20 Yanvar Azərbaycan xalqının qəhrəmanlıq salnaməsidir.

Həmin gün xeyli şəhid verdik, eyni zamanda mətinləşdik və müstəqillliyimizin alternativinin olmadığını dərk etdik.

SSRİ erməni separatizmi ilə mübarizə aparmaq istəmir, Dağlıq Qarabağda və Ermənistanda qanla müşahidə olunan etnik təmizləmələrə göz yumurdu.

Buna azərbaycanlılar seyrçi qala bilməzdilər, etirazımızı bildirdik, ancaq mərkəzi hökumət separatizmin kökünü kəsmək əvəzinə separatizmlə mübarizə aparanları cəzalandırdı.

Ulu öndər Heydər Əlliyevin də etirazı buna idi. SSRİ-nin hələ qılıncının kəsərli olduğu günlərdə ulu öndər sovet hərbi birliklərinin Azərbaycan xalqını cəzalandırmasına etiraz etdi və bununla Kremlə meydan suladı.

Həmin an ulu öndər şəxsi təhlükəsizliyini əsla düşünmür, xalqının yanında olduğunu və onu dəstəklədiyini nümayiş etdirirdi.

İnformasiya blokadasında olduğumuz həmin günlərdə ulu öndər cəsarət nümayiş etdirərək əli qana bulanan Moskva üzərindən və dünya mediası vasitəsilə beynəlxalq aləmə səsləndi, azərbaycanlılara qarşı qətliamın həyata keçirildiyini gur səslə bəyan etdi.

20 Yanvar hadisələrindən 28 il keçib, xalqımız şəhidlərini və qəhrəmanlarını unutmur, onların əziz xatirəsini hər zaman yad edir.

Adil ƏLİYEV,
Millət vəkili