Bakı Qarabağ danışıqlarının nazirlər səviyyəsində davam etdirilməsi barədə həmsədrlərin təkliflərinə “hə” deyib. Xarici İşlər Nazirliyi bəyan edib ki, münaqişənin tezliklə həlli, qəbuledilməz və qeyri-davamlı olan status-kvonun dəyişdirilməsi üçün substantiv danışıqlara hazırdır. Bəs, qarşı tərəf?

İşğalçı ölkə, separatçı qurumun da “cavab”ı açıqlanıb. Azərbaycanın sülhməramlı təşəbbüsünə düşmən “seçki” planı ilə reaksiya verib. İşğalçı rejimin başçısının mətbuat katibi David Babayan deyib ki, iyulun sonuncu ongünlüyündə qondarma rejiminin “parlament”i yeni “prezident” seçəcək. Həyasızlığın həddini görürsünüzmü?
Biz görürük, amma özlərini “tərəfsiz” adlandıran, əslində isə işğalı stimullaşdıran vasitəçi dövlətlər görməzdən gəlirlər. Əks təqdirdə bu bəyanatın səsləndiyi andaca Minsk Qrupu həmsədrlərindən heç olmasa, quruca bəyanat gələrdi. Azərbaycan ordusu Qarabağdakı “OSA” hərbi qurğusunu məhv edən kimi həmsədrlər “narahat” olmuşdular, Azərbaycanı suçlu çıxaran bəyanat vermişdilər.
Separatçılar o qədər həyasızlaşıb ki, hətta “yeni konstitusiya”dan dəm vururlar, “parlamentli respublika” qurduqları görüntüsü yaratmağa çalışırlar. Düzdür, beynəlxalq ictimaiyyət işğal altındakı əraziləri Azərbaycanın ayrılmaz tərkib hissəsi saydığını və orada keçirilən heç bir “seçki”nin nəticələrini tanımadığını vaxtaşırı bəyan edir. Amma bu mövqe işğala son qoymur. İşğalçının başına qapaz vuran, ona sanksiya tətbiq edən yoxdur. Azərbaycan ordusu da bir zərbə endirən kimi havadarları hərəkətə keçir.

Bu günlərdə prezident Putinin sözçüsü Aleksandr Proxanov dedi ki, “apreldə Azərbaycan Qarabağı qaytara bilərdi, lakin sonradan, Moskvanın müdaxiləsindən sonra dayandılar. Vəziyyət həll olunmamış qaldı”. Əslində buna nə biz, nə ermənilər, nə də havadarları qəti şübhə eləmir. Xatırlayırsınızsa, Moskvanın üç gün ərzində susması, döyüşlərə biganə qalması erməniləri dəli eləmişdi.

Ötən ay “Global Firepower” analitik mərkəzi dünya ölkələrinin hərbi qüvvələrinin 2017-ci ilə olan reytinqini açıqladı. 132 ölkə arasında Azərbaycan ordusu 59-cu, Ermənistan ordusu isə 95-ci yeri tutub. Bu reallığı ermənilər özləri də etiraf etdilər. Düzdür, onlar bu yolla yenidən Rusiyanın havayı silahlarına, ABŞ-ın gecəgörmə qurğularına sahiblənmək istəyirlər. Ancaq istənilən halda düşmən çox narahatdır. Ermənilər “nə vaxta qədər belə davam edəcək” sualına cavab axtarırlar. Hesab edirlər ki, Azərbaycan bu gün Cocuq Mərcanlını abadlaşdırırsa, sabah Azərbaycan bayrağı Şuşada dalğalanacaq.
Bu günlərdə Türkiyədə həmsöhbət olduğum rus jurnalisti Cocuq Mərcanlıya getmək arzusunu dilə gətirdi. Yəni bu, bir kəndin azad olunması, abadlaşdırılması məsələsi deyil, Şuşa, Xankəndinin azad olunması istiqamətində ciddi bir testdir, dost da bilir, düşmən də...

Nəhayət, beynəlxalq oyunçuların Qarabağla bağlı oyunlarına son qoyulmalıdır! Azərbaycan Qarabağda sülhün olmasını istəyən dairələrdən birmənalı mövqe tələb etməlidir. Rəsmi Bakı Dağlıq Qarabağdakı “seçki” hazırlığına BMT-nin, Avropa Şurasının, ATƏT-in, Vaşinqton, Paris və Moskvanın diqqətini cəlb etməkdən ötrü bütün zəruri addımları atmalı, XİN rəhbərliyi təkcə müraciətlərlə kifayətlənməməli, təcili səfərlər həyata keçirib vəziyyətlə bağlı şəxsən danışıqlar aparmalıdır. Eyni zamanda Azərbaycan ordusunun döyüş hazırlığı vəziyyətinə gətirilməsinə, düşmənə qəti xəbərdarlıq edilməsinə ehtiyac var. Bəyan olunmalıdır ki, əgər Qarabağdakı separatçı rejim “prezident seçkisi” adlı şounu gerçəkləşdirəcəksə, o halda bütün məsuliyyət işğalçı tərəfin üzərinə düşəcək.

Üstəlik, Bakı Qarabağa qanunsuz səfər edən xarici ölkə vətəndaşlarına da müraciət etməlidir, “hər an müharibə başlaya bilər, məhv olarsınız, belə səfərlərdən çəkinin”, deyə. Əks təqdirdə nə “seçkilər”lə bağlı sonradan verilən bəyanatlar, nə də əcnəbilərin adlarının “qara siyahı”ya salınması vəziyyətə ciddi təsir göstərməyəcək.

Ermənilər israrla ABŞ kəşfiyyatının “bu il Qarabağda müharibə başlaya bilər” proqnozunu reallaşdırmaq üçün addımlar atırlar. Azərbaycan təbliğat müharibəsində də uğurlar əldə etməli, düşmənə vuracağı hərbi zərbələrə qarşı sərgilənə biləcək neqativ reaksiyaları qabaqcadan neytrallaşdırmaq üçün hərəkətə keçməlidir. Nalbandyan ilin sonunadək azı, bir ölkənin Dağlıq Qarabağın “müstəqilliyini” tanıyacağını deyib. “Seçki”ləri sadəcə “şou” adlandırıb üstündən keçsək, erməni havadarları fürsətdən yararlana bilər. Ayıq olmalıyıq...