Gündəm Xəbər Ekologiya və Təbii Sərvətlər Nazirliyiyinin mətbuat xidmətinə istinadən bildirir ki, 1 iyul 2017-ci il tarixində saat 14:45 radələrində Şirvan Milli Parkının ərazisində yanğın hadisəsi baş verib. Yanğın "Salyanoil" şirkətinin istifadəsində olan ərazidən 2 yük maşını keçdikdən sonra qeydə alındığından əraziyə alovun məhz nəqliyyat vasitələrindən düşdüyü ehtimal olunur.

Dərhal əraziyə cəlb olunmuş Ekologiya və Təbii Sərvətlər Nazirliyinin yerli qurumlarının və Fövqəladə Hallar Nazirliyinin Yanğından Mühafizə Xidmətinin əməkdaşlarının birgə səyləri nəticəsində yanğın tez bir zamanda lokallaşdırılıb və 15:30 radələrində tam söndürülüb.

Yanğın nəticəsində yalnız 0,7 hektar ərazidə quru ot örtüyü və kollar yanıb, heç bir ağaca ziyan dəyməyib.

Hadisənin səbəblərinin və təqsirkarların müəyyən edilməsi üçün Şirvan Milli Parkı tərəfindən qanunamüvafiq sənədləşmə işləri aparılıb və rayon polis şöbəsinə müraciət olunub.

Hazırda dəymiş ziyanın müəyyən olunması istiqamətində iş aparılır.

Ekologiya və Təbii Sərvətlər Nazirliyi bir daha əhalini odla ehtiyatlı olmağa, yanğın təhlükəsizliyi qaydalarına riayət etməyə çağırır.

Qeyd edək ki, sonuncu dəfə 5 il əvvəl də “Salyanoil”un istifadəsində olan ərazidən Şirvan Milli Parkının ərazisinə od düşməsi nəticəsində 100 hektardan artıq sahə yanmış və parka yüz minlərlə manat ziyan dəydiyi üçün cinayət işi başlanmışdı.