Məhkəmə iki nəfəri öldürən sürücünü həbsə göndərmədi, prokuror narazılıq etdi

Yevlax rayonunda ölümlə nəticələnən yol-nəqliyyat hadisəsi törətməkdə təqsirli bilinən Ağdam rayon sakini, 1959-cu il təvəllüdlü Vəliyəddin Əhmədovun cinayət işi üzrə məhkəmə prosesi başa çatıb.
İttihama görə, Vəliyəddin Əhmədov 12 dekabr 2016-cı ildə, saat 14.30-da Bakı-Şamaxı-Yevlax yolunun Yevlax rayonu ərazisindən keçən 267,5-ci kilometrliyində idarə etdiyi Mitsubishi Airtrek markalı avtomobili ilə yolun Bakı şəhəri istiqamətində hərəkətdə olarkən yol hərəkəti qaydasını pozub. O, İslam İsmayılovun idarə etdiyi Vaz-21074 markalı avtomobilin yoluna çıxaraq toqquşub.
Nəticədə Vaz-21074 markalı avtomobilin sürücüsü İslam İsmayılov və onun sərnişini olan gəlini Səadət İsmayılova ölüblər.
Həmçinin hadisə zamanı İslam İsmayılova məxsus Vaz-21074 markalı 66-BX-081 dövlət qeydiyyat nişanlı avtomobilə 5007 manat ziyan vurub.
Daha sonra, toqquşma nəticəsində Mitsubishi Airtrek markalı avtomobil fırlanaraq birinci toqquşma ye-rindən 27 metr aralıda olan Əlizamin Abdullayevin idarə etdiyi Vaz-2106 markalı avtomobillə toqquşub. Hadisə nəticəsində həmin avtomobilə 815 manat maddi zərər vurulub.
Vəliyəddin Əhmədov Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozmaqla erhtiyatsızlıqdan iki və daha çox şəxsin ölümünə səbəb olma) maddəsi ilə ittiham edilib.
Şəki Ağır Cinayətlər Məhkəməsinin hökmü ilə Vəliyəddin Əhmədov cəzanı məntəqə tipli cəzaçəkmə müəssisəsində çəkməklə 4 il, 1 ay, 8 gün müddətinə azadlıqdan məhrum etmə cəzasına məhkum olunub.
Hökmdən narazı qalan prokuror apelyasiya protesti verib. O, təqsirləndirilən şəxsin cəzasının ağırlaşdırılmasını istəyib. Prokurorun protesti baxılması üçün Şəki Apelyasiya Məhkəməsinə göndərilib. Apelyasiya protesti hakim Rafail Əliyevin sədrliyi ilə baş tutan iclasda araşdırılıb.
Təqsirləndirilən Vəliyəddin Əhmədov bildirib ki, törətdiyim əməldə özümü tam təqsirli bilirəm, əməlimdən çox peşmandıram. Onun sözlərinə görə, bu hadisə ilə əlaqədər olaraq gününü mənəvi iztirab və vicdan əzabı ilə keçiririr: “Ömrümdə birinci dəfə yol nəqliyyat hadisəsi törətmişəm. Bu vaxta qədər heç vaxt yol hərəkəti qaydalarını pozmamışam və inzibati məsuliyyətə cəlb edilməmişəm. Zərərçəkmiş şəxslə barışıq əldə etmişəm, onun məndən şikayət və tələbi yoxdur. Eyni zamanda, mərhumların ailələrinə əlimdən gələn kömək etmişəm. Onlardan dönə-dönə üzr istədim, məni bağışlamalarını xahiş etdim və onlar məni bağışladılar. Yaşım az deyil, həmçinin hadisədən sonra keçirdiyim stress və aldığım xəsarətlər nəticəsində səhhətim xeyli pisləşmişdir. Yoldaşım da ağır xəstəlikdən əziyyət çəkir, onun mənə ehtiyacı var. Odur ki, apelyasiya protestinin təmin edilməməsini, birinci instansiya məhkəməsinin hökmünün isə dəyişdirilmədən saxlanılmasını məhkəmə kollegiyasından xahiş edirəm”.
Zərərçəkmiş şəxsin hüquqi varisi Elgiz Zaməddinov bildirib ki, mərhum Səadət İsmayılova onun bacısı olub: “Dekabrın 12-də, saat 17 radələrində yaşadığım Mingəçevir şəhərində olan zaman bildim ki, bacımın sərnişini olduğu avtomobil qəzaya uğrayıb. Dərhal Yevlax rayonuna Qaraoğlan kəndinə gəldim. Kənddə olan zaman bacımın almış olduğu bədən xəsarətlərindən ölməsini bildim. Bacımı dekabrın 13-də Qaraoğlan kəndində qəbirstanlıqda dəfn etdik. Sonradan mənə məlum oldu ki, bacımın qayınatası İslam İsmayılovun idarə etdiyi Vaz-21074 markalı avtomobildə qəza nəticəsində ölüb. Təqsirləndirilən şəxs Vəliyəddin Əhmədov 15000 manat maddi yardım göstərib. Ondan heç bir şikayətim yoxdur”.
Mərhum İslam İsmayılovun oğlu Ağasəf ismayılov da eyni məzmunlu ifadə verib. O, da təqsirləndirilən şəxsdən şikayətçi olmadığını bildirib.
Tərəfləri dinləyən hakim heyəti sonda qərar elan edib. Qərara görə, prokurorun protesti təmin edilməyib.

Aslan
gundemxeber.az