COVID-19 pandemiyası bütün dünyada gələcək anaların sağlamlığına sarsıdıcı zərbə vurub. 2021-ci ildə hamilə və doğuş edən qadınlar arasında ölüm hallarında kəskin artım baş verib.

Gundemxeber.az-ın verdiyi məlumata görə, bu barədə BMT-nin yeni hesabatından məlum olur.

Statistika göstərir ki, 322 min qadın ağırlaşmalardan ölüb - bu, 2020-ci illə müqayisədə 40 min nəfər çoxdur.

BMT-nin Uşaq Fondu (UNICEF) pandemiyanın ana ölümlərinə fəlakətli təsiri haqqında ilk qlobal hesabatını təqdim edib. Ekspertlər vurğulayırlar ki, bu artım təkcə COVID-19-un birbaşa fəsadları ilə deyil, həm də analıq sağlamlığının qorunması üzrə tibbi xidmətlərin göstərilməsində geniş yayılmış pozuntularla bağlı olub.

Hesabatın dərc edilməsi hər il 7 aprel tarixində qeyd olunan Ümumdünya Sağlamlıq Gününə təsadüf edir.

COVID-19 xəstəliyi ilə bağlı fövqəladə vəziyyət rejimi dünya səhiyyəsində 2020-ci ilin yanvar ayının sonundan 2023-cü il mayın 5-nə qədər qüvvədə olub. ÜST-ün 23 mart 2025-ci il tarixinə olan məlumatına görə, dünyada 777 684 506 koronavirus yoluxma halı və 7 092 720 ölüm halı qeydə alınıb. ÜST-ün baş direktoru Tedros Adhanom Qebreyesus 2023-cü il mayın 5-də Cenevrədə keçirilən brifinqdə bildirib ki, ölənlərin həqiqi sayı ən azı 20 milyondur.

Gundemxeber.az