Sirena MMC-nin arxasında hansı məmur dayanır?

Qazax rayon sakini, Yenu Azərbaycan Partiyasının üzvü, həkim Yusubov Mahir Şahvələd oğlu üzləşdiyi problemlə bağlı Azərbaycan Prezidenti İlham Əliyevə və Birinci vitse-prezident Mehriban xanım Əliyevaya şikayət ünvanlayıb. Şikayət məktubunun bir nüsxəsi də "Gündəm Xəbər" qəzetinin redaksiyasına daxil olub.

Şikayətçi yazır ki, 2013-cü ilin noyabr ayında Sirena MMC-dən dəyəri 14.800 AZN olan Changan Eado avtomobilini 3 illik kredit yolu ilə alıb: "İlkin ödəniş olaraq mən 2500 AZN nəğd pul ödədim. Sonrakı dövrdə 20 ay ardıcıl 533 AZN olmaqla 10.660 manat Sirena MMC-yə pul ödədim. Beləliklə, ilkin ödənişlə birgə ödədiyim məbləğ 13.160 manat təşkil edib".

Əsl həngamə də elə bundan sonra başlayıb. Şikayətçi yazırki, 2015-ci ilin avqus ayında cari ödənişini etdikdən sonra o, qalan borcunu tam ödəmək istədikdə Sirena MMC-dənona bildiriblər ki, guya cəmi 9.100 manat pul ödəyib: "Lakin mən onlarla razılaşmadım və əlimdəki qəbzlərə əsasən, indiyədək 13.160 AZN pul ödədiyimi bildirdim. Bundan sonra aramızda mübahisə yarandı və Sirena MMC Qazax məhkəməsinə müraciət etdi. 2016-cı ilin oktyabr ayında avtomobildə yaranmış nasazlığa görə mən həmin avtomobili Sirena MMC-nin təmir sexinə apardım. Təmir olunduqdan sonra həmin avtomobili mənə vermədilər. Artıq 8 aydır ki Sirena MMC həmin avtomobili özündə saxlayır".

Şikayətçi yazır ki, bu qanunsuzluqla bağlı məhkəməyə müraciət edib: "Qazax məhkəməsi mübahisəni aradan götürmək üçün Ədliyyə Nazirliyinin məhkəmə ekspertizasını təyin etdi. Ədliyyə Nazirliyinin məhkəmə ekspertizası mənim ödənişlərimi rəsmi olaraq təsdiq etdi. Qazax məhkəməsinin çıxardığı qətnamədə ümumi dəyərinin əsas hissəsi ödənildiyi üçün Sirena MMC-nin həmin avtomobili məndən almasını ədalətlilik prinsipinin pozulması kimi qiymətləndirdi. Lakin Sirena MMC məhkəmə qətnaməsini nəzərə almadı və həmin avtomobili bu günə qədər də özündə girov saxlayıb. Sirena MMC-nin məhkəmə qərarına biganə yanaşması mənə əsas verir deyim ki, onun arxasında hansısa səlahiyyətli məmur dayanır. Məhz buna görə də onlar məhkəmə qərarlarını nəzərə almırlar".

Sonra ölkə prezidenti İlham Əliyevə və Birinci vitse-prezident Mehriban xanım Əliyevaya xitab edən şikayətçi yazır: "Sirena MMC-nin məndən başqa bir çox müştəriləriylə bu cür davrandığı barədə həm mətbuatda, həm də ictimayyət arasında fikirlər var. Sizdən xahiş edirəm ki, Sirena MMC-nin özbaşınalıqlarına son qoyulması üçün müvafiq dövlət qurumlarına göstəriş verəsiniz".

Samir

gundemxeber.az