Bakı Ağır Cinayətlər Məhkəməsində adam öldürməyə cəhddə ittiham olunan Şamaxı rayon sakini, 35 yaşlı Şirzad Əsədovun cinayət işi üzrə məhkəmə prosesi keçirilib.

Prosesdə dövlət ittihamçısı ittiham aktını elan edib. İttihama görə, Şirzad Əsədov qeyri-rəsmi münasibətdə yaşadığı Zöhrə Əlqəmbəyevanı əvvəlcə övladlarının gözü qarşısında qayçı ilə vuraraq xəsarət yetirib. Hadisədən bir neçə gün sonra isə qısqanclıq zəminində Zöhrə Əlqəmbəyevanı öldürməyə cəhd edib. Bıçaqla ona çoxsaylı zərbələr endirib.

Təqsirləndirilən Ş.Əsədov ona elan olunmuş ittihamla özünü təqsirli bilməyib. Deyib ki, ilk hadisə baş verən gün Zöhrə ona kobud cavab verib: "Gecə evə gələndə gördüm ki, uşaqlar yatıb. Bu da pəncərəni açıq qoymuşdu. Mən səbəbini soruşanda başqa cür cavab verdi. Bildim ki, artıq bunun havası deyil. Adam başqasının havasını oynayanda ayaqqabısı ayağından çıxır. Yalvardım ki, özünü düzgün apar, problem yaratma. Amma eyni qaydada davam elədi. Mən də qayçı ilə iki dəfə şram atdım. Birini boynuna, birini də kürəyinə. Sonra da uşaqlar gəldi. Uşaqların gözü qarşısında vurmamışam. Paltarını dəyişib evdən çıxdım. Həmin hadisədən bir neçə gün sonra məhkəməm olacaqdı. Öz əmimoğlu ilə davam olduğu üçün çöldən-çölə məhkəməm gedirdi. Bu hadisədən sonra da işim ağırlaşdı. Amma bu məndən şikayətçi olmadı”.

Ş.Əsədov deyir ki, qayınatası onların ailədaxili işlərinə müdaxilə edib. Mütəmadi olaraq ər-arvad arasında narazılıq yaranıb, dava-dalaş düşüb:”Bunun atası aranı çox qızışdırırdı. O qədər dedim ki, özünü ağıllı apar. Demişdim ki, səni öldürməyəcəm, şikəst edəcəyəm. Mən biqeyrət deyiləm. Yaşadığım adamın qədrini bilirəm, onu da istəmişəm. Özü də bunu bilir. Amma mənə qarşı çox səhv elədi. Axırıncı dəfə də onu kənddə görəndə çağırdım ki, hara gedirsən? Mənə dedi ki, ay biqeyrət, sən kimsən ki, arxamca gəlirsən? Məcbur elədi ki, onu vurum. Mən də onu vurdum".

Tərəflərin suallarını cavablandıran Ş.Əsədov Zöhrəni öldürmək niyyətində olmadığını bildirib: “Öldürmək istəsəydim, öldürərdim. Ona dedim ki, səni öldürmədiyim üçün mənə yalvaracaqsan. İstəyirdim ki, sifətinə şram atım. Neçə dəfə atsam da tutmadı. Əli ilə tutmaq istəyirdi. Yalvarırdı ki, vurmayım”.

Daha əvvəl də məhkumluq həyatı yaşayan Ş.Əsədov məhkəmədən ədalətli araşdırma aparılmasını istəyib.

Daha sonra zərərçəkmiş Z.Əlqəmbəyeva ifadə verib.

Zərərçəkmiş ifadəsində Şirzadla bir müddət bir yerdə yaşasa da, sonradan ayrılmaq istədiyini, lakin sonuncunun ondan əl çəkmədiyini göstərib: “Elə sözlər var ki, onları demək istəmirəm. Məni dəfələrlə vurub. İlk dəfə vuranda da çox ağır xəsarətlər yetirib. İkinci dəfə də vuranda məndən əl çəkməsini dedim. Etiraf edim ki, mən də ona ağır sözlər dedim. O da məni vurdu”.



Ş.Əsədov Zöhrəni vurandan sonra ona qan vermək üçün xəstəxanaya getdiyini deyib. Z.Əlqəmbəyova komada olduğu üçün bunu xatırlamadığını söyləyib.

Qeyd edək ki, hadisə ötən il Şamaxı rayonunun Meyseri kəndində baş verib. Kənd sakini, 33 yaşlı Zöhrə Əlqəmbəyeva qeyri-rəsmi nikahda yaşadığı Ş.Əsədov tərəfindən döyülüb. O, ağır bədən xəsarətləri ilə Şamaxı Rayon Mərkəzi Xəstəxanasına yerləşdirilib. Xəstəyə qapalı kəllə-beyin travması, baş beynin silkələnməsi, qarın nahiyəsinin qapalı travması, nazik bağırsağın cırılması, sol çiyin qurşağının kəsilmiş-deşilmiş yarası diaqnozu qoyulub.

Əvvəllər məhkum olunmuş Ş.Əsədov hadisədən 15 gün öncə Z.Əlqəmbəyevanı qaçırıb və onlar qeyri-rəsmi nikahda yaşayıblar. Qadın bundan öncə bir dəfə evli olub.

Hadisədən sonra Ş.Əsədov narkomaniyadan əziyyət çəkən şəxslərin müalicə aldığı Narkoloji Mərkəzə gedib. Özünü başqa şəxs kimi təqdim edərək orada müalicə almağa, gizlənməyə başlayıb.

İki gün sonra Narkoloji Mərkəzdə məlum dəhşətli yanğın hadisəsi baş verib və 25 nəfər xəstə dünyasını dəyişib. Yanğınla bağlı araşdırma aparılarkən Şirzad Əsədovun əsl kimliyi üzə çıxıb və həbs edilib.

Narkoloji Mərkəzdə baş verən yanğına görə davam etdirilən məhkəmə iclasında da Şirzad Əsədov zərərçəkmiş kimi dindirilib.//virtualaz.org