“Azərbaycan Beynəlxalq Bankı”nın həbsdə olan sabiq sədri Cahangir Hacıyevin vəkili müvəkkilinin daxili nizam-intizam qaydalarını pozduğu üçün “kars”a salınması barədə Penitensiar Xidmətin açıqlamasına münasibət bildirib.

Vəkil A.Layıcov deyib ki, müəssisə daxili davranış və intizam qaydalarına əsasən, bir məhkum telefonla danışanda başqa bir məhkumun dəstəyi alıb onun danışdığı adamla danışması intizam məsuliyyətinə səbəb ola bilməz: “Penitensiar Xidmətin rəsmisi bu versiyanı elə səsləndirib ki, sanki qayda pozuntusu və qanuna zidd davranış varmış. Ən azı, belə absurd bəhanədənsə, sualıma cavab versinlər ki, Cahangir Hacıyevin vəkilləri ilə görüşünə niyə imkan verilmir? Vəkillə görüşməyə heç bir halda məhdudiyyət qoyula bilməz, hətta şəxs cərimə təcridxanasında olsa belə. On gündür ki, hər gün gedib-gəlməyimizə rəğmən müvəkkilimizlə görüşə bilmirik. Onun yaxınları ilə görüşünə də qadağa qoyulub. İsti paltarların, yemək və dava-dərman qəbulu qadağan edilib”.
Vəkil bildirib ki, C.Hacıyevin “kars”a salınmasının əsl səbəbi başqadır: “Cahangir Hacıyevin cərimə təcridxanasına salınmasının yeganə səbəbi, onun mətbuada gedən qarayaxmalara öz mövqeyini bildirməsidir”./qafqazinfo.az