Gürcüstan Xalq Müdafiəçisi (Ombudsman) Aparatının məlumatına görə, fevralın 12-də Ombudsmanın nümayəndələri, o cümlədən Ombudsman Aparatında çalışan həkim cəzaçəkmə müəssisəsində aclıq edən azərbaycanlı jurnalist Əfqan Sadıqova baş çəkib.

Bir neçə gün əvvəl Gürcüstanın Sosial Ədalət Mərkəzi Əfqan Sadıqovun səhhətinin son dərəcə ağırlaşdığı və bir neçə saat huşsuz vəziyyətdə olduğu barədə məlumat yayıb. Həkimlərin müdaxiləsi nəticəsində o, ağır vəziyyətdən çıxarılıb. Fevralın 2-də uzun sürən aclıq aksiyasından sonra Əfqan Sadıqov quru aclığa keçib və su içməkdən imtina edib. “Jurnalistin radikal qərarına Avropa İnsan Haqları Məhkəməsinin onun Azərbaycana ekstradisiyasını qadağan edən müvəqqəti tədbir görməsinə baxmayaraq, məhkəmənin onun barəsində seçilmiş həbs-qətimkan tədbirini 3 ay uzatması səbəb olub”, məlumatda deyilir.

Ombudsman Aparatının yaydığı məlumata görə, Sadıqova baş çəkdikdən sonra “tibbi qeydlərə əsasən, xeyli çəki itirməsi müşahidə olunub”.

Həkinin sözlərinə görə, bu mərhələdə qalan göstəricilər təhlükə yaratmır, lakin qəfil fəsadları istisna etmək olmaz.

Həkim bildirib ki, məhbusun səhhəti pisləşdiyi üçün onun razılığı ilə bir neçə gündür ona müvafiq tibbi xidmət göstərilir. Lakin o, hələ də mülki klinikaya köçürülməkdən imtina edir.

“Aclıq aksiyasının gözlənilən nəticələri barədə Əfqan Sadıqova Ombudsman Aparatının həkimi məlumat verib. Bundan əlavə, ona Ombudsman Aparatının verdiyi açıqlamalara münasibət və digər hüquqi məsələlər barədə də məlumat verilib.

Ombudsamn Apapatı əlavə olaraq məhbusun tam tibbi sənədlərini tələb edib. Ombudsman Əfqan Sadıqova göstərilən tibbi yardıma nəzarəti davam etdirir”, Ombudsman Aparatının açıqlamasında bildirilir.

Azərbaycanlı jurnalist Əfqan Sadıqov 147 gündür həbsxanada aclıq aksiyası keçirir. Vəkillərinin fikrincə, Sadıqovun aclıq aksiyası iki hökumətin (Azərbaycan və Gürcüstan) ədalətsizliyinə cavabdır.

Jurnalist ötən il avqustun 3-də Tbilisidə həbs edilib. Gürcüstan tərəfinin məlumatına görə, Sadıqov hədə-qorxu ilə tələb etmə ilə bağlı cinayətlərə görə Azərbaycan tərəfindən axtarışa verilib.

Ailəsi, hüquq müdafiə təşkilatları və müstəqil media onun həbsini siyasi təqibi ilə əlaqələndirir.

Əfqan Sadıqov aclıq aksiyasına 2024-cü il sentyabrın 21-də başlayıb. Aclıq aksiyasının 17-ci günündə jurnalistin səhhəti pisləşib və o, 18 saylı tibb müəssisəsinə köçürülüb və bu günə kimi oradadır.

Fevralın 10-da Əfqan Sadıqovun maraqlarını müdafiə edən Sosial Ədalət Mərkəzi jurnalistin aclıq aksiyası keçirməsi ilə bağlı məlumat yayıb.

"Əfqan Sadıqov əlil arabasında danışmaqda və hərəkət etməkdə çətinlik çəkir və o, vaxtaşırı huşunu itirmə epizodları yaşayır", Sosial Ədalət Mərkəzinin bəyanatında deyilir.

Sosial Ədalət Mərkəzi “Gürcü Arzusu”nun ictimai müdafiəçisi və ədliyyə naziri Anri Oxanaşviliyə müraciət edib.

Sosial Ədalət Mərkəzi Gürcüstanın ombudsmanını Əfqan Sadıqovun vəziyyətini mütəmadi olaraq izləməyə, habelə dövlət vasitəçiliyi və məhbusun psixososial dəstəyi prosesini gücləndirəcək xüsusi komissiya yaratmağa çağırıb.

Mərkəz, həmçinin Anri Oxanaşvilini Əfqan Sadıqovun son dərəcə ağır vəziyyətinə, eləcə də Avropa Məhkəməsinin qərarının məzmununa və ruhuna əsaslanaraq, onun Azərbaycana ekstradisiyasından imtina ilə bağlı qərar qəbul etməyə çağırıb.

Sosial Ədalət Mərkəzi bildirir ki, “Cinayət mühakiməsi sahəsində beynəlxalq əməkdaşlıq haqqında” qanun Anri Oxanaşviliyə belə bir imkan verir.

Sosial Ədalət Mərkəzinin məlumatına görə, Əfqan Sadıqovun səhhəti son dərəcə narahatlıq doğurur. Hazırda 56 kiloqram çəkisi olan jurnalist həbs olunduqdan sonra 40 kiloqramdan çox arıqlayıb. İstintaq təcridxanasının həkimlərinin fikrincə, onun uzun sürən aclıq aksiyasından sonra sağlamlığına dəyən ziyan bərpa olunmaz ola bilər

Gundemxeber.az