2024-cü il noyabrın 25-də barəsində həbs qətimkan tədbiri seçilən hərbi ekspert Ədalət Verdiyevin cinayət işi üzrə ibtidai istintaq başa çatıb. Cinayət işi baxılması üçün Nəsimi Rayon Məhkəməsinə göndərilib.

Gundemxeber.az xəbər verir ki, bu barədə Amerikanın Səsinə vəkil Bəhruz Bayramov bildirib.

Onun sözlərinə görə, hərbi ekspertə qarşı Cinayət Məcəlləsinin 308.2-ci maddəsi (Vəzifə səlahiyyətlərindən sui-istifadə) ilə elan olunan ittihama xitam verilib.

“Verdiyev hazırda Cinayət Məcəlləsinin 284.1-ci maddəsi ilə (dövlət sirrini yayma) ittiham edilir. Cinayət işi bu ittihamla məhkəməyə göndərilib”, o qeyd edib.

Vəkil hərbi ekspertin özünü dövlət sirrini yayma ittihamı ilə qismən təqsirli bildiyini deyib.

İttiham məhkəmədə sübutunu taparsa Verdiyevi üç ildən altı ilədək müddətə həbs gözləyir.

Baş Prokurorluğun Mətbuat xidmətinin 2024-cü il noyabrın 25-də yaydığı məlumatda deyilir ki, ötən il noyabrın 22-də Azərbaycan Səhiyyə Nazirliyinin “İctimai Səhiyyə və İslahatlar Mərkəzi” Publik Hüquqi Şəxsin mülki müdafiə qərargahının rəisi vəzifəsində işləyən, Azərbaycan Silahlı Qüvvələrində ixtisaslı zabit kimi hərbi xidmət keçmiş xüsusi səlahiyyət üzrə hərbi ekspert Ədalət Verdiyev tərəfindən dövlət təhlükəsizliyini və müdafiə qabiliyyətini təmin edən mənafelərə ağır nəticələrə səbəb olan mühüm zərər vurulması müəyyən olunub.

“Noyabrın 22-də təşkil olunmuş mediaturda hərbi-ekspert qismində iştirak etmiş Ədalət Verdiyevin Azərbaycan Silahlı Qüvvələrinin döyüş məntəqələrinin yerləşdiyi yüksəklikləri, sərhəd qoşunlarının dislokasiyası yerlərini, koordinatlarını və əməliyyat şəraitini nümayiş etdirib şərhlər verməklə videoçəkiliş apardıqdan sonra həmin videonu özünə məxsus sosial şəbəkə hesabı vasitəsilə qeyri-məhdud sayda izləyicilərin baxa biləcəyi səviyyədə yaymasına, yəni öz qulluq səlahiyyətlərindən istifadə etməklə Azərbaycanın qanunla qorunan dövlət təhlükəsizliyini və müdafiə qabiliyyətini təmin edən mənafelərinə ağır nəticələrə səbəb olan mühüm zərər vurmasına əsaslı şübhələr müəyyən edilib”, Baş Prokurorluq bildirib.

Ədalət Verdiyev hərbi ekspert kimi Azərbaycan mediasında, o cümlədən dövlət televiziyası da daxil olmaqla, hökumətə yaxın hesab edilən media vasitələrində çoxsaylı şərhləri ilə tanınır.

Gundemxeber.az