğınları əldə əsas tutaraq ona qarşı mübarizə apardıqlarını elan edirlər. 

Həmin qruplar öz bəyanatlarında tez-tez Rusiya lideri Vladimir Putini tənqid edir. Bütün baş verənlərə görə onu məsul tuturlar. 

Bu ay ərzində ABŞ Mərkəzi Kəşfiyyat İdarəsi də Rusiya tərəfə həm gizli, həm publik xəbardarlıqlar edərək, qrupların Şimali Qafqazda fəallaşdığını bildiriblər. Martın 7-də hətta bir neçə terrorçu da ABŞ-ın xəbərdarlığından sonra Vladiqafqazda FZB tərəfindən həbs edilib.

Dünən isə ABŞ öz vətəndaşlarını Rusiyanı tərk etməyə çağıran xəbərdarlıq edib.Görünür, vəziyyət hələ də yaxşı deyil Rusiya ərazisində. 

Bəs, niyə indi daha da fəallaşıb bu qruplar sualına gəlincə isə.. Bunu günü-gündən zəifləyən Rusiyanın hazırkı durumu ilə əlaqələndirmək lazımdır.

Bəs, ölkə daxilində belə həssas məqamda törədilmiş bu akt  Putinə lazım idimi!?

Ukrayna verisiyası üzrə düşünsək. 

Hesab edilir ki, Putin bunu əsas gətirib Ukrayna üzrərinə daha total şəkildə hücumlar edəcək. Terrordan sonra ilk çıxışı zamanı Putin buna işarə etsə də, onun indiyə kimi görünməmiş təlaşından hiss olunurdu ki, o, özü də bu versiyanı qəbul etmir. Təbii Ukraynaya təcavüz etdiyi və müharibənin davam etdiyi bu günlərdə belə fikirlər səsləndirməsi normal qəbul edilməlidir. Ukrayna tərəfi də anında bəyanat verərək, "bizim bu terrorla heç bir əlaqəmiz yoxdur, Terror Rusiyanın işidir" bəyanatı ilə məlum terrorun onlara aidiyyatı olmadığını dünyaya bəyan etdilər. 

O zaman sual oluna bilər ki, bu iki ildən artıq müddətdə hərbi arsenalının 50%-ə qədərini Ukrayna çöllərində tükədən, döyüşmək üçün peşəkar ordu mənsublarını "ət maşınından" keçirtdirən, raket və bombaları tükəndiyi üçün ümidini İran PUA-larına, Şimali Koreya mərmilərinə bağlayan Putinin bugünkü daha total hücum planı nə ilə assossasiya olunur!?

Taktiki nüvə silahı və yeni səfərbərlik planları üzrə düşünsək..

Putin çox gözəl bilir ki, hətta  ən yüngül nüvə silahlarəndan istifadə etmək onun sonunu daha da sürətləndirəcək. Ətarfında olan bəzi ölkə və gücləri ondan daha da soyudacaq. Bu silahlardan istifadə edib, haranı tutacaq? Kiyevimi? O, artıq iki il öncə Kiyevdə əbədi məğlub olduğununun təsdiqini birdəfəlik olaraq tarix kitabına özü-öz əli ilə imza edib.

Səfərbərlik və Rusiya ictimaiyyətini öz çətiri altında daha sıx birləşdirmək üçün?

Putinin bu sarıdan da elə bir problemi yoxdur kimi görünür. Çünki xalq onsuz da bizdəki kimi qorxur və belə məqamda nələrsə etmək qabiliyyətində görünmür. Adam bir həftə öncə bizdəki qədər də olmasa, yenidən beçinci dəfə 88% səslə özünü yeni müddətə prezident elan edib. 

Navalinin öldürülməsi zamanı ən çox 5-6 min insanın meydanlara çıxması da göstərdi ki, 150 milyonluq ölkədə bu gün Putinə qarşı qoya biləcək elə bir ümumxalq gücü yoxdur hələki. Orduda döyüşmək üçün isə səfərbərlik etmək üçün də belə bir terora nə ehtiyac!?

Onsuz da orada döyüşənlərin çoxu muzdurlardır və bu sayı bu gün dünyada əldə etmək elə də çətin deyil. Suriyada, Afrikada, Yaxın Şərqdə, elə Rusiyanın özündə və ətrafında ağır sosial həyat şərtləri ilə boğuşan milyonlara belə poetensial döyüşçü tapmaq mümkündür. Son zamanlar Ukrayna tərəfinin dronlarla etdiyi hücümlar zamanı kadra düşən əsgərlərin bir çoxlarının yuxarıda adını çəkdiymiz ölkələrdən gətirilməsi aydın şəkildə  görülməkdədir.

Nəticə olaraq

Rusiyanın zəifləməsindən istifadə edən qruplar və ölkələr onunla haqq-hesab məqamını çoxdan gözləyirdilər. Əsrlərdir dünyada, terrorun, acı qırğınların, repressiyaların, qətllərin "ustası" kimi ad çıxaran şər imperiyası bu gün etdiklərinin cavabını almağa başlayıb. Rusiya təcavüzündən əziyyət çəkən hər kəs bu məqamı gözləyirdi illərdir. Bu gün Ermənistan kimi kiçik, blokadada olan bir dövlət bu məqamı dəyərləndirməyə çalışırsa, niyə də digərləri açıq və gizli formada bunu dəyərləndirməsinlər ki!? 

İstənilən halda dinc, sivil, günahsız insanların vəhşicəsinə öldürülməsi yolverilməzdir. Və bu hal  Rusiya siyasi-hərbi rəhbərliyi üçün də keçərlidir.

Qulu Məmmədli