Ermənistan cəmiyyətinin böyük hissəsi Rusiyada yaşayan varlı erməni iş adamlarını, milyarderləri öz “tarixi vətənlərinə” xəyanətdə ittiham edərək bildirir ki, onlar Ermənistan hakimiyyətinə və xalqına dəstək vermək əvəzinə, “erməni kimliyini” öz maddi maraqları xatirinə Kremlə satırlar, onun sifarişini yerinə yetirirlər və sair. Bu zaman Rusiyadakı Azərbaycan diasporunu, azərbaycanlı milyarderləri həsədlə misal göstərərək, onların fərqli davrandığını, guya ilk növbədə Azərbaycanın maraqlarından çıxış etdiklərini iddia edirlər. Lakin bunun heç də hər zaman həqiqəti əks etdirmədiyi hələ Kremlin sifarişi ilə “milyarderlər ittifaqı” yarananda bəlli idi...

İndi isə Kremlin Azərbaycana qarşı başlatdığı növbəti təzyiq və təhdid kampaniyası həmin azərbaycanlı soyadını daşıyan varlılar üçün bir növ sınaq imtahanına çevrilib ki, bu sınaqdan da onların bəzilərinin ləyaqətlə, şərəflə - “alnı açıq” çıxa bilməyəcəyi indidən görünür...

Bunun ilk nümunəsi artıq göz önündədir. Rusiyada yaşayan və arada bir tarixi vətəni Azərbaycana baş çəkən milyarder İsgəndər Xəlilovun Rəhman adlı oğlu Moskva ilə Bakı arasındakı məlum gərginlik fonunda öz “İnstagram” səhifəsində Vladimir Putinin şəklini və ona aid bir fikri paylaşıb. Əvvəlcə xatırladaq ki, anti-Azərbaycan kampaniyası çərçivəsində bir neçə gün əvvəl Rusiyanın hüquq-mühafizə və xüsusi xidmət orqanları R.Xəlilovun adına olan və əsasən neft daşımaları həyata keçirən “Railgo” şirkətinin ofisinə basqın edib, orada axtarışlar aparıb. Bu barədə Rusiya kanalları məlumat və fotolar paylaşıb. Lakin R.Xəlilov hamının gözü qarşısında baş verənləri təkzib edərək, belə bir şeyin olmadığı barədə açıqlama yaydı. Həmin vaxt müxtəlif mənbələr İsgəndər Xəlilovun Rusiya rəhbərliyində kimlərləsə anlaşıb dil tapmağa, məsələni həll etməyə çalışdığını bildirdilər.

Görünür, bu proses indi də davam etdiyi üçün milyarderin oğlu Kremlə “sonsuz sədaqətini” nümayiş etdirmək üçün Putinin şəklini qoyub, ondan sitat gətirmək qərarına gəlib. Sitatda isə deyilir: “Hamı bizi dişləmək, bizdən nəsə qoparmaq istəyir. Lakin bunu etmək istəyənlər bilməlidirlər ki, onların hamısının dişlərini sındırcağıq ki, dişləyə bilməsinlər”.

Əvvəlcə qeyd edək ki, tarixən, o cümlədən də Putin hakimiyyəti dövründə Rusiya özü hər zaman kimlərdənsə, nələrisə dişləməyə, qoparmağa çalışıb – Ukraynadan, Gürcüstandan, Moldovadan, Pribaltikadan, Qazaxıstandan, həmçinin də Azərbaycandan! Odur ki, Putinin bu “dahiyanə fikri” bir oğrunun öz adını başqalarına qoymasıdır.

İsgəndər Xəlilovun oğlunun məhz bu fikri paylaşmasına gəlincə, görünür R.Xəlilov öz səviyyəsinə, intellektinə, mədəniyyətinə uyğun olaraq seçdiyi bu sitatla bir növ Putinə “sığınır” (Loru dildə bəziləri buna “girir” də deyir) ki, onun və dədəsinin biznesini əlindən almasınlar. Sırf biznes baxımından kimin kimdən nə dişləmək, nəyini qoparmaq istəməsindən asılı olmayaraq, Kremlin Azərbaycana qarşı başlatdığı və xeyli vaxtdır davam edən çirkin təbliğat, təhdid və təzyiq kampaniyası fonunda İsgəndər Xəlilovun oğlunun fəxrlə Putindən bu cür sitat paylaşması çox yersiz, olduqca miskin, ucuz bir “padxalim tryuku” kimi görünür. Bunu özünə yaraşdıran birisindən əlbəttə ki, milli təəssübkeşlik, vətənpərvərlik, fədakarlıq və digər ictimai yüklü keyfiyyətlər gözləməyə dəymir. Ona görə də nə təyyarəmiz vurulanda, nə Yekaterinburqdakı məlum hadisələr baş verəndə, nə Azərbaycan diasporuna və Azərbaycana qarşı haqsız hücumlar ediləndə cınqırını çıxarmayan xəlilovların indi “quyruqları qapı arasında qalan kimi” Azərbaycanı bir tərəfə atıb Putinə yarınmasında qeyri-adi heç nə yoxdur...

Tarixi vətəninə, adını, qanını daşıdığı millətinə, nəhayət, elə öz mənliyinə hörmət edən birisi indiki həssas məqamda Azərbaycana qarşı düşmən fəaliyyətlərin başında duran, bu təbliğatı kökləyən və idarə edən şəxsdən sitat gətirməklə hansı safda durduğunu göstərir. Göstərir ki, onu bir az da sıxışdırsalar, nəinki Putinin şəklini qoyub, ondan sitat gətirər, lazım gəlsə, Zatulinin, Solovyovun, hətta Marqarita Simonyanın Azərbaycana qarşı iftiralarını, təhqir və təhdidlərini də fəxrlə paylaşar. Təki puluna, malına dəyməsinlər...

İndi beləsinin soyadından başqa Azərbaycana nə aidiyyatı ola bilər?

Ermənistan parlamentinin spikeri Alen Simonyan onunla eyni soyadı daşıyan Kreml təbliğatçısı Marqarita Simonyan haqqında demişdi ki, onun soyadından başqa Ermənistana heç bir aidiyyatı yoxdur. Doğrudan da nadürüstlərin milləti, vətəni olmur, soyadı nə olursa olsun..

Cəlal Məmmədli/“AzPolitika.info”