Bakıda iş qurmaq adı ilə vətəndaşlara qarşı külli miqdarda dələduzluq etməkdə təqsirləndirilən şəxsə hökm oxunub.

Bakı Ağır Cinayətlər Məhkəməsində dələduzluqda təqsirləndirilən Sərdar Hətəmovun cinayət işi üzrə məhkəmə iclası başa çatıb.

Hakim Mahmud Ağalarovun sədrliyi ilə keçirilən məhkəmə oclasında hökm oxunub. Hökmə əsasən S.Hətəmov 8 il 6 ay müddətinə azadlıqdan məhrum edilib.

Qeyd edək ki, Sərdar Hətəmov bir neçə nəfərə qarşı iş qurmaq, tikinti materiallarının satışını həyata keçirmək adı ilə dələduzluq edib.

İttihamda yazılır ki, S.Hətəmov bu məqsədlə Elxan Qarayevdən 138 min dollar alıb. Həmin pulun 54 min manatını qaytarıb.

Həmçinin Adışirin Hüseynovun etibarından sui-istifadə edərək 8200 manatını, Lazım Mehdiyevin 8290 manatını ələ keçirib.

S.Hətəmov bundan başqa Qaşqay Məmmədova qarşı da dələduzluq edərək onun 20 min dollarını alıb. Daha sonra həmin məbləğin 4 minini geri qaytarıb.

Sərdar Hətəmov özünü təqsirli bilməyib və adı çəkilən zərərçəkmişlərdən pul almadığını söyləyib.

Bildirək ki, S.Hətəmov Cinayət Məcəlləsinin 178.3.2-ci (dələduzluq, külli miqdarda törədildikdə) maddəsi ilə ittiham edilir.