Hərbi Hissədə baş verən qanlı olayın şok təfərrüatları

Qəsdən adam öldürməyə cəhddə, qanunsuz silah gəzidrməkdə və digər cinayətlərdə ittiham olunan Zaqatala rayon sakini, 1997-ci il təvəllüdlü Həmzət Əzizovun cinayət işi üzrə məhkəmə prosesi başa çatıb.
İttihama görə, Həmzət Əzizov 24 aprel 2015-ci il tarixdə Səfərbərlik və Hərbi Xidmətə Çağırış üzrə Dövlət Xidmətinin Zaqatala rayon şöbəsi tərəfindən müddətli həqiqi hərbi xidmətə çağırılıb, Müdafiə Nazirliyinin “N” saylı hərbi hissəsinin kəşfiyyat bölüyünün 1-ci kəşfiyyat tağımının 3-cü kəşfiyyat manqasının komandiri vəzifəsində, əsgər hərbi rütbəsində xidmət edib. O, tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını zərərçəkmiş şəxsin şərəf və ləyaqətini alçaltmaqla və ona qarşı zor tətbiq etməklə pozub, qanunsuz olaraq odlu silahı əldə edib, habelə qəsdən adam öldürməyə cəhd edib.

Təhqir və dava

Belə ki, Həmzət Əzizov 28 fevral 2016-cı il tarixdə saat 2015 radələrində xidmət etdiyi hərbi hissənin Goranboy rayonunun Qaraçinar qəsəbəsi ərazisində yerləşən komanda müşahidə məntəqəsində olan yeməkxanada tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozub. O, Nariq Əhmədova 2016-cı ilin yanvar ayında kəşfiyyat bölüyünün əsgəri Xanlar Xəlilova postun ərazisinə odun gətirməsi barədə göstəriş verməsini irad tutub, onun ünvanına nalayiq söyüşlər söyüb.
Bu zaman Natiq Əhmədov ona cavab qaytarıb. Həmzət isə natiq.Əhmədova qarşı zor tətbiq etməklə yaxasından tutub və yenidən anasının ünvanına nalayiq söyüşlər söyüb.
Bundan sonra Həmzət Əzizov Natiq Əhmədovun yaxasını buraxıb, lakin öz cinayət əməllərini davam etdirərək yenidən onun anasının ünvanına nalayiq söyüşlər söyüb. Natiq Əhmədov isə ona cavab qaytardıqda isə onu öldürmək qərarına gəlib.

Qətlə cəhd

Bu məqsədlə Həmzət Əzizov Xanlar Xəlilova xidməti istifadə üçün təhkim olunmuş, həmin vaxt yeməkxana¬nın divarına söykənmiş vəziyyətdə olan avtomat silahı götürən Həmzət Əzizov silahı döyüşə hazır vəziyyətə gətirib. O nalayiq söyüş söyməklə, “səni öldürəcəm peysər” deyərək lüləsini Natiq Əhmədovun ürək nahiyyəsinə dirəyib.
Natiq Əhmədov silahı özündən uzaqlaşdırmaq məqsədi ilə lülə hissəsindən tutaraq geri itələmək istəyib. Bu zaman o, Natiq Əhmədovu qəsdən öldürmək məqsədi ilə silahın tətiyinə basıb, atəş açaraq Natiq Əhmədova çənəsindən vurub.
Lakin Natiq Əhmədova vaxtında tibbi yard¬ım göstərildiyi üçün həyatını xilas etmək mümkün olub. Həmzət Əzizov hərbi polis tərəfindən həbs edilib.

Üç maddəli cinayət işi

Həmzət Əzizov Cinayət Məcəlləsinin 29,12¬0.1-ci (qəsdən adam öldürməyə cəhd), 228.1-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, sa-xlama, daşıma və ya gəzdirmə) və 332.1-ci (tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma, zərərçəkmiş şəxsin şərəf və ləyaqətini alçaltmaqla və ya ona qarşı zor tətbiq etmək) maddələri ilə ittiham edilib.
Onun barəsində olan cinayət işi baxılması üçün Gəncə Hərbi Məhkəməsinə göndərilib. Cinayət işi hakim Kamal Əliyevin sədrliyi ilə baş tutan iclasda araşdırılıb.

“Birlikdə yeməkxanaya gəldik”

Məhkəmə baxışı zamanı təqsirləndirilən şəxs qismində ifadə verən Həmzət Əzizov ona verilmiş ittihamda özünü təqsirli biməyib. O, bildirib ki, Natiq Əhmədovu hərbi xidmətdən tanıyıb, münasibətləri xidməti olub, aralarında ədavət və ya düşmənçilik olmayıb: “Fevralın 27-də kəşfiyyat bölüyünün əsgərləri Xanlar Xəlilov və Nəsrəddin Osmanov ilə birlikdə bölüyün 3-cü manqasının tərkibində hərbi hissə komandirinin Goranboy rayonunun Qaraçinar qəsəbəsinin ərazisində yerləşən komanda müşahidə məntəqəsinə düşmən mövqelərinin müşahidəsini aparmağa təyin edilmişik. Ertəsi gün, saat 21 radələrində Xanlar Xəlilov ilə axşam yeməyi üçün müşahidə məntəqəsindən yeməkxanaya gəldik. Həmin vaxt yeməkxanada bizdən savayı əsgərlər Natiq Əhmədov, Ysuf Rəsulov və Şəhriyar Şükürov olublar. Natiq Əhmədov yeməkləri qablara çəkib və daha sonra bizə verib, Şəhriyar Şükürov isə qabları yumaqla məşğul olub”.

“Özünə atəş açdı”

Həmzət Əzizovun sözlərinə görə, təxminən 15 dəqiqə ərzində yeməyini yeyib, əvəzinə müşahidədə qalan Nəsrəddin Osmanovun yeməyə gəlməsi üçün tələsərək bayıra çıxıb: “Bayırda 4-5 addım atandan sonra Xan¬lar Xəlilovu tələsdirmək məqsədi ilə yeməkxanaya tərəf geri qayıtdım. Həmin vaxt Natiq Əhmədovun yeməkxananın içərisində girişdən sağda üzü içəridə olan sobaya tərəf dayandığını, əlində olan avtomat silahın lüləsini çənəsinə dirədiyini gördüm. Bu zaman ona nə etdiyini soruşmaq istədim. Lakin sözümü deməyə imkan tapmamış Natiq Əhmədov avtomat silahdan özünə atəş açdı. Natiq Əhmədovun qanı əynimdə olan gödəkçənin üzərinə sıçradı. Atəş açılandan sonra Natiq Əhmədov yerə yıxıldı. Mən şok vəziyyətinə düşdüm, köməyə adam çağırmaq məqsədi ilə geriyə sığınacağa tərəf qaçdım”.

“Qanunsuz hərəkətlər etməmişəm”

Təqsirləndirilən şəxs qeyd edib ki, fevralın 28-də, hərbi hissənin Goranboy rayonunun Qaraçinar qəsə-bəsi ərazisində yerləşən komanda müşahidə məntəqəsində olan yeməkxanada tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozaraq, zərərçəkmiş şəxs Natiq Əhmədovun şərəf və ləyaqətini alçaltmayıb, ona qarşı nizamnamədən kənar hərəkətlərə yol verməyib: “Əsgər yoldaşım Xanlar Xəlilovun xidməti istifadəsində olan avtomat silahı qanunsuz olaraq əldə etməklə zərərçəkmiş Natiq Əhmədovu öldürmək məqsədi ilə həmin silahdan qəsdən bir dəfə atəş açmamışam və sonuncunu öldürmək istəməmiş¬əm. Eyni zamanda, Natiq Əhmədovu həmin vaxt söyməmişəm, onu təhqir etməmişəm. Ona qarşı hər hansı nalayiq hərəkətlər etməmişəm. Natiq Əhmədova qarşı hər hansı qanunsuz hərəkət etməmişəm”.
Gəncə Hərbi Məhkəməsinin hökmü ilə Həmzət Əzizov cəzasını ciddi rejimli cəzaçəkmə müəssisəsində çəkməklə 10 il müddətinə azadlıqdan məhrum edilib.
Hökmdən narazı qalan Həmzət Əzizov apelyasiya şikayəti verib. O, barəsində olan hökmün ləğv edilməsini, bəraət hökmünün çıxarılmasını istəyib. Onun şikayəti araşdırılması üçün Gəncə Apelyasiya Məhkəməsinə göndərilib.
Apelyasiya şikayəti hakim Teyyub Muxtarovun sədrlik etdiyi kollegiyada araşdırılıb. Hakim kollegiyası apelyasiya şikayətinin dəlillərini araşdırandan sonra qərar elan ediblər. Qərara görə, apelyasiya şikayəti qismən təmin edilib və onun cəzası 9 il 3 aya endirilib.

Aslan
gundemxeber.az